زهرة الاقحوان Crisantemo

14

بما أنه الليلة اخر يوم للتصميم طلعنا انا وشهد بدري شديد ، لقينا المشغل مليان تقول ماف زول رجع بيته أمس ، الكل متحمسين للفوز ، واصلت شغل في فستاني بعد اخترت القياسات على الموديل ، جازفت الخياطة غايتو كتر خير خالتو الي علمتني😍 ، مع اذان المغرب كنا وضعنا اللمسات الأخيرة على التصميم،  باقي نضيف الاكسسري بكرة، الي حيفتحوا القسم بتاعا قبل الديدلاين ب ساعة بس 

رجعت البيت وانا ما قادرة افتح عيوني من التعب ، اتدوشت وطوالي نمت ، صحيت مع آذان الصبح ودعيت أنه ربنا يوفقني ، ويكون فاتحة خير بالنسبة لي 💜

نزلت تحت لقيت ماما مجهزة لي ترويقة،  جات في وقتها صراحة 💜✨

طلعت مع شهد بدري عشان نشوف الناقص ، وصلنا لقينا الشركة قايمة وقاعدة  ، لأنه الديدلاين قرب ، مع اي زول مننا كان في ميكب ارتست ، الاشتغلت معاي اسمها روعة بالجد روعة 😍، اخترنا الألوان الترابية لانه اصلا الموديلز ما بختاروهم على اساس الجمال لأنه الحاضرين بركزو على الفستان بس ،  طبعا انا كنت لابسة فستان اسود فيه ورود بالاصفر ، توربان اسود ، هيلز اسود ، شنطة اصفر ، كنت لابسة حلق رفيع اسود ، خليت روعة تعمل لي ميكب خفيف

جا وقت الاكسسري ، محل الاكسسري كان رهيب بكل معنى الكلمة ، كنت مصدومة اخدت 15 دقيقة وأنا بتأمل في المكان ومعالم الدهشة تتخللني ، الا شهد جرتني بعدها اتذكرت أنه تبقى 45 دقيقة ، جريت لمحل rings اخترت لون اسود رفيع ، بعدو مشيت محل الاسكارف (الشال) ، الألوان كانت خرافية ، اللون النيلي كان موجود ويا جمالو ، طبعا ركن الشنط ما قربت عليه لانه اصلا ما عايزة اضيف باق للفستان تبعي غير أنه كان زحمة مبالغة ، اخر حاجة كان ركن الشوز ، اخترت هاي هيلز اسود لأنه الفستان قصير ، لما عاينت للساعة كان باقي عشر دقائق ، بقيت بتفرج فيها على المكان ، ياخ الكولكشن بتاع المحل ما فاضي لمول زاتو ، همام كل مرة ببهرني بذوقه 😍😍😍

اخر ٣٠ دقيقة كانت للموديل تلبس فيها الحاجات الاخترناها ليها بعدو طلعونا برة قبل ما نشوف اللوك النهائي

نزلنا تحت لصالة run way الي ولا كأنو نحنا في روما الإضاءة كانت غير شكل ، لمحت شهد لوحت لي بيدها ، قعدنا جنب بعض وبقينا نتكلم  ، كان في ٤ كراسي للجنة التحكيم، الغنيين عن التعريف:( همام مالك الشركة ، رؤى نائبته ، ليلى مديرة قسم التصميم ، كمال مدير المرسم ).

الكل كان متحمس بعدو همام أدى كلمته وأنه متشوق يشوف التصاميم ويعلن الفائز 😍🔥

ابتدأ عرض الازياء وسط موسيقى هادئة ، بالجد التصاميم كانت روعة ، لما شفت اللوك النهائي لتصميمي  انبسطت جدا طلع ارهب من توقعاتي⁦💃🏼⁩⁦💃🏼⁩ ، كان في تصاميم حلوة شديد بتقدر تنافس عالمياً ، اقتنعت أنه الشركة ملانة بالمواهب ، هو اكيد همام ما حيوظف اي زول يعني! ، حمدت الله أنه اتيحت لي فرصة زي دي وأنه عندي صديقة زي شهد لو وحدة تانية كان فكرت في نفسها وبس ، حقيقي انا فخورة انها صحبتي 😔💜💜💜