الهَروت

الهَروت_24

#الكاتبه_روان_الاسدي
#البارت_الرابع_والعشرون

بعيني كُل الناس غُربة
وأنتَ من ظلّك أعرفك
يَا حَبيبي كُلشي بالدنيا فراغ
بلايه چفّك ..

واخيرا اجه اليوم اللي رح اشوف بي اختي وروحي من الدنيا ،وحتى افرّغ نفسي الها ،لازم اسوي كلشي من وكت ،گعدت ورتبت غرفتي ومشطت شعري وظفرته صفح وگعدت يوسف وياي سبحته ورتبته ونزلنا جوا نصبح عليهم

حنين-صباااحح الخيررر،يوسف گول صباح الخير

أشر بأيده على باقر وركض لحضنه ،باوعله وهو يضحك

يوسف-سباح الخيل

باقر-صباح النور لك الخايس مشتاقلك

مريم-صبي ريوگ وكنسي الصاله ،اكوي الملابس اللي بالسله وغسلي الحمام ،واذا كملتي تعاي نحتي كعب رجلي طالعلي طرور من جوا

حنين-حاضر خاله

باقر-عود ليش يمه يعني انتي ماعندج رجلين وتسوين كل هذن

حمد-لاتتدخل بالنسوان صير زلمه

باقر-بويه انا زلمه مايحتاج تعلمني ،وامانة عمي جاسم من اخاف عليها وارعيها اكون اتدخل بالنسوان ؟

حنين-عادي عمو ،انا متعوده ميخالف

باقر-بس تتعبين كوليلي انا اجي اساعدج

حمد-اي بعد رخص بروحك صرت بطول النخله وبعدك تتراكض ورا النسوان

مريم-يمعود بس خلي يفكنا من ذاك الشليف

باقر-منو افكج منه

حمد-رجعنا لسالفة يوسف

مريم-من تتعبون ٩ اشهر وتطلع بعدين هيج خلقه عود بعدين احجو

باقر-تعب ٩ اشهر مو شرط بالشكل ، انا متأكد يوسف بيوم رح يكون قدوه النا

حمد-اي قدوه للمنغوليين البقيه

الكل گام يضحك عدا باقر وانا ،ننتبه ليوسف وهو يباوعلهم ومو فاهم شي ،يسحب بقميص باقر ويلاعبه ومايدري عن شنو يحجون،طفل بريء كل همّه حضن دافي وروح تحويه صار محطّ للسخريه والانتقاد ،ومو من أيّ احد ... من اهله نفسهم

بعد ما ضغطت على نفسي وحاولت اكمل بسرعه ،خلصت شغل وجبت مي دافي خاطر انحت رجل مريم بالصخره وبهالاثناء اجت شكران لأن هي كل مره تجي من وكت وبنفس الوقت كعدت نهله

نهله-صباح الخير

حنين-صار الظهر يبنيات

شكران-فدوه للبشاشه اللي بوجهج ،هنياله اللي يصبح بيج

حنين-هنياله اللي يسمع كلامج بعد هالتعب

مريم-شدعوه عيني شتعبتي هسه انتي ،ديلا جيبي الطشت خل احط رجلي شبيج حاطته يمج واواكفه