زهرة الاقحوان Crisantemo

10

طبعا السيرتونين كان مرتفع من اليوم الأول شكلو حيزيد معدلو لو استمريت في الشركة دي ، دخلت الواتس لقيت همام مرسل لي لينكات لقروباته في كل مواقع السوشال ميديا ،  الانستا  اكتر ابليكيشن كان مستخدم في الشركة لأنهم بعرضو تصاميمهم بعد يختارو الموديل  عدد followersكان كبير  مقارنة مع أنه الشركة عندها سنتين يادوب ، دليل على أنه quality  ممتازة ، اكتر حاجة جذبتني صور همام في روما ، دقيقة يعني هم بشاركو برة ؟!! مخي ما قادر يستوعب يعني ممكن انا اسافر ايطاليا⁦⁩⁦🇮🇹⁩⁦ لو اثبت نفسي 😊

حماس ليفل ألف ياخ 💃💃💃💃

بعد الغداء جاتني لارين  ولؤي اولاد عمتو مريم فرحت فرح بجيتهم باركو لي الوظيفة وقالو لي ما تشتغلي بكلام عماتك الا ما يجي يوم ويتغيرو بعدين اكيد ما مخاصمانا عشان الكلام القالو صح

معقولة يا ولي ولولو انتو الوحيدين البحبكم من عيلة بابا مستحيل اخاصمكم لانكم في مقام اخواني واكتر والله

اتونسنا وما خلينا زول ما قطعنا فيه جوري عملت لينا كيكة شوكلت وشاي لبن ، بعدو شغلنا البليستيشن لعبوا مؤيد ولؤي بعداك انا ولولو ،  الكواريك ما تديك الدرب  اتفقنا أنه الخسرانين عليهم يدفعوا حساب البيتزا الطلبناها دليفري 🤣🤣🤣

لؤي غلب مؤيد والله صرخت صواريخ حمدت الله أنه غرفة مؤيد فيها عازل صوت والا بابا كان حيطردني

انا غلبت لولو وتعالى الصراخ والشماتة

مؤيد حلف ما يخلي لولو تدفع بحكم أنه اشتغلت جديد بس انا ولا كضبت جريتا من يدها للبقالة جابت لينا ٣ بيبسي الحجم الكبير 🤣🤣🤣

اهم حاجة التوثيق صورت البيتزا والبيبسي وطوالي  رسلتهم لشهد  قربت تدخل لي بالتلفون ما خلت نبذ ما نبذتو لي 🤣🤣🤣🤣🤣🤣

طلعوا مننا الساعة ٩ وطوالي النوم جاك زول صحيت مصدعة حتى ما قريت الوٍرد بتاعي   كويت فستاني سريع  اتجهزت وعملت ايلاينر وقلوس بس  وشلت مق القهوة في يدي قلت اشربو مسافة شهد تطلع 

وانة ازيك من عيونك دي ظاهر انك مصدعة هاك البندول دا بريحك

شلتو منها قبل اتحرك قالت لي امشي بالباب التاني مستحيل اخليك تسوقي بحالتك دي بس ادعي ما يلقانا بتاع مرور

استسلمت للأمر الواقع اخدت غفوة مسافة الطريق صحيت بصوت شهد وصلنا يا وانة اها الصداع ما خف

الحمدلله راح وكأني كنت محتاجة للغفوة دي

دخلنا الشركة وكانت هادئة دا الجو المناسب للشغل ، سلمنا على ميادة ومعاها بتين علا ورغد قسم المحاسبة ، اتوجهنا على مكاتب الموظفين ، شهد مشت المرسم وانا اتوجهت لقسم التصميم  قابلت مديرة القسم اسمها ليلى إنسانة  مذوقة ولبقة وجهتني لمكتبي وادتني اليونيفورم بتاعي  زايد طرحة سوداء لاني محجبة وعرفتني على باقي التيم كانو ٤ اولاد و٥ بنات ، اليونيفورم يحردوه ليهم 💜💜💜