__🍁🍁__
تخربيشات ع الطابلون الأبيض مايفهمها كان هو ...دواير وخطوط وتصاور مخلطين ...تصاور معلقين ع الاجناب وفلاشات متوازية ومتعامدة وحتئ انها متعاكسة ..هو خططها ورسمها كيف ماخمم عقلو وكيف ماقالولو استنتاجاتو ...حط يديه في مكاتبو و تبسم علئ جنب يخزرلها وهي باهتة ومركزة في المكتوب ...حواجبها معقودة بدهشة و بلوكاج ...ضحكتو تفاصيل وجها ومانجمش يكتم ضحكتو المكتومة ...خزرتلو بوجه غشوش وضربتو علئ كتفو معاقبتو على فعايلو فيها " معااااوية "
خرج كفوفو من جيابو و قدمها من اكتافها للطابلو قدامو ...فايتها في الطول وضخامة البدن حتئ انها تخيلتو حاكمها ومانع عليها النفس ..قربو وهو وراها وبين ظهرها وصدرو العريض انشات قليلة عمال تتقلص كل شوية وترها ...هي متوقعة كل شي ينجم يتقلب ...في أي لحظة ممكن يتغيب عقلها ...ولو هو قدم خطوة و قرب اكثر هي تسلم.
لحظة الساعة...شبيها تخمم في القرب و انجذابها ليه ..المفروض تركز قدامها في الطابلو وتفهم منو ايلي يحب يفسرهولها في مايخص القضية لكن هي سرحت معاه...تأثيرو عليها فااات الحد ...بدأت تندم انها قبلت تجي معاه لفم وتعمل فيها مرا تفرق بين الخدمة و القلب .
قرب منها اكثر واكثر...وبراسو هبط لعند كتفها عينو ع الطابلو كيفها وبصوت واطي زاد عليها وغرقها في بحورها معاها.. بدأ يفسر " قبل كل شي لازم تعرف انك من الناس القليلة ايلي تعرف ها القضية وتعرف انها تحت يدي ...وأنت الوحيدة ايلي شافت ها الطابلو "
بلعت ريقها وصوتها خرج راعش ومبحوح من ايلي صاير فيها بقربو " و الايكيب...قصدي جماعتنا...محي الدين و ياسين و البقية "
نقرا بصبعو علئ كتفها " لا ..ولا واحد فيهم ... بون حاليا ولا واحد ..لكن باش يجي نهار ويعرفو ويشدوها معايا ..لكن تو خلي كل شي سكريتو اوكيتو "
خزرتلو نيتها تثبت فيه لكن لقات وجهو لاهمها علئ جنبها ..رمشت متوترة وتنحنحت محرجة وهو ضحك ضحكتو ايلي اسانست بنغمتها في وذنها و بعد من وراها وشد جنبها مكتف يديه " قبل اعوام قليلة ...كنا تلاثة أنا والصحبي و صاحبنا الثالث فريد شادين قضية متاع تهريب توفات فيها مرا بالدهس .. بون ع الأول كنا متوقعين حاجات بسيطة لكن كل ماتعمقنا لقينا الخنار...كنا وقتها مازالنا فرشكين في التحقيق وفرحانين بنجوم اكتافنا و بادج مكتب التحقيقات ...ماتصورناش الحكاية باش تشدنا سنين بلا مانوصلو للرااس الكبير ...كل مانقدمو خطوة في التحقيق نشدو رأس ويطلع بعدو فمة رأس اخر ...كيف الحبل الحاصل ...كل ماتجبد يجي معاك .. " تنهد و هو يضم شفايفو ويسكت للحظات قبل مايكمل " التهريب كان في ظاهرو سلعة دبوات...لكن ...كل ما نقدمو ونفرتو الشي...نتصدمو بحقايق اخرئ...فمة مخدرات و فمة دوايات ممنوعة و فمة حتئ تجارة بشر وحرقة ... حوكي وجرايري الصنعة ..يعني جملة تجاوزات وجرا ئم بالمرة "
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Acción🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
