" يُعلن فريق السفينة المُغامِرة عن مُغامرة مُخيفة و مختلفة غير صالحة لأصحاب القلوب الضعيفة .. سوف نذهب إلى أكثر الأماكن خطراً على وجه الأرض .. للتفاصيل تواصل معنا على الرقم التالي "
كنزي بصت على الرقم و عينيها لمعت بحماس .. قامت من على السرير و اتصلت بحلا صحبتها و جارتها إللي جت في دماغها أول ما شافت البوست على الفيس بوك .
حلا ردت عليها و هي بتقول : إيه يا كُنوزة .
كنزي حطت الموبايل بين كتفها و ودنها و هي بتلبس شبشبها : بقولك إيه يا بت يا حلا .. أنا نزلالك حالاً عندنا مُغامرة جديدة .. إنتي في البيت صح ؟
حلا بحماس : أها .. يلا تعالي على طول أنا مستنياكي .
كنزي : حالاً .
حلا قفلت فكنزي خرجت من أوضتها و راحت لمامتها إللي واقفة في المطبخ .
كنزي : ماما انا نازلة لحلا شوية و هطلع على طول .
هبة : ماشي بس خليها تطلع معاكي تتغدى معانا .. و خلي أسماء كمان تيجي .
كنزي و هي بتخرج من المطبخ : حاضر يا ماما .. يلا سلام .
هبة بتريقة : سلام يختي .
كنزي ضحكت و خرجت من الشقة و نزلت لحلا جري .
بعد ما حلا فتحتلها سلمت عليها و على مامتها و بعد كدة دخلوا أوضة حلا .
بعد ما قعدوا على سرير حلا كنزي فتحت الموبايل و وريتها البوست .
حلا عينيها لمعت بحماس : أوبااا .. تفتكري لفين ؟
كنزي بحيرة : معرفش .. أدخل أسألهم ؟
حلا : أه طبعاً يلااا .
كنزي : ماشي .
قعدوا جنب بعض و كنزي بعتتلهم فبعد كام دقيقة اتبعتتلها رسالة من الرقم دة مكتوب فيها : " المكان هو مثلث برمودا الشهير بمثلث الشيطان بسبب إنه بيسحب أي حاجة جواه .. أكيد كلنا سمعنا عن إنه بيسحب الطيارات إللي في الجو و أي سفن أو مراكب عنده أو حواليه .. فإحنا قررنا نستكشف الموضوع دة بنفسنا و نكتشف سر المثلث دة .. الإجراءات المطلوبة عشان تشتركي معانا هي عايزين صورة من البطاقة و لما تجيبيها هتمضي تنازل على إن لو حصل أي حاجة إحنا مش مسئولين و بعدها هنديكي ورقة عشان ولي الأمر يمضي فيها على موافقته .. تكلفة تذكرة الطيران عليكي بس تكلفة الرحلة في السفينة و باقية الحاجات علينا .. لو كل الحاجات دي تمام هنحدد ميعاد مع حضرتك عشان نتمم كل الإجراءات دي "
كنزي و حلا بصوا لبعض بعد ما خلصوا قراية المكتوب .
حلا ابتسمت و بصتلها بطرف عينيها : ها إيه رأيك ؟ نخاطر و نروح ؟
كنزي عضت شفتها التحتانية و قالت : أنا عن نفسي يلا بينا دلوقتي .. المشكلة بقى هنقنع الأهالي الكِرام إزاي ؟
حلا كانت هتتكلم بس سكتت و قعدت تفكر .. بعدها قالت كإن في حاجة نورت في عقلها : في مشكلة كمان .
كنزي بصتلها و هي مستنياها تقول إيه المشكلة فحلا قالت : دة عايز إمضة ولي الأمر .. يعني هما مستحيل يوافقوا و مستحيل يمضوا على الورقة دي لو قررنا فعلاً إننا نروح .
كنزي نزلت راسها بيأس و قفلت الموبايل و حطته على السرير : طب هنعمل إيه دلوقتي ؟
حلا سكتت شوية و بعدها مسكت الموبايل ادتهولها : إبعتيلهم كدة إسأليهم لازم إمضة ولي الأمر من سن كام .. أصل لو واحد كبير أكيد مش هيطلبوا منه موافقة ولي أمره .
كنزي : طيب ماشي .
فتحت الموبايل و بعتتلهم سألتهم .
كنزي قفلت الموبايل و بعدها قامت : تعالي بقى معايا إنتي و طنط إتغدوا معانا عشان أمي قالت كدة .. نكون ضيعنا الوقت لحد ما يرد عشان الرسالة لسة موصلتلهومش أصلاً .
حلا : إشطا ماشي .. يلا بينا .
قامت و خرجوا فكنزي قالت لأسماء إنهم يتغدوا معاهم فأسماء وافقت و نزلوا هما التلاتة و قعدوا شوية لحد ما الغدا جهز فقعدوا ياكلوا .
و هما بياكلوا موبايل كنزي عمل صوت و الشاشة نورت فكنزي بصت لقتها الصفحة بتاعت الرحلة .
كنزي مسكت الموبايل و قالت بسعادة : تعالي يا حلا ردوا أهو .
حلا قامت جريت وقفت جنبها و فتحوا الماسدج فكان مكتوب : لازم الإمضة للي تحت سن 25 يا فندم .. لكن إللي 25 أو فوق 25 يقدروا يطلعوا الرحلة معانا عادي من غير إمضة ولي الأمر .
حلا و كنزي بصوا لبعض بسعادة عشان هما 25 سنة بالظبط : هييييي .
أسماء بصتلهم بأستغراب : في إيه يا هبلة منك ليها ؟ رسالة إيه ؟
هبة قالت بسخرية و هي بتكمل أكل : تلاقيها واحدة من مغامراتهم الهبلة .
حلا و كنزي بصولهم بتوتر و بدأوا يحكولهم الموضوع .
أنت تقرأ
رحلة في مُثلث الشيطان
Fantasyماذا لو ذهبنا معاً في رحلة مُختلفة ؟ .. رحلة إلى مكانٍ بعيدٍ في المحيط الأطلنطي نكتشف به حياة أخرى .. لكائنات أخرى !
