ابدتِ بأطراف البنان مهابتي

البارت الخامس

لكن مُهيب غير مهُيب أخذ منه الصلابة وأخذ منه المهابة والأكثر؟ هو ولد حامد وهل في شي بعد الولد إلا ولده ؟ .

"في فوج القوات الساعة ٢:٣٠ الظهر"
إجتمع المقدم نصير بالفريق كله لمهمة عمل جاتهم بوقت عصيب جدا ، وزع عليهم المهام و شرح لهم أيش اللي بيسوونه وبأمارة ماخذها من اللي أكبر منه .
المقدم بصوت جهوري : أعرف انت وياه إني ما أخترت ولا عطيت إلا وأنا عارف لمين ، و ما أسمح لكم تخيبون ظني ولا تلعبون بغير أدواركم ، أنا المرجع وأنا الإشارة في حالة عدم تواجدي عندكم فريق كامل هنا .
المُهيب باستنكار : بس طال عمرك إحنا بغربة !
العميد بقوة : يعني ؟
جا بيتكلم وقاطعه العميد اللي كان داخل بداية الكلام : القيادة عندك يا ملازم .
ارتفعت الاقدام و ثبتت على الأرض واهتزت الأيادي للأمر ..و بالتحية العسكرية غادروا المكان .
المقدم نصير : طال عمرك مُهيب باقي صغير على القيادة و ...
قاطعه العميد بهدوء ينهي النقاش : ما على أمري أمر يا مقدم ، التفت للي بغرفة العمليات : تابعوهم خطوة بخطوه و علموني بكل اللي يصير وطلع .
"بيت الجد ، غرفة الطعام"
مترأس الطاولة كالعادة يمينه كرسي فاضي وراشد جنبه ويساره شمسة و جنبها محمد
ناظر للكرسي الفاضي جنبه وبصوت هادي عكس النيران والأحتراقات بقلبه قال: نادوه .
فز سعود اللي نطق بأبتسامه"أبشر" .. توتر الجو بشكل سريع ومؤلم مع نزول سعود بخيبة مبينه على ملامحه : عيّا .
هز راسه بـ"إيه" واشر لهم ياكلون ، ابتدت تقرب لعيالها واحفادها الغدا بأبتسامه علّها ترضيهم وقالت بفخر : أشبالك في مهام عمل يا سعيد عساك راضي عنهم
هز راسه وبهدوء : راضي يا ضيّ راضي
صفّر بحماس وهو ينزل من الدرج : ريحة الاكل واصله لويين يا ضي سعيد
ضحكت بحب وهي تناظره : إنت ما جابك الا ريحة الأكل؟
حب راس أبوه وهو يضحك : جابني عكاز سعيد وانتي الصادقه ، التفت لأخوانه : ما شاء الله الجماعه موجودين عسى ما شر مين طلّق
ناظروه بحنق لأنه يقول الكلام بدون تفكير للي بيصيبه بعدها ، ما طولت نظراتهم له اتجهت نظراتهم للي نازل من فوق بمنظر اقل ما يقال عنه "هالك" ، تقدم وجلس بجنب ابوه بهدوء تام وانقطعت الأصوات كلها الا من صوت الملاعق و دعاء شمسه بتغيير حال ولدهم و إن يلم الجميع على خير .
قطع الصمت كلمتين من يوسف : البقية وين؟
تكلم الجد وعيونه على اللي جالس جنبه وكأن ماحوله أحد : الوليد في أبها
يوسف : مهيب وين ما صحاني اليوم
الجد يراقب تصرفات ولده لما ذُكر اسم مُهيب : المهيب رايح مهمة عمل وممكن يطول وممكن يرجع..