{بين أسمين}

البارت (٣٥)

البارت(٣٥)

[لك منزلٍ في نايف القلب وخيام
‏وذود الغلا ترعاه ولا شكيتك
‏يفطر عليك القلب وان فارقك صام
‏والله لونك شوك سدره كليتك]

.

.

الساعه٨الصبح.
طالعت بنفسها بالمرايه نظرة اخيره قبل تسحب فونها برضى عن مظهرها
ثوب أسود كالعاده وغتره بيضاء منسوفه على رقبتها بأهمال
شعرها على عادته الدايمه بتمويجاته الواسعه وكثافته الفاتنه

"ياربي مالي نفس حق شي اليوم"
طلعت للصاله وهي تسمع صوت حاتم يسولف مع احد!
عقدت حواجبها بضيق لما عرفت صوته
"هذا ماراح بيته البارح؟؟"
ترددت تدخل ولا لا بعد الي صار البارح بس مارح تبين انها خافت منه! سمت بالله ودخلت وهي ترسم البرود بملامحها
:السلام عليكم.
طالعوا فيها وردوا السلام
جلست جنب حاتم الي ماعطى ردة فعل غريبه وكأنه مرتاح ومو متوتر زي كل مره تكون مع الشباب...كان مقابل كنبة علي همست له وهي تمثل انها مشغوله بجوالها عشان ماتطيح عينها بعين علي
:ممكن تصب لي قهوه؟.
قام حاتم بهدؤ وهو يصب لها ويرجع يجلس جنبها بس هالمره قريب منها
حاتم بهمس:وش فيك معصبه اليوم،صاير شي؟.
اخذت الفنجال منه بأصابعها الرقيقه وعلي يراقب بصمت
إيثار بنفس همسه:هذا ماراح البارح؟.
حاتم طالع بعلي ورجع طالعها:كان نايم هنا....اسف ماقلت لك بس لما كنت بقولك لقيتك نايمه.
"نايم هنا!!"
اخيرًا تكلم علي بيغير الجو:لايتناجى أثنان دون الثالث.
أبتسم حاتم وهو يضم إيثار من جنب:أسرار احباب انت شعليك؟.
كانت إيثار متعمده تطنشه ولا كأنه موجود ماتعرف السبب بس تبي تعاقبه بعد الي سواه
علي:شكلي بدور لي حبيبه واسوي اسرار معاها.
ماتدري ليه جاها احساس خلاها ترفع عيونها له واستغربت انه كان يطالع فيها بأبتسامه
بسرعه شالت عيونها عنه بتوتر ورشفت فنجالها تبين انها مو مهتمه
حاتم بأبتسامه وهو يطالع فيها
:ايوه ماكنتي تبين تقولين لي ان علي عرف انك بنت؟ليش هو يقول لي السالفه وانتي تخبين.
عقدت حواجبها بأستغراب حاتم يقول كذا؟مو معصب ولاشي؟غريبه واضح مبسوط!
همست وهي تنزل راسها:مابي نتكلم عن هالموضوع.