my strong princess اميرتي القوية( قصة كاملة بالدارجة المغربية)

بارت 4

👑الجزء 7👑

خرجت من ديك الداار وتعهدت على راسي عمرني نرجع ليها وااخا يوقع لي وقع ....بقيت غادا تاوصلت وسط المدينة بقيت مندور ورجليها حفيانين مالابساش تا فراجلي وغير ديك الكسيوة لي لابسة المعري كتر من المغطي وصلت حدا واحد الحي شعبي تما وكانت نايضا الروينة هالي كيبيع الخضرة هالي كيبرح والشماكرية على الجهد بديت كيتنادم معايا الحال ووليت باغا نرجع فحاالي ولكن مقديتتش بقيت غادا تاحسيت براسي تجريت من يدي ..وقفت مقادا كنشوف شكون لي جرني ...كتبان لي واحد البنت شعرها حمر ومدايرا مكياج تقيل ولابساا وااحد شومييز دونوي ...
وهي تنطق : تااهادي مععاانا الشاف
أنا بقيت غير كنشوف فيها مصدومة تاجرني هاداك خونا ماكانت باينا فيه لا بوليسي لا تاحاجة كان لابس عادي فحال اي واحد ...جرني من يدي لاحني فواحد السطافيط وخبط علينا الباب ...
طلعت عيني كنشوف شي مناضر لاحول ...الدريات كولهوم ضاربين لي شوميز دونوي والمكياج فاااقع والعكرر فالحمر وجالسة من جنب واحد ختنا غليضة ضاربة لبيجامة دالنمر ومكحلا عينيها فحال الدب وكتمضغ فالمسكة.... وهي تقولي :ايييوا باقابنت ولا متقوبة تانتي
أنا : لارد
هي : هاانيا حرفتنا وحدة غي دوي ماتحشميش من لباسك بااين العربوون
مولات الشعر احمر : ولا الباطرونة تييرااه غيير جبتها معااناا رآه الى بقات فدااك الدرب مع وريقة والله تايغتاصب مها بقات فيا ...
أنا : شكوناهوا وريقة
مولات الشعر احمر: بلا ماتسوليني المهيم كون بقيتي تم كان غيغتاصب مووك
هي : ااااه هاكاك هي ماغاطوليش معانا فالغباار
أنا : شناهوا الغبااار
مولات الشعر احمر : الحبس
أنا سمعت الحبس تشللت بديت كنتغبن وكنبكي : هيء هيء لا أنا مبغيتيش نمشي لحبس انااا مدرت واالو ...هيء هيء
اباطرونة : صافي غير سكتي دابا تولفي لمهيم ..أنا رجاء عيطيليا الباطرونة ...
وهاديك الصهبة جليلة
هظيت راسي بايجاب وانا كنبكي : انااا مااابغييتش ندخل للحبس انااا باقا صغيرة ...هيء هيء
جليلة : مسحي عليا دوك الدموع ....شحال عندك
بديت كنمسح ف دموعي : عندي 16عام 
جليلة : هاد الزيين كامل وسطاعش رعام...
ضحكت ضحكة سخرية وسط بكايا : حياتي ضاعت اخاالتي..وهاد الزين ماعندو باش ينفعني
الباطرونة : علاه مالك ابنيتي عاودي لينا حناراه وااخا خاسرات ومنصلاحوش تكونو قدوة لك ولاييني عاودي لينا ابنيتي ونشوف لاقدينا نعاونوك فشيحاجة ....

أنا : ايييوا شغانقوليكم ( عاوداتليهم كلشي بالتفصيل الممل ) هادي هي حكايتي لي مافيها مايتعاود ولا يتسمع

#الكاتبة
جرأتها الباطرونة رجاء عنقاتها وبدأت كطبطب وكتدوز ليها على شعرها بحنية : الله يابنيتي شدازعلك ...الله يفك محاينك على خير ...
نادين : امممين اخاالتي ..والله يراجع بيكم ....
جليلة : عرفتي شنو أنا انشوفلك مع لآلة  ولاء ....تشوف ليك شي خدمة ولا شي حاجة تعاونك بيها...

👑الجزء 8👑

.

......تتمة

جلست حداهم وبقينا مجمعين تا حبست  السطافيط ...هو يجي داك خونا بدا كينزل فينا وحدة بوحدة... داونا لعند واحد الراجل تما بدا كيغوت علينا وانا مافاهمة تاوزة غير كنشوف فيهم ....
الراجل : دايرريين لييا الدعارة فالمدينة ...تفو على جنووس
جليلة: واا الشريف حنا غير خدامميين على مخنا....أما حسن نولي قحبة ونتخلص عليها ولا يشبعو فيا اغتصاب فالشاريع فابور ...

الرجل : ديييو عليا الزبل للبنيقة ...
جاو واحد الجوج خرين فرقونا .
.

......أنا داوني لواحد البلاصة دايرة فحال البيت بباب ديال الحديد مشبك وآخرين داوهم لبلاصة خرا ....كانو تماك واحد جوج لابسين جلالب ديال النمر وواحد التلاتة لابسين بيجامات فالالوان ..ووحدة كانت جالسة بعيدة عليهم لابسا واحد البيجامة مزيرة ومزعرا شعرها مشنتف من القدام
وداربا ايلاينر مجهد وحجبانها مطراسيين وعاد فمها لي كانت داايرا لييه عكر gرونا
وكتلوك فالمسكة ....دخلاتني عندهم وانا كنشوف فيهم بعينيا شاداني القفقافة من صبعي الصغير دخلت ومشيت جلست فالارض بعيدة منهم كاملين وجمعت رجيلاتي عندي ..تا كاتبات ليا ديك الزعرة جايا لعندي وشادا كارو فيديها ....
هي : الزين شتك جلستي
(لارد ) ....شنو اتبقاي منخلاني ....جمعاتها معايا بصماكة شفت فيها جن كيعجن ...عينيا غرغرو بالدموع وانا شادا من حنكي وكنشوف فيها بغضب : شنو درتليك ...علاش صمكتيني ...
هي : كترادي معا لالاك عيشة ..دوي لمك ...
شداتني من فكي وبقات عليا بالصمامك وآخرين لور كيضحكوو .....تابدا كيسيل دم من فمي .....
عيشة : صعرتيي لا ...وااا داابا بردييها ودوزي ضربي جفاف علا قلبك ولا نخصر لمك داك الوجيه ...
...شديت من حنكي ودماغي كيدور فيه الف سؤال وسؤال ( علاش ؟ علاش ؟شنو درت باش يوقعلي هادشي كولو ؟؟ واش غلطت فشيحاجة ) ....
نضت من بلاصتي مكنشوف قدامي الدموع عاميين لي عينيا ...وتوجهت للطواليط ...كانت ريحتهااا خايبة بزااف فيها جوج طواليطات وقدامها جوج رشاشات ديال الدوش مغطيين بخامية  وفيها لافابو واحد شكلو كيجيب التقية قدامو واحد مراية مهرسة . 
مشيت وقفت قدام ديك المرايا وكنتأسف على الحالة لي وصلت ليها وامنضر ديال حنكي لي تنفخ وولا حمر ...بديت كنغسلو بالما كنبرد على راسي وغسلت وجهي .....

.....يتبع