“ فتحت سلمئ الثلاجة ..فسقط الجبن ..قال الجبن أنا لاني جبن لأن الفأر يأكلني...قال الفأر أنا لاني فأر لأن القط يأكلني..قال القط أنا لاني قط لأن الكلب يطاردني.. "
نغمة الغناية وايقاع ضرب كفوف الصغار كانو سبسيال غير أي صوت يتسمع هاك الصباح ، كيف كل يوم...ومع كل غناية صغر..وبنفس روتين كل حومة...جوجمة الاولاد ماتوفاش ..من أول ماتبدا الحركة ..تلقاهم كيف الطيور ايلي هاجرت قفصها طايرين من بلاصة لبلاصة..حد مايعرف ولا ذاق طعم النهار بلا بيهم...رغم جوجمتهم الا انهم يقعدو زينة الحومة ..بلا حسهم ومشاكلهم التافهة وحركتهم ايلي ماتوفاش ...الحومة تعتم والديار تتقبر .
"سكر الشباك وابعد من غادي ...اكاهاو كان حلة العين وقلة الحياء " صوت جدها من وراها كيف عادتو ينغص عليها لحظاتها و شيخاتها ...حتئ باش تتفرج في الصغار وهوما يلعبو لا...أوف ملا عيشة وملا خنڨة .
سكرت الشباك بنطرة و ترمت فوق بنك شادة اوراق تقرئ فيهم ...كانت صبية يادوبك غلقت العشرين ...فاخرة شوية بالنسبة لعمرها ...لكن فيها نفحة زين تخليها تحلئ في العين ...شعرها نوازات بصبغة ماعملتها الا بعد ماشاح ريقها ...نهارتها جدها عمل حالة كيفاه تصبغ وهي موش معرسة وعيب عليها ...وردها جابت العار للعايلة جملة وحدة ..عيونها سوداء زيتون وبشرتها قمحية وصافية من أي بثور ...في ملامحها تجبد لبوها اكثر خاصة من ناحية الطول و البشرة .
طلت امها بقفافها الفارغة وعدت عيونها علئ هاك الراجل الكبير ايلي يمطوز في الكومند متاع التلفزة و يكس في الضو بعيونو ايلي مرة يلبس عليهم مرايات ومرة ينحيهم ...مرة يزيد في الصوت ومرة ينقص ...الشي ايلي وتر حفيدتو وماصدقت كي رات امها خارجة للقضية " أمي نجي معااك ؟! "
قبل لا امها تعطي رايها جاها صوت جدها ناهيها " وين ماشية تلب ...ترص اقعد.." خزر لمرت ولدو بشطر عين " وأنت تقعدش تتمجلغ عاد في المرشي"
ماجاوبتهوش وخطفت دورتها خارجة وهو لحقلها صوتو " شاهي محمصة ع الفطور ونحبها مدبشة...كي تروح طيبلنا طنجرة محرحرة "
كل ايلي قدرت تعملو هي تنهيدة ...والله فاض بيها الكاس...ملي توفت مرتو وجاء هو يسكن معاهم وحياتها تقلبت ...اولادها معادش ماخذين راحتهم وهو مارجلهم الكبدة متاعهم ...في اعملو هاذي ...في هاذيكا لا...في لازمهم كبس ...في هي ماعرفتش تربي ...الحاصل مرضهم ...راجلها المسكين موش منجم ينطق حرف معاه يبلع ويغص ...وهي تصبر في روحها أنو راجل كبير والكبار يتعوجو ديما...لكن لكل شي فمة حد.
" والله يا سهام مررلي عيشتي ...محرم الخروج ع الطفلة ...والطفل كل يوم يروح بالمنڨالة وراجلي المسكين قعد بينا ...منا تكويه ومنا تشويه "
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Action🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
