انا المذنبه وانت البريء

الـذنب الـ ٢٨

#انا المذنبه وانت البريء .

- نشاءالله ينال البارت اعجابكم .
- كاتبتكم فاطمه جميل .

________________

عبد : ماكو داعي يابه اساساً الموضوع طول ، اريد اخطب مياس اليه

الكل بقى صافن واني وحره وحده تباوع بالثانيه كاتمين ضحكتنا

ام نبيل : يمه صدگ تحجي ؟

عبد : اي يمه ما اشاقه من زمان هل حجي بس مالكيت الوقت المناسب الا هسه

اباوع لمياس وجهه احمر طماطه وعمي ساكت ماعرف شيكول عم الهدوء ع مكان شويه وحجه عبد

عبد : يابه ناخذ موافقتك شتكول؟

ابو نبيل : البنيه ندزها لاهلها قبل لا نحجي بالموضوع

راد يحجي عبد سكته عمي وكال

ابو نبيل : اي حتى اذا طلع حجي انو اكو علاقه بينكم وصير عشاير نكول مابينهم اي شي مجرد نعجب بيها وخطبناها اله لا اكثر نتكفه الشر

عقيل : اي عاشت ايدك يابه

ابو نبيل : ابوس عقلي اني

ضحكنا كلنه وبعدها كل واحد دخل لغرفته ، دخلت وغطيت بالنوم تعبانه مادري شبيه حاسه جسمي ثگيل حيل وماكدر اسوي شي حيلي منهد ..

بين النايمه والگاعده احس حركه بالغرفه والحرگ ماليني اريد اتحرك ماكدر افتح عين واسد عين عبالك شاربه مهدء اريد افتح عيوني وشوف شنو بالغرفه ماكو ماكدر ..

غطيت بالنوم ، حسيت بنغزات خفيفه ع خدي ، عطره اي عطره هذا عطره فتحت عيوني ماشفت شي كلشي ماكو كعدت لميت رجليه لصدري وابچي بحرگه واحجي بصوت واني خايفه وارجف ..

غزوه : حموتتت وينك تعال ليه حموت ماكدر بدونك ماكدر

اخذت المخده واشمشم بيها مثل المدمن
ع مخدر*ات هيج صرت ع عطره ، بقيت ساعات ع هل حاله واباوع بالمكان والتفت وخايفه حاسه اكو شي بس مقيديني مادري شبيه مو طبيعيه ابد كمت نزلت لجوه شربت مي بارد ..

وطبطبت ع خدي بأيدي المبلله مي وصعدت دخلت للغرفه قفلتها قفل وشغلت الضوه ونمت بدون غطه لن حاره حيل كعدت ثاني يوم الصبح نزلت عليهم وصبحت لاگتني منادم مبتسمه ..

منادم : ولت من عساها لا تچي

غزوه : منيه؟

منادم : مياس

غزوه : هههه شبيج ليش ماتحبها؟

منادم : يختي وحده كحـ** استغفر الله منها ابد ماحبيتها ولا راح احبها

غزوه : حصير مرت اخوچ

كلتها وهي بقت تغلط وتفشر واني اضحك
سويت ريوگ وكعدنا اني وياها نتريك