زهرة الاقحوان Crisantemo

1

يا نورا تعالي شوفي بتك قالت عايزة تقدم تصميم   ، البت دي حتجنني في زول جايب كم وتسعين وممتحنة علمي تقول عايزة تقدم مجالات أدبية عيبي لي كليات الطب والهندسة بس  استغفر الله العظيم يارب

يا احمد خليها على راحتها بكرة تفرح بيها لمن تلقاها مشهورة في عالم الازياء والموضه( وانا )بتي واثقة انها حترفع راسي 💙

خلينا من دا اسي دا اسم مع الناس زاتو ما بتنطق غايتو يا نورا انا ما عارفة ليه سمعت كلامك وسميتها اقحوان انا زاتي ما بقدر أقوله ليها لما اعصب

احسن يا احمد عشان ما تعصب عليها اساسا هي ما جاي معاها الا اللين 💙

طبعا انا بتذكر الكلام دا كأنه امس، انا اقحوان ،بنادوني وانة عشان اسمي تقيل عليهم 😂😂ما علينا خريجة فنون وتصميم الدخلتها بعد معاناة وعدم رضا الوالد بحجة أنها أقل من كليات العظمة كما يقولون بس ساعية اغير المفهوم دا

نبع الحنان💙 نورا اطيب إنسانة فيك يا دنيا الداعم الأول عندها مشتل فيه كل انواع الزهور والورود حبها ليهم السبب الأساسي لاسمي العجيب على قول ابوي😂

ابوي احمد قريب لقلبي شديد عصبي بس حنون جدا وبرجع سريع  مهندس ميكانيكا وعندو معرض سيارات

اخواني✨ مؤيد الكبير  بقرأ هندسة بترول فخر الوالد طبعا كلامه  مسموع لانه الكبير😎

جوري في متوسط  مجنونة لأبعد الحدود ، وواعية كيف ما تعرف 😂

اخر العنقود سكر معقود  وتين نكهة البيت وروح المشاكل بتقرأ في الروضة بس افترا ما طبيعي 😂😂

صحباتي شهد ولين وسارة قروا معاي في الجامعة قريبات لي شديد بنادوني كريزا 🌼

اشتقاق من Crisantemo الي هو الاقحوان بالايطالي لاني بحب ايطاليا وشوارعها شديد ،نفسي اسافر وأحضر run way لأزياء مصممين ايطاليين وياحبذا لو قدرت اشارك معاهم ، دا غير القهوة والبيتزا الإيطالية 😔💔

صحيت من النوم على صوت امي يا بت ارح نمشي لحبوبتك نشرب معاها الجبنة ،

أمي عليك الله خليه بعدين

والله يا وانا ما تقومي اجيب الموية واكشحا ليك في الرسمة الما تميتيها دي، طبعا قمت مخلوعة لأنه مرة عملتها 😂😂

ليه يا نبع الحنان بس بدل تقولي اشجع المصممة المشهورة دي واعمل ليها نسكافيه يخليها تركز ،  وراء كل بت عظيمة ام نسيتي المقولة دي 😎

يا بت ها مصممة منو ومشهورة منو، وكمان بقيتي تألفي مقولات من عندك ، اللهم طولك يا روح ،  قومي احسن ليك لأنه حبوبتك وعمتك ديل اتلومنا معاهم

حاضر يا ماما اعمل شنو لو ناس البيت ما بقدرو النعمة  ال ربنا اداها ليهم

نطت جوري نعمة ولا سكينة 😂😂😂(ديل جيرانا )قولتا   ليها انت الدخلك شنو ، بكرة يا يمة اسافر ايطاليا والاقي إلي صعب وعفاف واصمم فستان زفاف ل روجينا و .......

