" انت حبك كنه الحكم السعودي ثبته عبدالعزيز ولا تغير ".

الجزء الثامن :

شوي الا سمع صوت صراخ وإزعاج رفع رأسه شاف وحده واضح انها صغيره فالعمر تصرخ وتبكي وتكلم الدكتور تقول : ابوي تكفى يادكتور سو له شي مالي احد غيره ....
قام سعود وتوجه جهتهم بسرعه بيشوف وش السالفه البنت مامعها احد وتتمسك فالدكتور وتصيح : دخلوه عندكم ووعد اجيب الفلوس اول مايدخل ، اخذ بطاقة ابوي او مفتاح السياره ارهن اي شي عندك مافيه وقت الله يخليك سو شي
الدكتور : مايصير يبت حنا حنتحمل مسؤوليه ماينفعش ان حنا اندخلوه بدون دفع المبلغ المستحق للعلاق خاصتا ان المبلغ دا كبير وأنتي حتا مقدم مادفعتيهاش الحئي وديه مستشفى حكومي مستحيل اندخلوا بدون مقدم
سمع سعود الحوار الي بينها وبين الدكتور تقدم لدكتور : كم المبلغ وانا بدفعه
الدكتور : مبلغ مقدم 800 ريال سعودي فقط لفتح الملف والكشف ومش راضيه تدفع
البنت : أقولك ماجبت صرافتي ومافيه وقت ارجع أجيبها او انقل ابوي مستشفى حكومي !!
مد سعود له الفلوس وقال : خذ ودخلوا المريض بسرعه
الدكتور : مالي خص بالفلوس رح ادفعها عند الاستئبال
سعود عصب : ياخي طيب دخلوا المريض وانا بروح ادفع ، لذا الدرجه مستهين بحياة الناس !!!
لف للبنت : وين الوالد ؟
البنت : في غرفة الكشف بس مو راضين يسوون له شي
سعود قال لدكتور : روح للمريض وانا بروح ادفع للستقبال ما حنا بسارقينكم
الدكتور : حاضر بروح اكشف على المريض ومش حاعطيكم الفحص والعلاق الا بعد مايعطوني خبر بالدفع هذي امانه يا ابني
سعود : زين زين انت روح ذلحين
راح سعود ودفع المبلغ المطلوب بعد مالقى محاضره ان هذي اروح ماهي لعبه وأنهم متساهلين فيها ومن هالمكلام.. بقى معه عشره ريال قال : زين ان هذي بقت بشتريبها من البقالة شي يسد جوعي
وصل لباب المستشفى متوجه للبقالة سمع صوت البنت الي قبل شوي تناديه : يالاخو
لف عليها مستغرب ليه تناديه  : امريني الوالد فيه شي ؟
البنت : لا ابوي الحمدلله دخلوه ان شاء الله بيصير احسن
سعود بفضول : اعذريني على السؤال بس وش فيه يعني وش مرضه بالضبط
البنت : ابوي مريض بالقلب وتجيه حالات كتمه لازم يأخذ أكسجين ، جته الكتمه اليوم وفجاءة خلصت أسطوانة الأكسجين الي عندنا بالبيت وجينا لأقرب مستشفى وكان للأسف مستشفى خاص مارضوا يسوون له شي الباقي عاد تعرفه انت من الخبصه نسيت كل شي حتى جوالي
سعود ماحب يكثر كلام معها : الحمدلله على سلامته
البنت بامتنان : مرره شكرا على الي سويته انا اشوف انك انقذت حياة ابوي ومهما سويت مستحيل اجازيك او اوفيك حقك
سعود بإحراج : لا شدعوه ماسويت شي وهذا واجبنا وأي شخص بمكاني بيسوي مثلي
البنت : مايسوي كذا الا الكفو على العموم عطني رقم حسابك عشان احولك الفلوس
جاء بيتكلم ويعترض قاطعته :  والله العظيم ماتردني
سعود بسرعه : لا ينبت الحلال مابي منتس شي انا ادور الي عند الله سبحانه ورأس مالها ثمان ميه ولا ابيتس تردينها
البنت : عارفه انك ماتبي الا الأجر بس انا حلفت ولا برتاح الا لين اعطيك حقك هذا سلف وانا الحين برده من حقك تاخذه فـ لو سمحت لاتردني
قال سعود مع ان البنت واضح عليها بنت عز ونعمه : دامه سلف خليه عندتس لين احتاجه مشي امورتس فيه ماني مستعجل عليه
