" انت حبك كنه الحكم السعودي ثبته عبدالعزيز ولا تغير ".

الجزء السابع :

بعد ما جاء سعود وأخذ عبدالله  بدون حتى يسال وش فيه؟ وكيف؟ وليه؟ شافه وعلى طول قال لها تدخل وتقفل الباب زين وخذى عبدالله لسياره وطار فيه المستشفى
كانت في غرفتها منهارة تبكي : يالله يارب انا وش طلعني؟ من غبائي مصدقه انه منجد فيه حرامي يراقبني ويدخل البيت بعد ماجلست لحالي يارب عبدالله مايقولهم انه انا يارب
" مسحت دموعها ولمت شعرها "  اففففف كيف أذاكر الحين عقلي مشوش ياربي ساعدني
قامت تحاول ماتفكر غير باختبارها فتحت كتابها تبي تذاكر اي شي

___________________________________________

ركب أبو مطلق وأم مطلق وبدريه وعيال بتال السياره ورجعوا البيت نزل أبو مطلق بخطواته الهاديه التي أثقلها الكِيبر للبوابه فتحها بهدوء و خلها مفتوحه بعد ما ثبتها
دخل السياره داخل الحوش وقف ونزلوا كلهم راحوا أبو مطلق وأم مطلق ينامون لان هذا وقت نومهم اما بدريه راحت تنوم محمد ووضحى مثل عادتها بعد ماراحت مهره الي كانت تعتني فيهم ، بعد مانامو غطتهم وطفت النور وطلعت فوق شافت نور غرفة بشرى شغال توجهة لها تطمن عليها وتشوف وضعها دقت الباب ودخلت على طول ما انتظرتها ترد عليها
كانت منسدحه على بطنها وفاتحه الكتاب قدامها ، جلست بخرعه ولفت بتشوف من فتح الباب شافت امها حطت يدها على قلبها وغمضت عيونها وهي تأخذ نفس وتزفره تحاول تهدي نفسها : أووه يمه هذي أنتي
بدريه راحت لها بسرعه : بسم الله عليتس شفيتس خفتي؟
بشرى : مادريت أنكم رجعتوا انخرشت ان الباب انفتح والبيت مافيه احد
بدريه تتفحص ملامح وجهها الباكيه : وش مبكيتس ؟
بشرى بتلعثم : ااء انا! لا مابكيت الا عشان الاختبار ايه عشان الاختبار مرره صعب ماقدرت افهمه
بدريه : اكيييد؟
بشرى : ايه يمه اكيد يعني وش يبكيني غيره ، وين ابوي اليوم كله ماشفته؟
بدريه : راح لسعود
بشرى حست قلبها وقف من الخوف امداهم عرفوا السالفه؟ بس قالت : سعود! ليش هو جاء من البر ؟
بدريه بضيق : ايه يقول ان عبدالله ضربت رأسه حديدة وجو عشانه الله يشفيه ويجعلها تخفيف ذنوب
بشرى بتوجس : وين جته الحديده
بدريه : اتوقع انه قال عند الوايت
بشرى ارتاحت وحست انها ممنونة لسعود و لعبدالله : اها الحمدلله
بدريه : الحمدلله !!
بشرى انصدمت انها فكرت بصوت طويل قالت تصرف : على سلامته طيب وش يبي من ابوي
بدريه : يبونه يأخذهم من المستشفى لانهم متعطلين
بشرى كانت بتسأل وش صار على عبدالله بس حست انها زودتها طلعت بدريه بعدها قامت بشرى طفت النور واندست في فراشها ونامت

___________________________________________

وصل سالم وقاله سعود السالفه بس ما قال وين مكان الحادثة خذو عبدالله في طائرة الإخلاء الطبي ورافق معه سالم ، وسعود لحقهم على السياره طبعًا عبدالله كان مبنج كل اللي صار مايدري عنه وصلوا المستشفى كان في نفس المدينه الي تدرس فيها بشرى
دخلوه غرفة الأشعة عشان يتأكدون اذا محتاج عمليه او لا
بس طلع نفس تشخيص الدكتور الأول  فعلا محتاج العملية وبأسرع وقت اخذو فحوصات منه عشان يجهزونه للعمليه بعد ما جهزوا وخلصوا باقي بس توقيع من المرافق طلع الدكتور لسالم لان سعود مابعد وصل : اخوي محتاجين توقيعك لنبدأ العمليه
سالم بقلق : كم نسبت نجاحها يادكتور ؟
الدكتور : نسبة نجاحها خمسين بالميه كل هذا يرجع لله عزوجل ولاستجابة جسم المريض للحقن والادويه العملية معقده شوي وتعرف العين حساسه
سالم : كم مدتها
الدكتور : بالعاده ثلاث ساعات وبرضوه يرجع لاستجابة جسم المريض
سالم : الله يشفيه تكفى يادكتور تراه بأمانتك سو له كل الي تقدر عليه
الدكتور : اكيد بإمانتنا حنا راح نعمل اللي علينا سوا مع مريضكم او مع غيره
سالم : الله يقويكم ويجعلها في موازين حسناتكم
وقع سالم وراح الدكتور