" انت حبك كنه الحكم السعودي ثبته عبدالعزيز ولا تغير ".

الجزء الثاني

طفى السيارة ووقفت ورجع يناظر نوره اللي حاطه يدينها على وجهها ومنزله رأسها لحظنها
محمد : سلامات وش فيه
مهره بصوتها المبحوح واللي باين التعب فيه: هي انت خييير وليه تخوفنا نحسبك حرامي
محمد : اللي عطاكم السيارة من ؟
مهره باعت نوره وقالت : نوره تقول عطوني السيارة ابي محمد يشوفني وانا اسوق
شهقت نوره من قوة وقع الكذبه عليها رفعت رأسها تناظر محمد اللي ظاع فعيونها وجمالها اخر مره شافها وعمرها ٨ سنين  صارت جميله مرره جمالها يعور القلب : كذااااابه والله العظيم كذابه
محمد ابتسم : يعني تبيني اشوفتس وأنتي تسوقين ؟
مهره ردت على طول : ايييه تبيك تمدحها
امتلت عيون نوره دموع وقالت وهي ماسكه الغصه من الفشله والاحراج والخوف والتوتر والقهر ودها انها تذبح مهره : لاتصدقها البزر أمي قالت عدلي السيارة قبل اجيتس عشان مهره نايمه فيها والشمس على وجهها وانا ماعرف بس قلت بجرب وماعرفت اوقفها بسسس.
ضحك محمد وقال : خلاص مصدقتس وبعلمتس كيف تسوقين بس لا اشوف دموعتس
ومسح دمعتها اللي نزلت على خدها وهي تبرر له اللي صار استوعبت نوره انها رافعه النقاب صدت بسرعه ونزلته على وجهها
قالت مهره تبي تقهر نوره  : معليه ان ماعلمت ابوي ان محمد شافتس وهرجتس و لاااا بعد مسك وجهتس اصبري نرجع هييين
قال محمد وهو يسحب نقاب نوره وينزله وسحب الطرحة بعد : قولي لعمي أني نزلت نقابها وطرحتها و.. "سحب نوره اللي صارت كأنها جثه هامده يتحكم فيها على كيفه ضرب كتفها في صدره وباس رأسها .. "وسلمت على رأسها بعد
شهقت مهره : ياقليل الأدب والله لا اعلم سالم ومطلق ومحسن وفيصل وامي وأبوي وسعود وشريف... سكتها ضربت محمد لها على رأسها : اصصص أزعجتينا وبعدين تراني زوجها وين المشكلة
مهره رجعت تنسدح وتغطي رأسها بالغطاء اللي جابته امها لها : داريه انك رجلها بس بعلمهم بشوف وش يقولون
كل ذا ونوره منزله رأسها تحت الدركسون ويديها على وجهها اللي تحسه احترق من الاحراج .. مسك محمد شعرها اللي لافته وجامعته فوق وفكه انتثر كانه مويه من نعومته وصل لنهاية ظهرها مسك خصله منه وقربها حطها على وجهه وشم ريحتها أخذ نفس وزفره بهدؤ رفعت نوره رأسها سحبت الطرحة منه وحطتها على رأسها وسحبت النقاب ورمته على المرتبه
محمد سألها : مستحيه مني ! ترى زواجنا باقي عليه كم يوم حاولي تعودين نفستس
نوره خلاص ماتت من الاحراج تحس اعظامها ماتشيلها شغلت السيارة ومشت على طول لانها باقي فـD
محمد لحقها وطفى السيارة : وينن ياحياتي يعني مصره تسوقين ..  ركب جنبها بالغصب ورفعها وحطها في حظنه ونوره تحاول تبعده وتقوم بس ثبتها من خصرها
نوره وفاضت عيونها بالدموع : محمد تكفى فكني انا أصلا ما ابي اسوق بروح لاهلي
محمد ثبتها ومسك يدها وحطها على القير : قال ركزي وافهمي ترى السواقه سهله
نوره : ماببيي ، ماتفهم أقول مابي اسوق روح الخيمه بسرعه
محمد ضمها له صار صدره ملاصق لظهرها وحط رأسه على كتفها و وجهه قريب من وجهها قال لها بهمس يبي يطمنها : نوره حبيبتي شفيتس ما اكل بشر انا بعدين تراني رجلتس لاتستحين مني تعودي علي