قبلت لقيتهم طلعو من غرفتي خلوني براي  😂😂

استحميت وصليت الظهر ومرقت لقيت ناس امي راكبين مع مؤيد وطبعا هو صاري وشو عشان كان مفروض يلعب بليستيشن مع أصحابه

قلت لجوري مين الكان مفروض يلعب بليستيشن زي الزمن دا بس طار ليه من راسو 🤣

وتين نطت وقالت ايووودي😂😂وفكيناها ضحكة طبعا هو ولا اشتغل بينا لئيم خلاص ، أمي نهرتنا ودا اخوكم الكبيير ووو  اساسا اي ام بتحب ولدها الكبير معروفة وما بتدسا يعني ، عاد اتكيف من كلام امي واحنا خلاص اي زول لما خشمو عليه تاني في كلام بعد نبع الحنان 😂💜

وصلنا بيت ناس حبوبة ام ابوي بيت العيلة فيه عماتي سعاد ومريم لا بحبهم لا بحبوني ودائما مسمعين امي كلام زي السم ، وانا وجوري بنرد ليهم عشان كدا ما بطيقونا ، ما عارفة هم مالهم انا مؤمنة تماما أنه الحب بجي من التعامل ومن نحنا قمنا لقيناهم جافيين وسلامهم بنص يد ، والله قدر ما بحاول اتجاوزهم ما بقدر لأنه انا بطبيعتي ما بحب اغلط على زول وما بحب انسان ينبذ زول انا بعزه ما بالكم أنه الزول دا يكون امي ، اكيد ما حأرضى فيها كلمة رغم امي دايما بتجيهم وبتعمل معاهم الواجب وبتقول اتلومنا معاهم بس انا ما شايفة في اي لوم والله لانهم ما بجونا نهائيا  لدرجة تخريجي ما باركوه لي للان دا غير نظراتهم لينا تحسهم بكرهونا من قرون ، حبوبة احسن منهم طيبة وحنينة علينا يمكن عشان كدا احنا بنمشي ليهم، والمصبرنا اكتر عمو محمد ياخ دا كائن من نوع آخر هو اصغر البيت زول نكات وعفوي جدا وفرفوش عندو معهد لتعليم اللغات 💙 ، طبعا جدو اتوفى بسكتة دماغية 💔  قبل سنة عشان كدا حبوبة دائما بتحاول تجمع الناس وتحكي لينا عن شخصيتو زمان وحكمتو في أبسط الأمور ،

من دخلتنا لقينا عمتو مريم في الصالة كنت انا اول وحدة سلاما كالعادة بنصف يد ، البت الاسمها غريب كيفك ،

قلت ليها الحمد لله يا عمتو وسلمت على امي واخواني بنفس الكيفية وطبعا كلنا ساكتين نفسي يوم تفاجئنا واحس بحنية العمات بس شكلو مستحيل

، قالت لينا وينو احمد ،مؤيد رد ليها في الشغل حيغشانا بعدين  ، طبعا هم بحبو مؤيد لأنه عايزنو لسماح بت عمتو سعاد عشان كدا كلامهم بوجهو ليهم

، مؤيد استأذن منهم وسط ترجيات ومشهد درامي منهم ، انا لو ما عارفة القصة كنت حاقول ريدة طبيعية بس يبدو أنها ريدة بمفهوم اخر 😂😂

عمتو سعاد عندها البنات  سماح وسما وسبأ كل وحدة اكعب من التانية  والاولاد سادن وسامر احسن من اخواتهم بشوية بس 😂

عمتو مريم عندها وائل  طبيب جراح مفتري شديد ، لؤي صيدلي دا كيوت خالص ما زي اخوه ،  لارين مهندسة دي الوحيدة البحبها وبنفهم بعض طيبة لأبعد الحدود  💙

عمو محمد سنقل بائس عمرو ٣٠ سنة ، حبوبة كل مرة بتجيب ليه عروس بطفشا 😂للان ما رسا على بر يحليلو 😂

اما عيلة ماما ، جدو وحبوبة الاتنين متوفيين ، خالاتي مها (بتها ريماس  سستر ، ميناس it)

خالتو جنات عندها ولد واحد مدلع دلع اسمه امجد في ثالث ثانوي

خالتو لمى لسة سنقل ، اكتر وحدة بتدلعني ودائما بتعزني بالمرقات والهدايا 😎💙

#نتلاقى✨

مثلك انا تؤذيني نظرة دونية ، وعطف مُبتذل وسلام بنصف يد ، مثلك أنا ابحث عن الوُد لكن من السماء 💙

د سلمان العودة✨