رحلة في مُثلث الشيطان

° بارت 5 °

ملك : إحنا من 50 سنة على كلام ماما يعني و تاريخنا كنا مملكة واحدة .. مملكة برمودا .. دة من زمان لحد من 50 سنة يعني .. بدأ بقى وقتها يحصل مشاكل بين الملك السابق و وزيره الأكبر بين إن الملك يكمل حكم و إن الوزير هو إللي يمسك الحكم .. في ناس صوتت لدة و ناس صوتت لدة فوقتها كانوا متعادلين .. فالوزير دة عشان نفوذه كانت كبيرة قرر يسيب الملك و يستقل عنه و يعمل مملكة لوحده فيها الناس إللي أيّدته .. حصلت بقى مشاكل كبيرة بينهم و حروب إنتهت بإن المملكة إنقسمت لمملكة شرقية و مملكة غربية و لسة المشاكل قايمة بين المملكتين لحد دلوقتي .. و كل ما حد يحاول الصلح و نرجع مملكة واحدة تحصل مشاكل أكتر لحد ما المملكتين إستقلوا عن بعض تماماً بس لو حد من هنا عايز يروح هناك أو العكس دة مفيهوش أي مشكلة بس ممنوع الإقامة الدائمة لأي حد من الطرفين في المملكة العدوّة و ممنوع كمان حد من هنا يتجوز حد من هناك أو العكس بردو .. يعني على قد الدراسة أو السياحة و بعدها يتكل على الله ..  دي قواعد إتحطت على كلا الطرفين .. في ناس طبعاً بتخترق القواعد دي و بيقعدوا على طول بس أنا و جابريال محدش فينا يقدر يخترق القواعد الواحد مش ناقص مصايب يعني .. فجابريال من المملكة الغربية أما أنا من المملكة الشرقية عشان كدة مينفعش ييجي يعيش معايا أو أنا أعيش معاه فبنتقابل تحت الدوامة بتاعت المثلث إللي هي الفاصل بين المملكتين ..
المشكلة حالياً إن بسبب المشاكل دي ملك المملكة الغربية قرر يعمل سور و بوابات حوالين المملكة بتاعته .. و البوابة الرئيسية هتبقى هنا و أكيد هيبقى واقف حراس و الحراس دول لو شافونا أكيد هيروحوا يبلغوا ملِكهم .. فأنا مش عارفة كدة هنتقابل إزاي بعد كدة .
وقفت عوم و إتنهدت بضيق و هي بتمسح وشها .
حلا طبطبت عليها فملك رفعت راسها و بصتلها بابتسامة : أنا كويسة مفيش حاجة بس الموضوع شاغل دماغي فمتدايقة .
حلا ملست على دراعها بابتسامة من غير ما تتكلم عشان معرفتش تقول إيه .
أما كنزي قالتلها بمواساة : أكيد في حل .. هو أكيد بردو هيحاول بكل الطرق الممكنة إنه يدور على حل .. متقلقيش خير .
ملك بصتلهم هما الإتنين بابتسامة : إنتوا جُمال أوي بجد ربنا يخليكوا .
حضنتهم فحلا و كنزي حضنوها و هما مبتسمين .

