" انت حبك كنه الحكم السعودي ثبته عبدالعزيز ولا تغير ".

الجزء التاسع :

اما في بيت محسن
الهنوف : رنا طلعي فستاني الجديد احسلتس
رنا تحاول ماتحط عينها بعين الهنوف : مادري وينه ، أصلا مادري كيف شكله
الهنوف : اها ماتدرين ، بتجيني بعد شوي تسألين عن شي
رنا شكت ان الهنوف سارقه شي راحت تركض لشنطتها تذكر ان الهنوف حاطه عينها على كعبها فتشت فالشنطه بس ماحصلته رجعت للهنوف : خلاص هنوف مزحت معتس طلعي الكعب واطلع الفستان
الهنوف : يعني ماتمشين الا كذا اعترفتي ان الفستان معتس؟
رنا : كنت امزح واصلا ناويه اطلعه قبل لاتاخذين الكعب
الهنوف : اي واضح يلاه ذلحين سلم واستلم سلمي الفستان وأسلم لتس الكعب ...

راحت رنا جابت الفستان ورمته بقهر على الهنوف : من زينه عاد
الهنوف طلعت الكعب من شنطتها ورمتها على رنا : يعني معجبتس ذا الكعب استغفرالله بس
رنا وهي تحاول تتجنبه لايصقع فيها : لا لا  ، قدرت تتفاداه طاح جنبها نزلت تاخذه وهي تقول : مو كأنتس بتموتين عليه
طلعت رنا تكمل أغراضها والهنوف سكرت شنطتها وخذت عبايتها من السرير لبستها وطلعت بخطوات سريعه وهي تسحب شنطتها واجهة ماجد بطريقها يطمر الدرج درجتين درجتين مستعجل شافها وقف بنص الدرج  : خلصتوا؟
الهنوف : باقي شوي
كمل طريقه : يلاه يلاه استعجلوا نبي نمشي سوا
الهنوف بصوت طويل عشان يسمعها لانه صار بعيد : انت خلصت
ماجد بنفس مستوى الصوت : ماني مأخذ شي لي ملابس هناك
طلعت فاطمه من غرفة فيصل وهي تسحب شنطته قالت لهنوف : اسحبي الشناط ونزليها تحت وشوفي شناطنا انا وابوتس عند باب الغرفة يلاه استعجلي ياحبيبتي
الهنوف وهي تاخذ الشنطه من يدها : أبشري بس يمه حنا ماسوينا شي انقنق عليه فالسيارة
فاطمه : انا طلبت من سعدية تسوي ورق عنب ومعجنات وحلا راح فصول يجيبها
الهنوف : والقهوة والشاهي
قالت وهي تتوجه لغرفتها تاخذ عبايتها : جاهزات
طلعت رنا وهي تسحب شنطتها قالت لها الهنوف : اختاري ياتنزلين شنطة فيصل ولا شناط امي وأبوي
رنا : طبعًا فيصل
الهنوف : مع انه ظُلم بس عاد يلاه
طلع ماجد من غرفته شافهم يسولفون عند الدرج : مب وقت سوالفكن ابدد
الهنوف برجاء : مجود تكفى نزل شناط امي وأبوي ماقدرنا عليها
راح ماجد جهة الشناط وشالهم مع بعض كل وحده بيد ونزل فيهم الدرج ابتسمت الهنوف بانتصار وخذت شنطتها : عطاني ربي على قد نيتي يلاه نزلي شنطة فيصل
رنا انقهرت بس ماحبت انها تبين : طيب!
ماردت الهنوف وهي تنزل خمس دقايق الا وهم جاهزين وواقفين فالصاله ينتظرون يقولون لهم يلاه اركبوا بعد ماشالوا الشناط فالسيارة
___________________________________________

في بيت مطلق كانو جاهزين من زمان وجالسين فالصاله الي نايم والي صاحي والي يأكل
صيته : الله يهديهم ذلحين وش يسوون كل ذا الوقت؟
حمد الي كان منسدح على رجلها : ما عندهم سالفه
جت ساره وهي معصبه : حمد انا كم مره شريت شاحن الاسبوع ذا ؟
حمد بصوت مثقل بسبب النعاس : ماحسبتهم
ساره باستغراب : طيب انت تاخذ الشواحن وين تحطها
حمد : أنساها فالسيارات ، الي امس ظني أنه فسيارة محمد
ساره : ما شاء الله نوزع شواحن حنا!!
حمد : أنساها ياخي وترى راس ماله شاحن يرضيتس تزعليني عشانه! ، انا اخر العنقود السكر المعقود عادي ازعل!!
ساره ماتبي تكبر السالفه صدت بتأفف تحاول تهدي نفسها
صيته : لا والله مهب عادي مير يا أمك لا تضيع الشواحن
باس يدها : أبشري
رفعت مشاعل الي كانت نايمه رأسها عشان تتكلم : لق لق لق لق ازعجتونا الواحد مايعرف ينام
حمد : زيني شوشتس اول شي وثاني شي لا المكان ولا الوضع يسمح لتس ترقدين
مشاعل رمت رأسها على عبايتها الي نايمه عليها : افففف
وضحى : اتوقع انهم بيخلونا نتغداء هنا
ساره : لا تتوقعين يرحم والديتس نبي نمشي وبس طفشنا
وضحى : يمه ناخذ العزبه حقت عبدالله؟ يمكن نحتاجها
صيته : ايه الله يذكرتس بالشهادة بغينى ننساها
قامت مشاعل وراحت جهت امها وهي تحبي على ركبها والشوشه طايره ومفتحه عين ومسكره الثانيه
حمد عدل جلسته : بسم الله وش بلاتس
حطة رأسها على رجل امها وكملت نوم بدون تنطق بحرف
صيته : مادري متى تشبع نوم ذا البنت
انسدح حمد على رجلها الثانيه وهو يتثاوب : انا والله اني أنعس بعد
ساره : خيير كسرتوا ارجول امي قوموا عنها
قام حمد وصار يدف راس مشاعل : قومي قومي عن امي
صيته : خلها والله ان تخليها
حمد : يعني أقوم انا
ضحكت صيته وقالت وضحى : انت قم رتب الشناط بالسيارة
قام بكسل وهو يسحب رجوله

