အကြမ်းဖက်၀တ္ထုထဲကဇာတ်လိုက်မရဲ့အကိုကြီးဖြစ်လာတယ်

Chapter 15

   
ရွှယ်ယန်၏ ကျောပြင်တစ်ခုလုံး အကြောင်းပြချက်မဲ့စွာဖြင့် ထုံထိုင်းသွားမိသည်။
   

သူ့ကို မည်သူတစ်ဦးတစ်ယောက်ကမှ ထိုအကြည့်မျိုးဖြင့် မကြည့်ဖူးပေ။ ထိုအကြည့်က သူ့နှလုံးသားကို ရိုက်ခတ်သွားသည်မှာ ထူးဆန်းသော်လည်း သေစေနိုင်လောက်သည့် ဆွဲဆောင်မှုတစ်မျိုးပင်ဖြစ်သည်။ ရွှယ်ယန် ဝန်မခံချင်သော်လည်း သူ့ရင်ထဲမှ နှလုံးခုန်သံများ မြန်ဆန်လာခဲ့သည်။

သို့သော်လည်း ချက်ချင်းပင် ထိုမျက်ဝန်းများက အံ့အားသင့်မှုနှင့် သံသယများဖြင့်ပြည့်သွားပြီး နူးညံ့သောအပြုံးတစ်ပွင့်က ချက်ချင်းပျောက်ကွယ်သွားသည်။

ရွှယ်ယန်က အခွင့်အရေးရချိန်တွင် ရတနာကိုလာခိုးသည့် သူခိုးနှင့်တူသွားသည် ခဏတာပျော်ရွှင်နေခဲ့ရပြီးသည်နှင့် ပိုင်ရှင်သိသွား၍ ပြန်လည်ချွတ်ခြုံကျသွားသည့်လူတစ်ယောက်ဖြစ်သွားသည်။
   
ရွှယ်ယန် အသိစိတ်ပြန်ဝင်လာချိန်တွင် သူ့ပုံစံက အနည်းငယ်ရယ်စရာကောင်းသည်ဟု ထင်မိသွားသည်။
   
သို့ရာတွင် တစ်ချိန်တည်းမှာပင် ထိုအပြုံးကို လုယက်ချင်စိတ်က မမျှော်လင့်ထားပဲ သူ့နှလုံးသားထဲတွင် ‌ဖြစ်တည်လာသည်။
 
ထိုကဲ့သို့ နူးညံ့ညင်သာသည့်အပြုံးပိုင်ရှင်မျိုးကို ပိုင်ဆိုင်ထားပြီး ကျန်ရှိနေသည့် သူ့ဘဝသက်တမ်းတစ်လျှောက်တွင် သူ့ကို ဤသို့ပြုံးပြနေသည့်လူရှိပါက မည်သို့ဖြစ်နေမည်ကို သိချင်နေမိသည်။

ရွှယ်ယန်၏ကျောပြင်တွင် ယားကျိကျိဖြစ်လာပြန်သည်။

ကျွင်းဟွိင်လန် သူ့ကို အံ့အားသည့်ပုံဖြင့် တစ်ချက်ကြည့်လိုက်မိသည်။ ထို့နောက် ဘေးကိုအကြည့်လွှဲလိုက်ပြီး အနားမှ နန်းတွင်းအပျိုတော်ကို တစ်ခုခုလှမ်းပြောလိုက်သည်။
   
ရွှယ်ယန်ကို မင့်လွမ်နန်းဆောင်ထဲ‌ဦးဆောင်ခေါ်သွားသည့် အပျိုတော်က ရှေ့သို့ခြေလှမ်းအနည်းငယ်လှမ်းပြီးချိန်တွင် သူနောက်မှ မပါလာသည်ကိုတွေ့၍ စိတ်မရှည်စွာပြောလိုက်သည်။

" ဘာလုပ်နေတာလဲ မြန်မြန်လိုက်လာခဲ့လေ..."
   
  ရွှယ်ယန်က အကြည့်ကို ပြန်ရုတ်သိမ်းလိုက်ပြီး ထိုအပျိုတော်ကို လှမ်းကြည့်လိုက်သည်။