* في مقر حكم المملكة الشرقية
الملك فيكتور كان واقف و جنبيه مستشيرينه و مساعدينه واقفين كلهم حوالين ترابيزة مدورة و بيتناقشوا في موضوع السور إللي المملكة الغربية هيبنوه .
واحد من المستشارين قال : إحنا ممكن ننتشر الفترة دي في المملكة و ناخد أسامي سكان المدينة بس و إللي بيدرسوا .. و الباقي إللي جايين بغرض أي شيء تاني نطردهم .
واحد تاني من المساعدين قال : إحنا ممكن نبني سور بس مش من طوب .. ممكن نزرع شجر حوالين المملكة و نطور بس البوابات إللي إحنا عاملينها .
فارس ضحك بإستظراف : أو ممكن نبني سور طوب زيهم و نعمله طوييييل عشان ميعرفوش يعدوا .
كلهم بصوله بقرف و نادر ضربه في كتفه و هو بيبرقله .. أما فيكتور لف ببطء و بصله بقرف : لولا إنك إبن صاحبي الله يرحمه قسماً بالله كنت طردتك .. بس يلا نعمل إيه .. قولي إنت يا نادر إيه رأيك و إيه إللي في دماغك أنا بثق فيك و في رأيك .
نادر بصله و قال بابتسامة هادية : والله ما فندم أنا إللي في دماغي ممكن ميعجبش حضرتك أوي .
فيكتور : طب قول .. هنا الكل قال رأيه حتى التافه دة قال رأيه .
بص لفارس فكلهم ضحكوا و بعدها فارس خبط بإيديه على راسه و غمض عينيه و قال بابتسامة : على راسي يا باشا والله كلامك دة ربنا يخليك .
كلهم ضحكوا تاني عليه و هما مش عارفين فيكتور قبله مساعد ليه إزاي .
فيكتور بضحك : قول يا نادر .
نادر قال بجدية : أنا عن نفسي عجبتني الفكرة بتاعت السور من الشجر .. بس لو حضرتك عايز تصفي المملكة من أي حد من المملكة الغربية فلازم القوات ينتشروا في المملكة و يشوفوا بطايق كل الناس إللي في كل البيوت و لو حد من المملكة الغربية يبقى يتقبض عليه و يرجع مملكته حتى إللي بيدرس و إللي جاي بغرض السياحة .. طلاما حضرتك مش عايز أي حد منهم هنا .. بس في الحالة دي لازم تخلي لو في أي حد من عندنا عندهم هناك يرجع في أسرع وقت قبل ما تطلع قرار للقوات إنهم ينتشروا في المملكة و في نفس الوقت تدي أوامر بزراعة أشجار حوالين المملكة .. دة رأيي الشخصي و حضرتك بردو إللي تشوفه و تقرره هو إللي هيتم .
فيكتور بصله بإعجاب بالفكرة : حلو أوي يا نادر .. دة إللي هيتنفذ يا جماعة .. 4 أيام و هنطلع القوات تصفي المملكة من الناس إللي من المملكة الغربية و موجودين هنا .. في خلال الأربع أيام دول هبعت رُسل بأمر مباشر مني لكل الناس إللي في المملكة الغربية إنهم يرجعوا في خلال 3 أيام بالكتير عشان من صباح اليوم الرابع كل الناس إللي هنا من المملكة الغربية هيتصفوا .
كلهم : تمام يا فندم .
كلهم بدأوا يخرجوا من المقر و إتبقى فارس و نادر .
فارس كان مستغرب و قعد يسأل نادر هما مستنيين إيه فنادر قاله إنه عايز يقول حاجة لفيكتور بعد ما كلهم يمشوا .
بعد ما كلهم مشيوا نادر قال : بص يا فندم في بنتين صحاب ملك جم إمبارح .. هما من مملكة مانو أومي في المحيط الهادي مش من المملكة الغربية متقلقش .. أنا بس بقول لحضرتك عشان تبلغ القوات و يبقى معاهم خبر يعني عشان ميقبضوش عليهم .
فيكتور هز راسه بماشي : تمام يا نادر .. هما معاهم بطايقهم طيب ؟
نادر : معرفش بس معتقدش يعني .. هو دة هيفرق في حاجة ؟
فيكتور : إطلاقاً .. كل الموضوع إني كنت عايز ما يُثبت بس خلاص يعني .. دة مش معناه إني مش واثق فيك بس عشان نسجلهم في السجل المدني .
نادر : مش لازم يكفي إن حضرتك تبقى عارف بس و تبلغ القوات .
فيكتور : اوك .
نادر نزل راسه إحتراماً و هو حاطط أيديه جنبه : شكراً يا فندم .. عن إذنك .
فيكتور : إتفضل يا إبني .
نادر و فارس خرجوا ففارس قال : أنا كنت ناسي الموضوع دة خالص .. كويس إنك إفتكرت و قولتله .
نادر : عيب عليك يبني .. يلا نروح بقى عشان بليل منمتش 3 ساعات على بعض و عايز أنام شوية .
فارس إستغرب ليه منامش كويس بس معلقش : ماشي .