نوره : خلاص ودني الخيمه تكفى قدر أني مستحيه
محمد وهو مازال على وضعه : بوديتس بس بشرط أنتي اللي تسوقين
نوره بحركه عفويه منها عشان تشوف تعابير وجهه لفت له وصار نفسها يلفح وجهه : ماعرف
محمد اختبص حاول بكل قوه يملكها انه يمسك نفسه مايبي يخوفها  : بعلمتس من هنا للخيمه اذا عرفتي زين على زين وإذا ماعرفتي بعلمتس مره ثانيه اذا تزوجنا
نوره تبي الفكه:  خلاص بس تعال اركب مناك واشرح لي عشان افهم
محمد ضمها اكثر ودفن وجهه برقبتها يتنفس عطرها وقال وصوته مكتوم : لا لازم كذا
نوره فتحت الباب : محمد انت شفيك انا خلاص بنزل بروح على رجولي
محمد : خلاص خلاص بركب مناك
نزل محمد وركب من الجهة الثانيه تذكر بيت لمساعد الرشيدي يمثله حاله هو الحين
من يحدثني حديث الثلج للجمر بثغرها
والله اني كنت ناوي لي بهاك الجمر نيه
أخذ نفس وزفره والتفت لها قال : ذا الحين وش بتسوين
نوره وهي معطيته ظهرها تلم شعرها وترفعه فوق ويديها ترجف : صبر
محمد : خذي راحتس بس انا بركب سيارتي واعلمتس وانا فيها
نوره لفت له بخوف بعد مالبست النقاب: لا والله !! كيف بعرف بالله ؟
ابتسم محمد وهو أصلا يبي يبعد عنها لان قربه منها ماهو من صالحهم كلهم : تعرفين القير والدركسون والبانزين والبريك
نوره : ايه
محمد فتح الباب بينزل : حلو بس اهم شي تركزين والباقي خليه علي
نزل وركب سيارته وقفها جنب سيارة سالم قال : جاهزه
هزت نوره رأسها بمعنى ايه
محمد : يلا اضغطي بريك وحطي القير فـ N
نوره سوت اللي قاله : ايوه وبعدين
محمد : شغلي السيارة
سمت بالله ربطة حزام الأمان احتياط وشغلت
قالت : وهالحين شسوي
محمد : اضغطي بريك وحطي القير فـ الدي وارفعي رجلك عن البريك وخليها على البنزين وإذا قلت لك هدي اضغطي بريك بشويش زين ؟
نوره صار فيها عقده من D : مافيه غير الدي ؟
محمد ابتسم : لا
سوت اللي قاله ومشت السيارة
محمد : اسرعي بيجي الليل ماوصلنا
داست نوره بانزين بقوه .. انخرشت من السرعة اللي وصلت لها وضغطت بريك وقفت السيارة فجاءة والتراب طار عليها وعلى السيارة كأنه إعصار طاحت مهره وقامت شافت اللي يسوق نوره بعد وسيارة محمد تمشي معهم
قالت : نوره وقفي 
نوره : اصص لاتقلقيني
مهره طمرت قدام ومسكت الدركسون : اقولتس وقفي بنزل وأنتي موتي كيفتس
محمد جاء  : انزلي انزلي ماحولتس سواقه
نوره : اذا نزلت بتروح السيارة تمشي لحالها
محمد فتح الباب : السيارة تمشي الحالها من الصباح تعرفين توقفينها يعني
نوره : طيب بتودينا على سيارتك والا سيارتنا
محمد : لا سيارتكم وبرجع على سيارتي
نوره : اسفه محمد أزعجناك
محمد عطاها نظره خلتها تسكت : بتنزلين والا أعيد اللي قبل شوي
نوره : وين انزل
محمد : تعالي مناك
نزلت وجت مناك  ومشوا متوجهين جهة العزبه وصلوا وقف محمد السيارة وعدلها عشان الشمس جاء بينزل قالت نوره: يعطيك العافيه
محمد لف لها وابتسم : يعافيتس
رجع لسيارته ومهره كملت نوم دخلت نوره داخل لامها وبدريه
أم مطلق : نويره ماعرفتي توقفين السيارة؟!!!
