" انت حبك كنه الحكم السعودي ثبته عبدالعزيز ولا تغير ".

الجزء الرابع عشر :

"ضحكتك اللي توردني دروب البهجة
والله ان افتح لها قلبي واشرع بابه".

بعد ماراحوا الشهود وراح الشيخ
حلف نادر على سعود يتعشى معهم ..
بعد ماتعشى وخلص وشرب شاهي بعد العشاء
وقف سعود : يلاه انا استأذن
نادر بسرعه : على وين
سعود : بروح الوقت تاخر
نادر بِلوم : آفا البيت بيتك يا ابني صرنا أهل مابينا رسميات الليله تبات عندنا قول تم
سعود بإحراج : مره ثانيه ان شاء الله اليله والله مايجيلي عندي شغل
كح نادر وأشر بيده لسعود يجلس
جلس سعود مايبي يتعبه زياده قال نادر بصوت مبحوح من التعب : وش شغله ذا الحزه المحلات قد سكرت
ناظر سعود في مسبحته الي تحركها يده وهو يقول : بمشي لديره قايل للوالد برجع لاجا اليل
نادر : بسيطه كلم الوالد وقوله انك أجلت الرحلة لبكره الصباح
سكت سعود يفكر كيف بيقول لابوه وهو اصلا ماعنده ارسال
نادر : ها وش قلت
سعود باستسلام : شورك وهداية الله
نادر : الله يحييك البيت بيتك خذ راحتك فيه
مشى بعربيته وقال لسعود : الحقني
مشى معه سعود وهو يحاول يلحقه " عربيته اسرع من سيارتي تعبت الحقه ، ذلحين وين يبي يوديني "
كانت هيام شبه نايمه على ظهرها فالصاله تناظر جوالها وقدامها مكسرات وحب وشاهي لابسه بيجامه حرير اسود ومخططه بخطوط دقيقه مره لونها ابيض ونفس الون محدده فيه الياقه والكمام ولافه شعرها باهمال وفيه خصل طايحه على وجهها شافت ابوها دخل بعربيته ابتسمت له وقالت وهي تمد في كلماتها و تجمع قشر الحب الطايح حولينها بسرعه قبل يجي : هللاا هلللاا بافضل وأجمل واغلى رجل فالدنيا ذي كلها
ارتبك سعود وبلع ريقه بصعوبه كان يمشي ورى نادر وهو يحس ان ارجوله مربطه .. ارتبك من شكلها المغري وصوتها وكلامها حتى لو انه عارف انها ما تقصده ولا درت انه موجود أصلا بس مجرد رويتها و تفكيره ان هذي زوجته يربكه
اشر له نادر يقف في مكانه وراها قال متقصد ان سعود يسمع : الترحيب هذا لي ولا لسعود
قامت هيام وجلست عند ارجول أبواها قالت تمزح معه تبي تشوف ردة فعله : اكيد لك انت سعود بقول له كلام ثاني
ضحك نادر : الا ياقليلة الخاتمه وش بتقولين لسعود
طلعت صوت بفمها يعني لا وبلكاعه قالت : كلام بيني وبينه مايصير تعرفه
...
___________________________________________