البنت : طيب عطني رقمك عشان أتواصل معك وإذا قام ابوي بالسلامة وعرف بالسالفه بيزعل اذا ماقدر يتواصل معك
سعود انحرج مايدري يعطيها او لا يخاف احد من الي حوله يفهمه غلط ، قال خل اعطيها قبل يجي احد ولا يجي سالم يشوفني واقف معها  : طيب سجلي رقمي عندتس
قال في نفسه : يالله احس أني قليل أدب
طلعت ورقة واضح انها حقت مستشفى وطلعت قلم كحل من شنطتها : ايوه كم؟
سعود : صفر خمسه خمسه
ردة وراه وهي تكتب : صفر خمسه خمسه
سعود : صفر تسعه
البنت : ايوه
بعد ما أعطاها وخلص قالت : إيش اسمك عشان أسجله
سعود : سعود محمد
قالت وهي منزله رأسها تسجل الاسم : ونعم عاشت الأسامي
قال وهو ماشي : معليتس زود عاشت ايامتس
راح بس ماراح البقالة حس انه شبع معاد يبي شي راح يمشي وهو يفكر فيها البنت صح مستترة بس كشخه بمعنى الكلمة حتى عيونها ماقدر يشوفها ما شاف غير يدها البيضاء وأظافرها الطويلة المرتبة عرف من كلامها لدكتور انها وحيدة ابوها وأنها مالها احد غيره الله يكون بعونها
بعد نص ساعه رجع دخل شافها جالسه على كراسي الانتظار كانت تهز رجلها بتوتر كأنها خايفه جلس هو الثاني مقابلها بس بعيد لان السيب عريض مره
طلع جواله وجلس يطقطق فيه يبي يشغل نفسه عنها رفع عيونه لها لما حس انها وقفت وراحت جهة موظف الاستقبال تمشي وتوقف كأنها متردده بس فالأخير راحت كانت تتكلم وتأشر على أذنها كأنها تكّلم عرف انها تبي تتصل من جوال الموظف او الثابت حق المستشفى مايدري بس واضح انها تبي تتصل رجعت تمشي واضح معصبه لانه رفض ورمت نفسها على الكرسي ، تمنى انها تجي تطلبه جواله عشان يعطيها بس ماجت
مرت عشر دقايق وهو ينتظرها تجيه وكأنه كان حاس وقفت على رأسه قالت وصوتها رايح من التوتر وواضح فيها بكيه : سعود
وقف قلبه لما سمع اسمه منها كأنها تقول مافيه احد غيرك هنا يساعدني كأنها تدور الأمان عنده مايلومها بنت لحالها مامعها احد جالسه في اسياب المستشفى وأبوها داخل ماتدري وش تسوي فيه وفوق هذا مامعها جوال ولا فلوس اكيد بتخاف وتتوتر وتبكي بعد رفع رأسه لها : هلا
قالت بنفس النبره : ابي جوال اتصل فيه على السواق
مد جواله لها بسرعه : أخذي جوالي وان بغيتي لا ترجعينه
قالت : مو هنا المشكلة
سعود استغرب : وش المشكله
البنت بكت : ماعرف رقم احد واصلا مافيه احد بيجي الا السواق ورقمه ما اعرفه
سعود اختبص لما بكت مايدري وش يسوي : طيب ليه تبكين وش تبين انا بجيبه لتس
البنت : ابي اروح معه اجيب جوالي والصرافة من البيت
سعود ابتلش : تبين اطلب لتس سواق ؟
البنت وهي تمسح دموعها : لا اخاف اروح لحالي مع سواقين ما اعرفهم
سعود قال بتردد بما ان كل الدروب مسكره والخيارات الي قالها لها رفضتها بس باقي ذا الخيَار:  اوصلتس؟
حس انها ضحكت من تغير صوتها صح وثقة فيه بس مو لذا الدرجه تركب معه  : لا مافيه الا حل واحد اكتب في جوالك شركات الراسي
عرف الشركات لانها مشهوره في صنع الأثاث واغلب محلات الأثاث لهم : طيب ، في البحث؟
البنت : اي مكان بيطلع لك
بعد ماكتب قال : ايوه طلع
البنت بسرعه : فيه رقم طلع صح ؟ موجود تحت عندك
سعود : مكتوب لطلب تواصلوا معنا على هذا الرقم
البنت : دق عليه بسرعه
سعود : بتشترين اثاث !!
