زهرة الاقحوان Crisantemo

15

صحيت الساعة ٨ بصوت مؤيد :يا جوري اختك ختت الدولارات وين ؟

طوالي قمت وعيوني لسة مغمضة كشيتهم الاتنين برة وانا بنادي لبابا عشان تلحقهم شكلة بابا في السلم 😂😂 قفلت الباب وواصلت نومي ما صحيت الا الظهر ، البيت كان هادئ على غير العادة 😯

اول ما ختيت رجلي في عتبة السلم اتزحلقت بقشرة الموز 😭😭💔💔💔

صرخت بأعلى صوتي وتيييييين والله ما اخليك ، جات ماما جارية على مصدر الصوت ، قومتني رجلي كانت بتوجعني شديد ، ماما بقت تنادي في الجماعة ديلك ، لما نزلنا من السلم لقيناهم قاعدين في الصفرة ولا على بالهم ، اكيد دا مقلب منهم ⁦☹️⁩، لما شافونا انا وماما جو علينا وبقو يسألو مني طبعا انا فاهماهم شغالة احمر ليهم بعيوني بس ⁦☹️⁩💔

انتظرت بابا المنصف الوحيد ، من جا داخل عملت روحي ما قادرة اتحرك عديل 😂😂

رصيت ليه الحصل معاه دموع تماسيح قال لينا : رأيكم شنو نعمل الغداء كلنا مع بعضينا للانسة وانة لأنها تعبانة أو خلينا نقول كرعينا مكسرة عديل 🤣🤣🤣🤣🏃🏃🏃

طبعا انا مبسوطة من الحاصل ، جابو لي تلفوني بقيت شغالة بيه ، كنت قاعدة في كرسي نص المطبخ وأنا بعاين ليهم بطبخو عشاني ، رغم الشكل البحصل راس كل ساعة بس ما بنكر حبهم الشديد لي 😭💜💜، بقيت بشاغل فيهم وانا فاتحة فيديو ، ركزت على بابا حبيبي اكتر ، لأنه كل حاجة بعملا بجي يضوقها لي عشان يشوف رأيي فيها ، كنا مندمجين شديد في الونسة ، في النهاية جوري ومؤيد رصو الاكل وانا بعاين ليهم بنظرات الانتصار ، لما ضقت الصحن بتاعي لقيته عبارة عن شطة ، اتشرقت لمن عيوني بقى لونها احمر ، طوالي بدلت صحن مؤيد لما قالو ليه يناولني موية 🤣🤣🤣🤣🤣

بعد الغداء بابا قال لينا : جدكم الله يرحمه كان بوصينا كل مرة ، لما نحن بنقول ليه انت مسافر ولا حاجة ، بقول لينا : الموت من الحياة ما معروف ، بتمنى منكم ما تقاطعوني لما اخلص تمام ، اولاً انا بحبكم جدا ، اي زول عندو مكانة خاصة في قلبي ، وتين حبيبة بابا 💜، عايزك توعديني انك تسمعي كلام امك واخوانك في اي حاجة بقولوها ليك ، وانت على وشك تدخلي المدرسة لازم تكوني متفوقة في دراستك، وتختاري المجال الانتي بتحبيه تمام 

جوري روح روحي انت💜 ، مجال الطب النفسي البتحبيه خليك باقيه عليه ، ما تخلي زول يفرض قراره عليك ، انا واثق انك حتكوني طبيبة نفسية ونموذج يحتذى به ، انا عارف انك حنونة وطيوبة ما محتاجة توصية على نفسك اكيد 😍

مؤيد ، سندي 💜 خلي بالك من امك واخواتك لاني بكون مطمئن وانت معاهم ، ثقتي فيك كبيرة ، كن صاحب لاخواتك ما تظلمهم لأنك حتكون ابوهم التاني ، خليهم يطمنوا لما يحكوا معاك ، ما تزعل وحدة منهن ابدا ، لما تلاقي الزول البكملهم ما تتردد تزفهم ليه ، أنا متأكد أنه خليت راجل وراي ، في نفس الوقت ما عايزك تهمل نفسك وبتمنى تلقى بت الحلال البتسعدك 💜