أحتاج شمعة لإنارة حياتي

Part"38"

#أحتاج شمعة لإنارة حياتي
بــقلمي : مرمر علي
°°°°°°°°°°°°°°°°°°°°°°°°°°°°°°°°°°°°°°°°°°°°

#غزل
. كعدت ويه اذان المغرب كمت لفيت الروب ؏ جسمي ورحت للحمام ثواني وطلعت وكفت بصالة صايرة عبارة عن ثلج من البروده درت وجهي من سمعت صوت فهد جاي من ورايه
- فهد :- شغلي الصوبة
- غزل :- ماكدر اشيلها ثگيله

. رجع للغرفة طلع الصوبة وخلاها بصالة وشغلها
- فهد :- جيبيلي السجادة تا اصلي
- غزل :- بارده هنا
- فهد :- هاي شغلت الصوبة شوي وتصير دافيه

. رحت للغرفة طلعت دشداشه إله وأخذت سجادات ورحت لصالة لكيته كاعد انطيته الدشداشه لبسها
- فهد :- روحي توضي
- غزل :- انتضرني مو صلي وحدك
- فهد :- منتظرج بوية روحي

. رحت للغرفة لبست دشداشه قصيرة ورجعت توضيت ورحت يمه لكيته فارش السجادات اخذت الازداد ولبسته
- فهد :- تكدرين تسجدين
- غزل :- اي حبيبي
- فهد :- اجيبلج مصلاية
- غزل :- لا حبيبي يكولون السجود زين للحامل
- فهد :- اذا حسيتي اكو وجع عندج يصير كولي
- غزل :- اي حبيبي

. وكفنه نصلي سوه لحد ماكملنه بقه كاعد يسبح لميت السجادة ورحت كعدت يمه خله ايده فوگ راسي وسحبني لصدره حضنت خصره
- غزل :- احبك
- فهد :- احبج اكثر

. بأس راسي وخله ايده فوگ بطني يمسح بيها باوعت لحلگه شفته يهمس بصوت ناصي يقرأ ؏ بطني مثل كل مره حضنت رگبته وبقيت اباوع عليه ارمش دار نضره عليه وابتسم
- فهد :- ها يِروح
- غزل :- احب حنيتك عليه
- فهد :- بعد گلبي
- غزل :- نروح ڷــ اهلي
- فهد :- هسه تريدين
- غزل :- بكيفك
- فهد :- كومي بدلي
- غزل :- صُدك حبيبي
- فهد :- اي يِروح كومي بدلي

. كمت بسرعه وهوه منبهني ماتحرك فجأه لزمني من ايدي حيل
- فهد :- بت الحلو كم مره منبهج متكومين هيج
- غزل :- تحمست
- فهد :- كعدي هنا ماكو روحه
- غزل :- ليش
- فهد :- كعدي وبلا صوت

. كعدني ؏ القنفة ولم السجادة وكام
- غزل :- شسويت اني حتى هيج تعصب
- فهد :- نفس مااسمع
- غزل :- والله ما توجعني بطني
- فهد :- اششش
- غزل :- بعد متحبني اعرفك
- فهد :- لا حول ولا قوة الا باالله
- غزل :- اي متحبني

. شمر السجادة ؏ القنفة ونزل دشداشه وكعد كبالي يباوع عليه وكل خزره ولا ثانيه واني ماصدكت كبل بجيت
- غزل :- ليش تخزر بيه
- فهد :- صايره شلنفص 
- غزل :- وديني ڷــ اهلي
- فهد :- ماصدكتي كبل تريدين اهلج
- غزل :- اي أريدهم أنتَ متحبني بس همه يحبوني
- فهد :- كافي تبجين لا اكوم اشلع اذاناتج
- غزل :- والله إله أكول ڷــ بابا عليك
- فهد :- شتكولين
- غزل :- أنتَ ما تحبني
- فهد :- هاي منو ما يحبج ولج
- غزل :- أنتَ بس تصيح عليه وتخزر وتريد تشلع أذاناتي
- فهد :- هههههه
- غزل :- بس تضحك عليه
- فهد :- ولج كافي كتلتي روحج عليمن البجي وهذا تشهك