ضحكت : لا لا هذي شركتنا
انصدم وحس بدوخه حاول مايوضح صدمته عشان ماتدري انه طفران وهو جالس يرز نفسه من اليوم عندها قال وهو يحاول يضبط نفسه : يمكن مايردون علي عشان الرقم غريب
البنت : معليك عطني الجوال
عطاها الجوال وجلس يحس انه بيطيح : افف أتكلم من اليوم مع مليونيرة لا ودافع ثمان مية ريال وأقول من زود الإيمان مابي الا الي عند الله هههه استغفرالله والله الفشله.
شافها تكلم بعد ما خلصت جت ومدت له الجوال : مشكور
سعود : ولو واجبنا
راحت تجلس شوي الا دق جواله برقم غريب رد عليه وهو متاكد ان المتصل يبي البنت مايبيه : الاستاذة هيام ؟
اخيرا عرف اسمها سكت مارد مشى جهتها كانت متكيه بيديها على ركبها "كانها تدعي" وحاطه ووجهها بين يديها وصل لها قال مثل ما قال المتصل بيشوف ردة فعلها: الاستاذة هيام
رفعت رأسها بصدمه والغطاء مرفوع عن عيونها "كانت منزله رأسها لانها رافعه الغطاء عن عيونها وماتبي احد يشوفها"  : من ؟
قال سعود وهو يبتسم بألم في قلبه حس ان رموشها سِهام صابته في مقتل : فيه واحد على الجوال يبي الاستاذة هيام اذا هي أنتي هاك "ومد الجوال لها"
حطت يدها على المكان الي يناظر فيه من وجهها انصدمت انها نست تغطي عيونها سحبت الغطاء عليها شافته ماد الجوال جهتها خذته منه وهي باقي جالسه : الو ، هلا احمد ، اي ياليت ، برى الحين ؟ ، اك بطلع له . سكرت ومدت الجوال له بدون تطالع فيه وخذت شنطتها وطلعت
صح طلعت بس سعود ظل واقف يناظر مكانها والموقف باقي يتكرر في رأسه يحس انه قراء كلام كثييير في عيونها آلم وحده ضيق وخوف
رغم انها بدون كحل وزينه وفوق هذا متورمه من البكي والإرهاق الا انها فتنه حط يده على قلبه يحاول يهديه يحس انه يرفرف من كثر ماهو يدق يشك انه لولا ظلوعه كان طار : سبحان من خلق ذيك العيون
هز رأسه وتعوذ من الشيطان : انا شفيني خفيف كذا ومالقيت احب الا مليونيره لو اموت ماوصلت لها
جلس في مكانها وطلع مسباحه وصار يومي به غنى بصوت قصير يبي يسلي نفسه والمكان فاضي اساسا
الله أكبر كيف يجرحـن العيـون
كيف مايبرى صويب العين أبـد
أحسب إن الرَّمش لا سلهم حنون
وأثر رمش العين ماياوي لأحـد
يوم روَّح لي نظـر عينـه بهـون
فزِّ لـه قلبـي وصفَّـق وأرتعـد