အကြမ်းဖက်၀တ္ထုထဲကဇာတ်လိုက်မရဲ့အကိုကြီးဖြစ်လာတယ်

Chapter 139

ကျွင်းဟွိုင်လန်ကို ကျင်းပေါင်လာခေါ်ချိန်တွင် သူက ဆည်ပြုပြင်သည့်နေရာတွင်သာ ရှိနေသေးသည်။ ကျင်းပေါင်က သူ့ကို ဘာကြောင့်လာခေါ်သည်ကို မပြောပြပေ။

" ဒီအစေခံနဲ့ပဲ လိုက်ခဲ့ပါ သခင်ရယ်..."

ကျွင်းဟွိုင်လန်က ဘာမှမမေးတော့ပဲ ကျင်းပေါင်နှင့်အတူ မြင်းလှည်းပေါ်တက်လာသည်။

နေ့လည်ခင်းက အကျဉ်းသားများကို စစ်ဆေးမေးမြန်းပြီးသွားချိန်တွင် ရွှယ်ယန်က အရေးကြီးကိစ္စများ လုပ်စရာရှိသေး၍ ရုံးတော်တွင် နေခဲ့သည်။ ကျွင်းဟွိုင်လန်က သူနှင့်အတူနေခဲ့မည်ဟု ပြောသော်လည်း ရွှယ်ယန်က သူ့ကို အိမ်တော်ကိုပြန်စေပြီး တစ်ရေးတစ်မော အိပ်ခိုင်းခဲ့သည်။

ရွှယ်ယန်က ကျွင်းဟွိုင်လန်၏အသေးအဖွဲ့ကိစ္စလေးများဖြစ်သည့် နေ့စဉ်အချိန်ဇယားများအပြင် ထမင်းစားချိန်နှင့် အိပ်ချိန်များကိုပါ ဂရုတစိုက်စီစဉ်ပေးနေသည်။ သူက အလွန်တိကျသည့်အပြင် လွှမ်းမိုးနိုင်စွမ်းရှိသူဖြစ်၍ ကျွင်းဟွိုင်လန်ကို စောဒကတက်ခွင့်မပေးပေ။

ကျွင်းဟွိုင်လန်က ဘာပြောရမည်မသိဖြစ်သွားသော်လည်း သူ လုပ်စရာမလိုသည့်ကိစ္စဟုထင်၍ အိမ်တော်သို့ပြန်ပြီး တစ်ရေးတစ်မော အိပ်ခဲ့သည်။

အိပ်ရာနိုးလာချိန်တွင် ဆည်သို့ ရောက်လာခြင်းဖြစ်သည်။

 

ယခုအခါတွင်မူ သူ၏စီမံပေးမှုအောက်တွင် မြို့မြောက်ပိုင်းမှဆည်၏ ပျက်စီးသွားသည့်နေရာတွင် သဲများ ကျောက်စရစ်ခဲများဖြင့် ဖြည့်ထားပြီး မစီးဆင်းပဲ ပိတ်နေသည့် ရေများကိုပါ သန့်စင်ပြီးသားဖြစ်သည်။ ထိုရေများကို ရှင်းလင်းပြီးသွားပါက ဆည်ကို ပြုပြင်နိုင်ပြီဖြစ်သည်။ 

ကျွင်းဟွိုင်လန်၏ စနစ်တကျ စီစဉ်ခဲ့မှုများကြောင့် သူ မရှိနေသည့် အတောအတွင်းမှာပင် မြောက်ပိုင်းမှ ဆောက်လုပ်ရေးနေရာက အဆင်ပြေပြေဖြင့် ဆက်လက်လုပ်ဆောင်နေနိုင်ခဲ့ပြီး ပြဿနာ ကြီးကြီးမားမားမရှိခဲ့ပေ။

သူ ရောက်လာသည်ကိုမြင်သောအခါ ပြုပြင်ရေးလုပ်ငန်းခွင်နေရာမှ အရာရှိများက ဝမ်းပန်းတသာဖြင့် ကြိုဆိုကြသည်။