အကြမ်းဖက်၀တ္ထုထဲကဇာတ်လိုက်မရဲ့အကိုကြီးဖြစ်လာတယ်

Chapter 43

ဆောင်းဥတု၏ နေ့တာအတိုဆုံးနေ့ရက်များရောက်ရှိလာပြီ ဖြစ်သောကြောင့် နေ့ရက်တိုင်းမှာ စောစီးစွာမှောင်လေ့ရှိသည်။

အခမ်းအနားငယ်များအတွက်မူ နန်းတော်တွင်းရှိ မည်သည့်အရာမျှ လုပ်ကိုင်စရာမရှိသော သခင်မ‌လေးများမှာ နည်းလမ်းမျိုးစုံရှာဖွေပြီး ပွဲကျင်းပလေ့ရှိသည့်အတွက် ထိုအချိန်တွင် နှစ်စဉ်နှစ်တိုင်း မင့်လွမ်နန်းဆောင်၌ လူစည်ကားနေမြဲဖြစ်သည်။ သို့သော်လည်း ယခုနှစ်တွင် ကိုယ်လုပ်တော်ရှုက ဖိတ်ကြားလွှာများအားလုံးကို ကြိုတင်ငြင်းပယ်ထားခဲ့လေသည်။

ရာသီဥတုမှာ စတင်မှောင်မိုက်လာသည်နှင့် သူမ၏နန်းဆောင်၌ ဖက်ထုပ်စားကြရန်အတွက် ကျွင်းဟွိုင်လန်တို့ကလေး၃ဦးကို အဓိကခန်းမဆောင်သို့လာရန် ခေါ်လိုက်သည်။

နန်းတော်တွင်းရှိ မိန်းမစိုးများနှင့် အပျိုတော်များမှာ ယနေ့တွင် အပြင်တွင်တာဝန်မထမ်းဆောင်ရဘဲ သူတို့အားလုံးခန်းမအတွင်း၌သာ ခစားနေကြသည်။ ကြီးကျယ်ခမ်းနားလှသော အဓိကခန်းမဆောင်မှာ ယနေ့တွင် အထူးစည်ကားနေခဲ့သည်။

သူတို့သုံးဦးဝင်ရောက်လာသည်နှင့် ကိုယ်လုပ်တော်ရှုမှ ရက်ရက်ရောရောဖြင့် အရှေ့ပင်လယ်ပုလဲများပါဝင်သည့် အိတ်တစ်အိတ်စီပေးလာခဲ့သည်။ ကျွင်းဟွိုင်လန် သိမ်းဆည်းရန်အတွက် အိတ်ကို ဖုရိထံပေးလိုက်ပြီး ပြုံးကာ ပြောလိုက်လေသည်

" အရီးတော် ဘယ်လိုတောင်တိုက်ဆိုင်တာလဲ လင်ဟွမ်နဲ့ကျွန်တော်တို့ဆီမှာလည်း အရီးတော်ကိုပေးဖို့အိတ်ရှိနေတယ်…"

ထိုစကားကိုကြားလိုက်ရချိန်တွင် ကိုယ်လုပ်တော်ရှုမှ သူမ၏မျက်လုံးများကိုပင့်လိုက်ပြီး ပျင်းတိပျင်းရွဲ့အမူအယာဖြင့် " ပန်ကုန်းဆီကိုယူလာခဲ့ပါဦး.. နန်းတော်ထဲမှာ ဒီရက်ပိုင်းပစ္စည်းကောင်းတွေအများကြီးမြင်ဖူးထားတာ ပုံမှန်အရာလေးတွေနဲ့တော့ ဒီအဒေါ်ကိုမလှည့်စားရဘူးနော်…"

" သေချာပေါက် ပုံမှန်အရာလေးဘယ်ဟုတ်မလဲ အရီးတော်ရဲ့…"

ကျွင်းဟွိုင်လန် ပြုံးကာ ဖုရိထံသို့ လက်လှမ်းလိုက်သည်။