فتت اتمددت ...شويه وكمت للمطبخ جنت مطلعة دجاج ...كطعت شوية بطاطا وبيتنجان وطماطه وبصل سويتها تبسي وكطعت الدجاج قطع حتى بسرعة ينشوي وخليتها بالفرن مال الطباخ ...ونكعت التمن ...ورجعت كعدت بصفه وهو بعده مشغول ...كمت سويتله جاي ...وجبتله...
مقدام _اووف اجا بوكته اخذها مني وجر ايدي باسها عاشت ايدج حبيبي...
سوريا _بالعافيه....
كعد يكمل شغله ويشرب الجاي ...وراها كمت اسوي التمن .... اليوم مر واني بالي يم الفلوس النطاها لامي
وتكررت الحاله كل شهرين تجي ...واشوفه ينطيها فلوس ...
مرت الايام والسنين ...طبعا عقد عليه محكمة ...ولان عمري جان صغير بس بفلوس دبرها ....
٢٠٠٤
مرت الايام والشهور والسنين وهاي اني صارلي متزوجة مقدام ٩سنين ...وصارو عندي رنيم والتوم روان ورويم ...ولحد هاللحظة مقدام ماكايل لعائلته عن زواجنا
وامي العرفت الفلوس التاخذها ابتزاز لمقدام حتى ماتكول لعائلته ...لو غيره جان طلكني ولايضل واحد يبتزه ...بس تاكدت هو من صدك حبني ويموت عالبنات وهو اليختار اساميهم ...يكول هوايه احب الاسامي العربيه الفصحى ...متعلق برنيم كولش ...ودائما يحجيلهم عن خواتهم واخوانهم ...ومن رنيم تساله
رنيم _بابا خلي التقي بيهم ...يصفن ويسكت ...
جانت عطلة عالسنةالجديدة بس اني قبل السنه ابلش ادرسهم ....وخصوصا السنه الفاتت مرت هيج ونجحوهم لان جانت وكت حرب العراق ...وسقوط النظام السابق ...الحمدلله منطقتنا جانت طائفة وحدة ماصارت مشاكل بيها ....وبيت خوالي واهلي وكت الحرب ضلو يمنا ...ومقدام يخابر عالتلفون الارضي ...ويطمن علينا ....بوكتها حزت بداخلي مجان يكدر يجي لان اني ضليت الزوجة الي بالظلام وبقى يم زوجته الاولى الي هي زوجته كدام العالم وكتها تعاركت وياهم ....وتعاركت ويه امي ...ماادري شلون بقت ساكتة ومامدت ايدها ولاردت ...الحمدلله كضت هالايام وكملنا حياتنا...وخوالي واهلي باعو بيوتهم وراحو اشترو بيوت بالاقليم ...لان خوالي جانو بجيش النظام السابق ...فباعو كل شي وراحو هناك ائمن الهم وخلصت من امي ولو كل شهرين تجي على مود راتبها قبل لايرجع مقدام لعائلته جتي مقبلت وتعاركت وياها وطردتها مقدام خاف من تهديدها بس اني مهمني وكلت اذا انطيتها راح اعوفك واخذ بناتي ...وعرفت انطاها لان محفظته جانت بيها المبلغ الجان ينطيها الها بس هسه ماكو من رجع النار صعد لراسي لهالدرجوة خايف لاينكشف زواجنا تعاركت وياه وضربني راشدي لاول مره
سوريا _تضربني مقدام ...حقك ...لان اني اضل البنيه الباعوها الك بارخيص ...وراح اضل رخيصه على مود هيج ماتقبل تعلن زواجنا ....معقولة هذا حبك الي .... تندم شكد اعتذر ماحجيت كلمة ...
ثاني يوم بدون ماحجي ودع البنات وباسني براسي درت وجهي منه ورجع لعائلته . لعائلته الحقيقة......اندك الباب ...رنيم جانت بالحديقة هي الركضت وفتحت الباب شفت مريه منقبه ولابسه عبايه ..