البنات كانو يشجعون ورى الخيمه بصوت قصير عشان لا يسمعونهم ثم ينجلدون من فيصل .. وكل وحده تقول من تتوقع بيفوز
بشرى : طبعًا ابوي الي بيفوز
رنا : على ان اخواني موجودين بس اتوقع فصفص بيفوز  الهنوف : ماجد ذابحه الكسل ولا فيصل جايبينه بس تكمالة عدد
رنا : هههههههههههه حرام عليتس والله انه قوي
الهنوف : قوته ماهي شي عند الي معه
مشاعل بطفش : خلاص نبي واحد يفوز ويخلصنا
مهره : لهم عشر دقايق وهم ساحب ومسحوب
مشاعل : صدق طولوا
لفت مهره لوضحى الي كانت بعالم ثاني جالسه على الأرض وماسكه عود صغير ترسم على التراب وسرحانه
ناظرتها شوي بعدها تجاهلتها ولفت تناظر العيال
جلست العنود جنب ساره : تعالوا نسولف اتركوهم عنكم
ما امداها خلصت كلامها الا وقفت منخرشه لما صرخو البنات والعيال مع بعض وسمعت صوت تصفيق وتصفير: من الي فاز
جت بشرى قدامها وهي تصفق وتضحك فرحانه : ابوووي ابووووي
رنا : والله كنت متوقعه
ريم : وش الجائزة ؟
ساره : مافيه جائزه فيه عقاب للفريق الخاسر
ريم بعدم تصديق : الله اكبر كل هالحماس وبدون جائزه صدق فاضين
رنا : وأنتي وش حارك
بشرى : مهما كان شعور انك فايز هذا لحاله يكفي
قالت رنا وهي تفك نقابها وترجع تربطه : فايز ولا محمد ها ها هااا
بشرى : هه هه هه خايسه
قالت رند الواقفه وتناظرهم بقرف : لو بابا معهم كان فاز عليهم
ردت العنود وهي مالها خلقها : الا بابا متى يجي ياخذكم
لفت عليها رند بعصبيه : مطولين هنا و رافعين ضغطتس وفي بيت جديي يعني مالتس دخلل .. قامت وراحت لامها عند العيال ولا اهتمت لهم
العنود تفاجاء من انفجارها فيها : شفيه!! هذي راحت للعيال بدون تغطى حتى
ريم : امسكوها بسرعه
مهره : بزر هي نمسكها..!!
العنود : مهره روحي بالله جيبيها والله لا يتوطى فيصل في بطنها
مهره : ياحليلتس على بالتس بقدر عليها خليها تروح عشان يأدبها فيصل تستأهل
ريم وقفت وشافت رند الي فتحت باب سيارة أبو مطلق وركبت لانها الأقرب لها قالت : لا أشوى ركبت السياره
بشرى بضيق : بنات مره ثانيه خفوا عليها وعطوها على جوها حرام ترى توها مراهقه وش تبونها تسوي اكيد تفكيرها غير واهتماماتها غير يبي لها معامله خاصه
العنود : والله عاد هي ترفع الضغط
رنا بعدم اهتمام : والله كلنا قد مرينا سن المراهقه ولا سوينا مثلها
ريم : عمي مخليها على كيفها لو تقول بنزل العبايه ولا راح اتغطى قال على راحتس عاد خالتي انتو تشوفونها كيف تعاملها احيانا تشد وأحيان لا ما ألوم رند تتمرد صراحه
بشرى تنهي الكلام : المهم ماعلينا من طريقة تربيتها اهم شي تجاهلوها او جاملوها مب تدقونها بالكلام
مشاعل : بنات ابي ابدل ملابسي وين اروح؟
الهنوف : خليه لين يجي اليل عشان محد يشوفتس لانه مثل ماتشوفين مافيه الا الخيمه وفيها فتحات يعني لو يمر احد بالغلط شافتس
العنود : صح لاجاء اليل بنبدل كلنا
مشاعل : ماقدر أتحمل لليل قرفانه من نفسي لازم ابدل
رنا : اركبي سيارتكم وبدلي
وقفت مشاعل : هذا الي بيصير .. لفت لوضحى .. وضوح تعالي راقبي المكان حولي
وضحى سرحانه :.............
هزتها مشاعل عشان تنتبه رفعت راسها لها تنتظرها ببرود
مشاعل : اوه هههههههههه هذي في عالم ثاني
وضحى: وش تبين ..!
مشاعل : اقولتس تعالي راقبي المكان حولي ببدل ملابسي لاجاء احد علميني
وضحى : مالي خلق خلي ساره تروح معتس
قامت ساره وراحت معها
جت مهره ومسكت يد وضحى توقفها : تعالي ابيتس
سحبت يدها : يختي وش تبين خليني في حالي
مهره : ضروري قومي معي لا ترديني
وقفت بطفش وهي كارهه نفسها نفضت عبايتها من الغبار ولحقتها للخيمه
.....
___________________________________________