" انت حبك كنه الحكم السعودي ثبته عبدالعزيز ولا تغير ".

الجزء الثاني والعشرون :

- له في خيالي رشّ ديمة وقرع أبواب .

إنتهت الإجازه ورجعوا اهل الدمام منذ يومين
وقبل رجوعهم بأسبوعين تقريبًا رجع اسامه مع ماجد لأكمال الدوره العسكريه
..
6:15 ص
نزل من غرفته يمسك شنطة سفر متوسطة الحجم وتتبعه العنود وهي تحمل شنطة ثانيه سبورت صغيره تقريبًا
تقدم من والدته وقف عند نهاية الدرج وهو يُقبل رأسها ويودعها : يلاه نشوفتس على خير يالغاليه
احتضنته وهي تكفكف دموعها : ربي يحفظك ياحبيبي ويردك لي سالم
دخل مهند يركض : خالد خالد عمي مهند يقول خله يطلع بسرعه مابقى شي على طيارتك
اخذ خالد الشنطه الصغيره من العنود ومدها له : اسبقني انت بهذي
ودع خواته وهو يوصيهم على امه وعلى انفسهم
مايدري هو راح يرجع ولا لا طلب من امه تدعي له بتيسير الامر والعافيه
طلع من عندهم وركب مع مهند صديق والده بيوصله للمطار
جلست شريفه بخيبه ودمعها اخذ طريقه على خدها متاكد انه فيه شي مخبيه خالد عنهم هي ام وشي طبيعي تحس بضناها

___________________________________________

من صباح الله
صوتها صحى كل اللي فالبيت : هنيف بسرعه دقي على بيت عمتي شريفه شوفي السواق جاء ريم ولا لا مدري شفيه متاخر
الهنوف : قصري صوتس يمال الطرم اسمع انا ماعندي نقص سمع
فاطمه : انتي البسي عباتس ذلحين ونقابتس وافطري وتالي فكري فالسواق
رنا : واذا ماجاء يمه وش اسوي
فاطمه : روحي نامي
رنا : وتعبي من يعوضني عنه!! ماني لابسه لين يجي ويدق هرن عند الباب
دقت الهنوف على بيت شريفه وردت العنود بصوت ضايق : هلا
الهنوف : السواق جاكم
العنود : لا و امي تدق عليه مايرد
ألقت الهنوف نظره على رنا وامها وقالت بقلق: وش بلى صوتس ضايق؟
العنود بغصه : خالد سافر
الهنوف : وهذا اللي مضايقتس! ترى ماهي اول مره يسافر
قاطعتها العنود : لا هالمره خارج السعوديه ويمكن يطول احس فيه شي ورى هالسفره ماهي عشان الشغل
قالت تّهديها : وش بيكون عنده يعني اتركي عنتس الوساويس بس وتعالي افطري معي ماعندنا احد فيصل فالمدرسه ورنا هذي هي تنتظر السواق وامي بتنام وبجلس لحالي تعالي نتونس
العنود : ما اقدر اخلي امي لحالها تعالي انتي عندي البيت فااضي مافيه الا امي
الهنوف : اوكي بشوف خلي السواق ياخذ رنا و ريم وارد لك
العنود : لا لا مافيه عذر بتجين يعني بتجين بقوم هالحين اجهز الفطور
الهنوف : طيب طيب
قفلت منها ولفت على امها : ياقلبي هي متضايقه لان خالد مسافر
فاطمه : مسافر وين
الهنوف : تقول للخارج ما سألتها وين بالتحديد
فاطمه : الله يوفقه ويرده لأهله
رنا : يمه شكل السواق مارح يجي
فاطمه : تبين اصحي ابوتس يوديكم ؟
رنا : اي يمه تكفين مافيه وقت تاخرنا
قامت فاطمه وراحت تّصحي محسن اما الهنوف راحت للمطبخ تسوي لها شي تاخذه معها لبيت عمتها
صحى محسن ولبس ملابسه وقف فالصاله عند رنا : السواق ليه ماجا
رنا : مدري يبه ماقالنا شي وجواله مقفل والوقت تاخر
محسن : زين زين اركبي يالله
رنا : ترى ريوم بتروح معنا
محسن : الله يحييها
طلع محسن وطلعت وراه رنا وركبوا السياره وشوي وجت ريم اللي بيتها جنب بيتهم و وداهم محسن للمدرسه
عند الهنوف سوت بيض شكشوكه واخذت معها كيس خبز لبست عباتها وطلعت لبيت عمتها بعد ما قالت لامها..