رحلة في مُثلث الشيطان

° بارت 18 °

فارس بدأ يحكيلها إللي حصل من أول ملك إتقبض عليها لحد اللحظة إللي قالوا فيها إن المحاكمة دلوقتي .

* فلاش باك *
كلهم بصوا للجندي بصدمة بعد ما قال إن المحاكمة هتكون دلوقتي .
فارس : إزاي يعني العميد كان قايل إنها هتبقى بكرة !
الجندي و هو بيكلبش إيديها : عادي الميعاد إتقدم .
ملك بلعت ريقها بتوتر و هي بتحاول تتمالك أعصابها و هي شايفة الجنود بيمسكوها و بيسحبوها لبرة الحجز .
نادر و فارس و جابريال كانوا واقفين متنحين مش قادرين يستوعبوا إللي بيحصل .
جابريال لما شاف في عيون ملك الخوف بس بتحاول تبين على ملامحها إنها جامدة و هما بيسحبوها لبرة قالها بصوت عالي حاول يداري الخوف منه : متخافيش يا روحي مش هيعملولك حاجة .
ملك إبتسمت إبتسامة خفيفة و بعدها إختفت عن نظرهم لما الجنود خدوها و مشيوا .
نادر : إحنا لازم نروح المحكمة .
فارس و جابريال هزوا راسهم و بعدها خرجوا كلهم من الحجز و راحوا ورا جابريال للمحكمة .
لما دخلوا المحكمة كانت بدأت الجلسة و القاضي كان بيسأل ملك إللي واقفة قدامه إيديها متكلبشة و جنبها جنديين .
القاضي : إنتي كنتي عارفة الخلطة دي بتاعة إيه ؟
ملك بجمود : أه .. الخلطة إللي بتحول البشر لحوريات .
القاضي بصلها بصرامة : ليه كنتي عايزة تسرقيها ؟
ملك قالت بصوت عالي غاضب : دي مش سرقة دي حقنا .. دي حاجة بتاعت مملكتي و مكانش من حقكوا تاخدوها .. إنتوا إللي سرقتوها في الأصل مش أنا يا حرامية .
جندي من إللي كانوا واقفين ضربها بالقلم فمالت شوية و هي بتبتسم بسخرية و بترفع راسها فلقت جابريال جري عليهم و هو غضبان و بيزعق : إنت إزاي تمد إيدك عليها يا ..
كان رايح يضرب الجندي بس الجندي ضربه بالبندقية في بطنه جامد فدة خلاه يقع على الأرض و هو بيتأوه بألم .
فارس و نادر كانوا بيجروا عليهم هما كمان بس القاضي عمل حركة بإيده خلت الجنود يكتفوهم .
القاضي قام و قال بغضب : وطي صوتك و إتكلمي بإحترام متخلينيش أسيبهم عليكي .
ملك ضحكت بسخرية و بعدها رجعت ملامحها تِحتد تاني و تزعق : أنا إللي أتكلم بإحترام يا حرامية يا سارقين لتاريخنا في كتبكوا المزورة ..
قبل ما تكمل جملتها لقت قلم تاني نازل على وشها خلاها تقع على الأرض المرة دي و مناخيرها بتنزف .
القاضي دب بالمطرقة بتاعته و هو بيقول بغضب : تم الحكم على المتهمة بالإعدام شنقاً في صباح الغد .. رُفعت الجلسة !
بعدها بص للجنديين إللي سحبوا ملك من دراعاتها قوموها من على الأرض و قال : مش هوصيكوا عليها بقى .
ملك قالت بنفس الغضب من غير ذرة خوف : إنت مش راجل يا ..
فضلت تشتمه بأفظع الشتايم و هما بياخدوها برة المحكمة و فارس و نادر بيحاولوا يفلتوا من إيدين الجنود إللي ماسكينهم و هما عمالين بيزعقوا و بيشتموهم .
القاضي قال للجنود يخرجوهم برة فطلعوهم برة فعلاً و أمروا الجنود إللي واقفين بيحرسوا ميدخلوهومش .
نادر كان هيتخانق مع الجنود إللي وافقين بس فارس مسكه على آخر لحظة و هو بيقول بحزن : مش هيدخلوك بردو يا نادر .
نادر هزه جامد و هو بيقول بزعيق و دموع : أومال هنسيبهم يعدموها يا فارس !
فارس هز راسه يمين و شمال جامد و غمض عينيه و هو بيقول بعدم تصديق : لا لا لا لا .. ملك مش هتتعدم .. أكيد جابريال هيلاقي حل .. هنلاقي حل معاه .
نادر سابه و مسح وشه بإيديه و قال بضيق : أنا هستنى جابريال يطلع و نروح بيته نفكر في حل و إنت روح البيت طمن البنات و ماما إن ملك طلعت قاعدة عند واحدة صحبتها و بعدها إرجع تاني على بيت جابريال .
فارس هز راسه بماشي و مشي و سابه و خرج من المملكة الغربية عشان يروح البيت و دماغه في عالم تاني بتتخيل أبشع السيناريوهات لإعدام ملك .
* باك *