بغداد١٩٧٩
كاعد بباب الامام ....واكف منتظرها ....قبل يومين شفتها ...عرفت جايه سياحة ويه اهلها امها ومريه جبيره مدري بيبيتها مدري خالتها لان تشبه امها من سوريا من لهجتهم مبينه ...اخذت كلبي ....عيني على الباب اليطلع منها النسوان ....افرك بايدي وخايف ارمش ومااشوفها من تطلع .....لحد ماشفتها طلعت ...اخذت نفس ....تحاجي امها مبين مدري مرية وياها ...واكو وحده بيتها قريب من الامام ...هي التجي وياهم وتشوفهم بغداد...صرت امشي وراهم ...فاتو للسوك ...وانا صافن عليها ...وراحو لحدائق ...لفيت وياهم اكثر اماكن بغداد...لحد مارجعو لبيت المره ....هاي جان الروتين خلال هاليومين كل يوم اول شي يروحون للامام ...وتالي يطلعون لغير مكان لحد المغرب يلا يردون للبيت...
مثل هاليومين لحد مافاتت واطمنت...رديت للبيت ...استقبلتني امي ...
ام جميل _هلا يمه ..وينك ابوك ضايج حيل منك...
بست راسها ...وانا اعرف حقه..صار جم يوم هامل شغلنا ...ولاحك السوريه الماعرفت اسمها ...
جميل _حقه يمه ....ادري هامل شغلي ...هسه اروح اراضيه ....فتت ودخلت للغرفة ...شفت يسبح وهو كاعد عالسجاده ..تقربت وكعدت بصفه ...جريت ايده ...وبستها ..تقبل الله يبو جميل ...
باوعلي وهو مثكل خاطره .
ابو جميل_منا ومنكم وليدي ...والله يصلح حالك ...
ابتسمت ...
جميل _راح ينصلح ...من تخطبلي الدك لها كليبي...
باوعلي ...وكام لحيله وشال السجاده يصفطه...
طلع ...لحكته وراح كعد عالكرويته البلمطبخ....
ابو جميل_سمعي ام جميل ...انا زعلان عليه ...طلع الافندي يحب ويتمعشك.....
خجلت من امي ...ابوي عادي حاسبه صاحبي مو ابوي ...بس امي استحي منها ...
هلهلت امي
ام جميل _يو المنى اشوف حرمته ووليدانه...
ابو جميل_منو هي وليدي نعرفها لا...شسمها
حكيت راسي ...ماادري شون اكللهم...
جميل _مااعرف اسمها...
باوعولي باستغراب ...كملت كلامي ...
جميل _هي مو منا ...شفتتها بباب الامام كاظم ..
ام جميل _شون يعني مو منا يمه ..
جميل _هي بنيه سورية ...
اثنينهم صفنو...
ابو جميل _جا شدراك يوليدي خيرها من شرها ...اخلاقها اهلها....
جميل _بويه صار جم يوم لاحكها ...ماشفت باخلاقها ....وبعدين انا اتزوجها هي مو اهلها...
كام ابوي لحيله وهو ضايج...
ابو جميل _هذا مو حجي وليدي ...الزواج مو بس ارتباط بينك وبين البنت ...هذا ارتباط بين عايلتين ...