نوره بفشله : لا والله العظيم
بدريه من لما دخلت نوره وهي تضحك
أم مطلق : معليتس شرهه
نوره  : أني داريه
بدريه تبي تحرجها : ساق الله عليتس محمد هو اللي انقذتس
نوره تجاريها : صدقتي
بدريه : قولي وش صار
نوره : والله ان تبطين ماقلت لتس
بدريه : ترى بعلم سالم
نوره : قد سبقتس مهره عندها اعلوم ماتعرفينها أنتي
بدريه : دامها عند مهره بعرف اطلعها
ضحكت نوره لما تذكرت الأحداث اللي صارت وشكل مهره بس وقفت ضحكتها وصار وجهها حار واحمر لما تذكرت محمد قالت بخاطرها :  يوووكك يلفشله
أم مطلق : قطعن السلطة وخلن القهوة والشاهي جاهزات
جاء سالم ومعه ضب لقاه عند اللبل وصاده قال : الغداء ريض " يعني بيتاخر "
أم مطلق : الساعه ثنتين تلقاه جاهز
محمد وجه كلامه لام مطلق : أنتي اللي على السيارة
أم مطلق : ايه ليه؟
سالم : مغير اسال وش تبين فيها
نوره بسرعه قالت قبل لاتنفضح: سالفه طويله بعدين تقولها لك
بدريه نادت بشرى لما شافت الضب عرفت انها بتخاف منه وماتبيها تشوفه : بشرى تعالي عندي بسرعه
جتها بشرى حطتها بدريه فحظنها ولفت وجهها عن سالم .. نوره عرفت حركات سالم بيحط الضب عليهم قامت وراحت عند امها وخذت البطانية ودخلت فيها طلعت رأسها بتشوفه وش بيسوي شافته متوجه لبدريه وعلى وجهه ابتسامه شريره دخلت رأسها فالبطانيه وجت في حظن امها وقالت : يمه تكفين لايحطه علي
أم مطلق : عادي وان حطه عليتس بتموتين
نوره جت بتتكلم وسمعت صرخت بدريه وحشرت نفسها في حظن امها زياده
بدريه شافت سالم متوجه لها ضمت بشرى ونزلت رأسها وجسمها عليها قالت : سالم امانه سالم انا في وجهك لا لا بشرى لاتروعها .. سالم كأنه مايسمع حطه على ظهرها صرخت بدريه : لاااععااععااا أبعده امانه امانه امانه .. وقفت ومسكت يد بشرى وراحت تركض برى الخيمه .. مالحقها خلاها تروح وراح هو لنوره .. نوره حست فيه يقرب لها قالت : ترى بصيح الريجيل بيسمعوني ترى بفشلكم
رفع البطانية مسكتها نورها تسحبها وهو يسحبها قالت : انا في وجه امي تكفى ياسالم الله يخليك .. سحب البطانية منها ورماها بعيد قامت وجت ورى أم مطلق : يمه تكفين لا يحطه علي
أم مطلق وهي تضحك وعارفه انها تخاف منه بس قالت :معليتس الا العافيه مغير دلع .. نوره معاد تدري وين تروح كانت شاده ظهرها بأمها بس امها سحبت عليها قالت : دقيقه اصبر بقولك شي
سالم وهو ماسك الضب ورافعه فوق بتهديد : دقيقه ماهنا غيرها عجلي وش عندتس
نوره تحاول تقنعه : ذلحين وش تستفيد اذا حطيته علي!؟ ماراح تستفيد شي صح ولا لا
سالم قرب الضب لها : لا
نوره :  دقيقه دقيقه
رمى الضب عليها قال : عطيتس وجه انا
نوره صرخت وصارت تنتفض وتنط كأنه ماسكها كهرب نزلت عبايتها وطرحتها ورمتها طلعت برى الخيمه من جهة الريجيل وهي تركض وتبكي وتحلطم : وش استفدت ذلحين هاه فله يعني وأنتي يمه ما مسكتيه ليييه؟؟
سالم لحقها وهو يضحك شافته كيف يضحك عليها ومستانس باللي سواه تبي اي شي يقهره بس مالقت قالت وهي متوجهه لسيارة ابوها بتركب : هين والله لاوريكم والله لاروح مع محمد واسحب عليكم كلكم ولاعاد تشوفوني اصبروا بس
سالم قال يجاريها وعارف انها قالت كذا تبي تقهره : افا يابنت محمد ماهقيتها منتس تنسينا !!
ركبت نوره قبل احد يشوفها وقالت قبل تسكر الباب : اللي مايحبني ما ابيه والله ان رجلي ماتطب الخيمه والضب فيها طلعه خلني اتغداء
سالم : يعني محمد يحبتس ؟ .. استوعبت نوره وش قالت وتفشلت سكرت الباب بدون رد قالت في نفسها : انا وش هببت يفضحي فضحاه ، بس احسن خله عشان ثاني مره مايحط علي ضب .. حست ان قدام فالسيارة فيه احد طلت بتشوف من لقته فيصل دعت الله انه ماسمعها قالت وهي تمسح دموعها: فيصل ؟
فيصل : خير
نوره : شفيك معصب وليه جاي هنا
فيصل ارتخى في جلسته وحط رجله على الطبلون : ترى ابوي عنده ريجيل عبايتس وينها
نوره تفشلت : عبايتي فيها ضب
فيصل لف وعطاها نظرة بمعنى تستهبلين؟ : الضب مايطلع!؟
نوره : ماجربت
نزل فيصل بدون نقاش دخل الخيمه على أمه وبدريه سحب العبايه ونفضها وراح رماها على نوره قال : لاعاد تنزلينها لكان فيها عقرب
نوره خذتها ولبستها وهي ساكته ماتبي ترد تعجبها شخصية فيصل رغم انه اصغر منها بس تحترمه
راح لريجيل بقت نوره فالسيارة شافت الضب طالع يركض بعد ما أطلقت سراحه أم مطلق دخلت وهي تتحلطم : اليوم مدري وش فيني اول السيارة وذا الحين الضب الله يستر وش بيصير بعد