زهرة الاقحوان Crisantemo

5

صباح يوم جديد ، صباح أول مشوار بالعربية الجديدة ، كنت متحمسة جدا للسواقة الى اتحرمت منها ٤ سنين ، نزلت لقيت مؤيد وشهد منتظريني تحت ،

على حسب تعليمات بابا أنه امشي اعيد التمرينات  في الميدان الجنبنا  عشان اتذكر السواقة لانه اولريدي عندي رخصة طبعا ح اتدرب تحت إشراف  مؤيد ، الي اصلا كان ناوي نية سودة على العربية 😒  بس اااه وين يااا ما اديتو فرصة نهائي ، كنت كل إجازة براجع السواقة عشان اكون بيرفكت 😌، مؤيد جدع لي مفتاح العربية بعد أتأكد مني ، قالي الله بريدك كان حتكون في خبر كان بس طلعتي مفتحة ي بيبي 😂😂

تربيتك  يروحي 😂

شلت المفتاح ودورت عربيتي واتحركنا انا وشهد بعد ودعت ماما مع  الوصايا العشر، استقبلنا مهاب من الباب ، الجميلات كيفكم ، اووو العريس اخبارك ياخ اها المعنويات كيف

باسطة والله ، عايني يا وانا من قبيل منتظرين قهوتك لأننا مصدعين ، لتس قو ماف وقت

من عينيا يا مهاب بس لازم تدفع حقها من هسا وريتك دا انت ما حتشرب اي قهوة 😌

نتفاهم بعدين يا حضرة الديزاينر 😉

بيت ناس شهد ملان ناس ماشاء الله ، بالحالة فاضل اسبوع للعرس ، سلمت على خالتو خلود وبقية اهل شهد ودخلنا المطبخ ، بعد حضرت القهوة مشيت انادي مهاب ما لقيتو ، فجأة همام ظهر في وشي ، قالي القهوة لو جهزت جيبيها لأنه مهاب طلع الصالون ، مشيت جبتها ليه لما شالها قال لي أن شاءالله بس تطلع ظابطة ما يطلع مدح ساي 😒، عاين ما ضروري تشرب والله ، اساسا ماف زول ما بشرب قهوتي بس الناس الي ما عندها ذوق حسي زيك اكيد ما حتعجبهم 😌

غايتو همام دا لو ما رفع ضغطي اصلو ما برتاح ، دخلت جوة وانا بنبذ فيه قلت استاهل انا لاني باخد وبدي معاه في الكلام ،

طبعا ريحة البخور مع القهوة بالإضافة للاكسسري التسالي والفول السوداني والبلح شام والفنكوش والبامبي بالشطة حاجة ما تخلص والله ،ماف زول ما علي عليها لمن اتكيفت ومودي انعدل ، طبعا لما جابو سرامس الرجال كلها كانت فاضية قلت الا ما الاقي همام في زقاق 😎

طبعا عربيتي ما كان فيها بنزين اضطرينا نخلي مهاب يودينا السوق عشان نجيب القماش لفساتين العرس ، نزلنا في سعد قشرة وفات بعد اخترنا القماش شفنا الخياط عشان يفصلو لينا بعداك مشينا نشوف حجوزات الميكب ارتست وكدا ، تلفون شهد ضرب قالت لي دا همام منتظرنا برا ، طلعنا معاه كان مشغل اغاني هادئة ، كان بتونس مع شهد وانا اصلا كنت ورا مركبة سماعاتي ومغمضة عيوني عايشة في عالم تاني ، اتفاجأت بزول بجر السماعة مني ، لما عاينت لقيتو همام ، انت ناوية تقعدي هنا ولا شنو ، لما أتلفت لقيت شهد نزلت واحنا جنب الباب ، قلت ليه شهد متين نزلت  ،