__🍁🍁__
ماتآمنش ..رغم كل شي صار قدام عينها ...ماتصدقش رغم ايلي شهدت هاك اللحظة ببشاعتها ومرارتها...النفس مانجمتش تردو ...تخنقت بيه في صدرها وماوصلش لڨراجمها ... بكمت وسكتت فرد المرة ...حتى باش تصيح من فجعتها ووجيعتها ...مانجمتش .
الصحبي ...عينو عليها ...بتفاصيلها وبملامح وجها ...كيفاه حمار ...وبدا لونو يشحب شوية شوية حتى صار أصفر ...وقفتها المتمايلة ..كيف عود الزيتون ايلي غلبو الريح ...هو بيدو ساقيه جمدت في بلاصتها ...و قلبو زاد في دقاتو حتى حس العالم كلو سمعو...بعيييد ياسر عليه ..وصعيييب ياسر يصدق ايلي صار...سنين توا تعدت ...والذاكرة مازالت حية ...يومتها شاف من بعيد موت فريد ...ولحظتها تعاود كل شي لكن ها المرة تبدل الوجه وتبدل الاسم ...
صوتها ايلي نجم يتحرر ويخرج أخيرا من ڨراجمها...رجعلو شاهد عقلو...وبدا يوعى شوية بايلي داير بيه ...أصوات كثيرة مافرز منها شي
"" اسعااااااف ""
" فييييسع نبضو يااااسر خفت "
"ماتغمضش عينك ...خليك فاااايق اماااان "
"" تحمل ...تحمل ""
""حاجتنا بدعم ...فيسع ""
اللحظة الفاصلة بين الموت والحياة ...هي ثواني قليلة ...لكن ثمينة ...الذاكرة ماتنجمش تنساها بسهولة وتقعد ليلي شهدها شريط يتعاود كل مرة وبأبطى طريقة وكاينها تعطي للوجيعة في أكثر وقت ...
""صحبي ...ياااا صحبي ..."
تلفت تايه للعبد ايلي يخض فيه ويرج ...كان ياسين كشاكشو طالعة و وجهو احمر و يديه عليها دم ..عاود رجو " لازم نتحركو فيسع ""
تعداو من بحذاه يتجراو بيه ...رقبتو ووجهو مصبوغين بالدم ...متكاتفين عليه زوز من الايكيب ...موش بعيد عليهم ...أربعة اخرين يجرو معاهم في هاك القناص...تعدت من جنبو دنيا ...بشعر مهبتل و عيون زايغة...بوجه شاحب ودبش مغبر بالرمل ...سطعت في كتفو رهوجتو من جديد ...خلتو يتلفت وراه ليلي يسابقو في الوقت بهاك ايلي بين الموت والحياة .
تمتم بقلب مقسوم ودمعة غريبة من عين شايحة نزلت " معا...وية !! "
__🍁🍁__
"شكوووون ؟! "
وقف هاك الطبيب من كرسيه وهو يرمي الستيلو فوق الطاولة ...خبروه بحالة استعجالية جاية ع الطريق ولازم يحضر روحو ..لكن ...اسم المريض خلاه يفقد صيلتو بالعالم لثواني ...بقى يبحلق في الفرملية قدامو وأيلي فهمت من تفاصيل وجهو أنو الحكاية تعنيه و تمسو بارشا .
بلل شفايفو وهو يحاول يلقى صمودو و قوتو ..في حالات كيما هكاكا لازم يكون ثابت و يتحمل ..تدلت من طبيلتو البيضاء بادج زرقاء عليها تصويرتو وتكتب بجنبها اسمو والبوسط متاعو في هاك السبيطار " البروفيسور ، مراد السالمي ...امراض القلب والشرايين "
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Ação🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