___________________________________________

: دق على فيصل شوف هو بيروح معنا
محمد : يقول بيخلص له شغله ويلحقنا
جاء حمد : يالغالي متى نمشي عاد
مطلق : قول لأهلك يركبون بنمشي ذا الحين
محسن : يلاه توكلنا على الله
تفرقوا وكل واحد راح لبيته
نادى خالد محمد قبل يدخل : محمد بتروح بسيارتك ؟
وقف محمد عند باب البيت ولف عليه : ايه بأخذها ماني مصبر عنها
خالد : اخذ العيال معك
محمد : اسامه مافيه مشكله بأخذه بس مهند لا إسمحلي
خالد راح جهته يبي يقنعه : خل اسامه وأخذ مهند طيب اهم شي تاخذ مهند تكفى ياولد ماني موقف كل شوي وأهلي معي
محمد : طيب طيب خله يروح معي رحمتك
خالد بفرح : كفووو
كان مهند اذا ركب السياره والطريق طويل يدوخ ويستفرغ ويوقفهم كل شوي عشان كذا كل واحد يرميه على الثاني

___________________________________________

طلعوا يركبون شافت رنا ريم تركب سيارتهم نادتها : هيه بنت ريوم
لفت عليها ريم بفرح و حماس وصارت ترسل لها بوسات وقلوب ورنا مثلها جت الهنوف ومسكت رنا بطرف عبايتها من خلف رقبتها وسحبتها تركبها السياره : اركبي اركبي فاضين لتس حنا قلوب وبوسات في ذا القايله
ضحكت ريم عليهم وطلعت جوالها تصور ركبت وفتحت القروب وأرسلته فيه
طلعوا كلهم وركبوا سياراتهم ومشوا مع بعض
كل واحد بسيارته الا العيال مع بعض في سيارة محمد
كانوا الي بسيارة محمد / حمد واسامه وماجد ومهند

___________________________________________

عند العيال بسيارتهم
محمد الي يسوق وعلى السيت الي جنبه ماجد وورى ماجد اسامه على الباب وجنبه حمد بالوسط ومهند على الباب الي ورى محمد
محمد : مهند انتبه توصخ سيارتي
مهند : طيب اذا قلت لك وقف ، وقف بسرعه عشان ماوصخها
محمد : اسامه انتبه لأخوك
اسامه : ياخي خلاص أزعجتنا هو ماهوب صغير يعرف ترى
ماجد : محمد على تبن اقلقتنا خلنا نستأنس من زين سيارتك عاد
محمد : طيب خلاص بسكت كليتوني
حمد : شغل المسجل خله يلطف الجو

___________________________________________

في سيارة محسن أزعجهم فيصل
فيصل : يبه دق على محمد بركب معه
محسن : زحمه يابوك زحمه سيارته مليانه
فيصل : يبه تكفى ابي استأنس معهم هنا مافيه الا بنات
محسن : سولف مع خواتك وش فيها
رنا : افا يافصول ماتبينا
فيصل : ايه مابيتس وش رايتس يعني
تفشلت رنا وسكتت دقتها الهنوف على يدها : ههخخههخهه دمر جبهتس احسن اللقافه شينه
رنا : ماتفشلت أصلا
فاطمه تبي تغير جو فيصل : صبو لفصول قهوه
همست رنا للهنوف : جعلني ان صبيت له تنكسر يدي صبي له أنتي
ضحكت الهنوف وصبت لفيصل قهوه مدتها له وخذاها
فيصل : يلاه يبه دق عليه يوقف
فاطمه : خلاص يامحسن دق عليه
طلع محسن جواله ودق على محمد : الو
محمد : ارحب
محسن : وقف يابوك على جنب بنزل فيصل معكم
محمد مسك أعصابه لاتنفلت على عمه : أبشر طال عمرك
سكر منه وضغط بريك بقوه بشكل مفاجأ صرخوا العيال الي كانو مندمجين مع الأغنية ....

___________________________________________

تهمني ارائكم وتوقعاتكم 💞