" انت حبك كنه الحكم السعودي ثبته عبدالعزيز ولا تغير ".

الجزء الخامس:

شهقت وهي تشوف الساعه في جوالها كم صارت خذت عبايتها وشنطتها وكتبها بسرعه ونزلت من الدرج ركض دقة الباب و دخلت غرفته بعد ماسمعته يقول ادخلي شافته جالس على مكتبه الي بزاوية الغرفة يصور أوراق بجواله لف يناظرها بعد مادخل الأوراق فالملف وسكره
بشرى : عمي تأخرنا على الجامعه
فيصل وقف ودخل جواله في جيبه وأخذ مفتاح السياره من الكومدينه : أنتي الي اخرتينا
بشرى : والله ياعمي غطني النوم ولا انت تعرفني أجهز دايم بدري
فيصل مر من قدامها وهو يقول :  امشي بس لا نتأخر زياده " وقف ولف لها " محاظرتس الساعه كم؟
بشرى :الساعه عشره وأخلص الساعه ثلاث
فيصل : معليه يمدي نوصل قبل تبدا
بشرى : الحمدلله
" جامعة بشرى تقع في مدينه قريبه من القريه الي هم فيها لان القريه مافيها جامعه تبعد عنهم ساعه ونص او ساعتين حسب السرعه"
طلعو لحوش البيت شافو أبو مطلق وأم مطلق وسالم وسعود وعبدالله ولد مطلق يفطرون تحت العريش راح فيصل يسلم عليهم وراحت بشرى بسرعه لسياره وركبت مستحيه من عبدالله وماتبيه يشوفها
فيصل : صبحهم بالخير
جاه الرد صبحك بالنور باصوات متفرقه راح يسلم على راس أمه وابوه وجلس على التكايه الي بطرف الفراش ويحرك المسواك بفمه
أبو مطلق : تعال افطر
فيصل : عافيه عليكم حنا بنفطر فالطريق مانبي بشرى تتأخر على الجامعه
سالم : لونك تخليها تروح مع الباص اريح لك كل بنات الديره يروحون معه وسواقه ثقه
فيصل : من متى وبناتنا يرحون مع سواقين وهذا انا فاضي ماعندي شغل ولاانتهت إجازتي يوصلها سعود
سعود : ابد ازهلها لو تبيني أوصلها ذا اليوم ماهنى مشكله
سالم : الي يريحك مير أني مابي أكلف عليك
قال فيصل وهو يقف يلبس نعوله : لاكلافه ولاشي ولاعاد أسمعك تقول ذا الكلام
أبو مطلق : الله يستر عليكم
أم مطلق : انتبهو للطريق ولوصلتو دق علي
فيصل : أبشري يالله توصون شي
أبو مطلق : سلامتك
ركب فيصل السياره ومشى بعد نص ساعه لف لبشرى مستغرب سكوتها هي دايم تسولف عكسها اليوم سكت ماحب يقطع حبل افكارها لانه واضح انها تفكر
عند بشرى تقول في نفسها : ذا الحين لو حنا ساكنين فالدمام مايحتاج اصحى قبل موعد المحاضرة بساعتين ونص عشان البس ونمسك ذا الطريق حر وشمس وتعب يهد الحيل هذا وهي اول سنه لي وطفشت وكرهت الجامعه كيف السنوات الجايه وعمي فيصل وش ذنبه يتعب معي ويوصلني واستمرت بأفكارها لو حنا بالدمام ولو عندنا جامعه بالديره ومعقولة اكره الجامعه واتركها ؟ و و ...
سمعت فيصل يقول : وش تبين اطلب لتس
بشرى وهي مالها نفس تأكل : اي شي اطلب لي مثلك
طلب فيصل وقف ينتظر الطلب
سالها : وش فيتس؟
بشرى : وش فيني!
فيصل : ساكته وبس تفكرين وش مشغل بالتس
ابتسمت ماتبي تبين له : مافيني شي
فيصل ناظرها بطرف عين : خبز أيدي اعرفتس حتى  لو ماتكلمتي
صدت بدون تتكلم وش تقول ماعرفت وش تقول أصلا
شافها ماتبي تتكلم خلاها على راحتها استلم الطلب ومده لها عشان تأخذ فطورها فتحت له فطوره ومدته له وصارو يأكلون والصمت يعم السياره