___🍁🍁___
قلّب معاوية عينيه بين تراكن دار محي الدين يلوج في أي حاجة تنجم تفهمهم اصل ايلي صار وتحطهم علئ طريق صحيح ، كل شي كان في بلاصتو منظم ،مرتب ونظيف ...دبش مرتو وولدو كلو موجود ماعادا الدبش ايلي كانو لابسينو نهارتها...دنيا إتبع فيه بعيون مترقبة يعطي تحليلو .. ساعات تعطي خزرات تتفقد محي الدين ايلي يمشي ويجي في الجنينة بعصب وقلة صبر ، يدوّر في التاليفونات يوصلهمش..لكن شي البيبان الكل كانت مسكرة قدامو ...لا مشات لدارهم ولازارت صاحباتها ولاهزت صغيرهم لطبيبو ولا حتئ جار شافهم يخرجو من الباب ...قلبو معادش يطاوق وخاف من دواخلو وكل جوارحو يكونو مشاو في حسابات خدمتو .
عصر معاوية اجناب راسو وقعد في اقرب فوتاي ليه تنهد وهو يخزر لدنيا " مافمة شي يقول انهم تهزو بالقوة من دارهم ...حتئ شي ما يقول انهم تخطفو "
افترضت دنيا " ينجمو استدرجوهم لبرا كيما عملو مع الصحبي"
اشرلها بالتاليفون بين صوابعو " ماكانتش تخلي تاليفونها ايلي بعمرها ماتفارقو ..هي قاصدة تعمل ها الخطوة باش محي الدين يمشي ظنو ايلي صارتلها حاجة"
ضيقت عينها وهي تجي جنبو وتقعد " معاوية...نحسك ماكش مع فكرة أنهم جراتلهم حاجة ؟ موش هكا "
زفر بقوة " شباش نقلك...محي الدين برا اللعبة متاع الاستدراج ...يعني صعيب ياسر يستهدفوه هو والا عايلتو ..هاذي حاجة...ثاني حاجة كل شي في بلاصتو لا تكسير لاضرب لا جيران سمعت حس ولا شافت ناس تدخل وتخرج...ثالث حاجة الدار مرتبة ومنظمة متاع حد ماشي وباش يغيب فترة ...رابع حاجة "
تلفت لمحي الدين في الجنينة وهمس لدنيا " لو تبربشو شوية تو تعرف ايلي من مدة بدات مشاكل بينو وبين مرتو ...اذا قرينا حساب ها المشاكل ..وارد تكون خلت الدار وخرجت كعقاب ليه"
_" باهي ..نقولو كلامك صحيح...نرمالمون تهز دبشها وتمشي لدارهم والا حذا وحدة من صحباتها ..موش تخلي كل شي وتغبر فرد المرة "
مسح معاوية وجهو بتعب " يادكتورة يادكتورة...انتوما النساء تخدمو ياسر بمنطق فجعان الذيب ولاڨتلانو ..." غمزها وتبسم وهو يرجع يتكئ بظهرو ع الفوتاي " امشيلو ..احكي معاه شوية... حاول تفهمو أنو عايلتو لاباس...وممكن ياسر المشكل جيست بينو وبين مرتو موش خطف و فازات "
بقات تبحلق فيه لحظات قبل ماتقوم من جنبو " شنعمل ايلي قتلي عليه ...لكن هذا مايمنعش انو لازم نعرفوها وين ونطمنو ع الصغير وانو بالحق مشكل مرا وراجل موش حاجة اخرئ "
اشرلها براسو باهي وتبعها بعينيه وهي تخرج لمحي الدين ...مابعد عليها نظرو ألا ماوصلتلو وقتها باش جبد تاليفونو وتحدث " لازمنا نحكاو في اقرب وقت " حك جبينو " لا لازم علئ قريب .."سكت لحظة وهو مغمض عينو " اوكي نستنئ تاليفون منك "
علق ورجع بنظرو وين كانت دنيا واقفة قدام محي الدين ...كانت هادية والنسمة تلعب باطراف شعرها ...وهي بهاك الوقفة تقول طابلو تفنن فيه الرسام بكل جوارحو ...قرب اكثر للبورت فوناتر و تمعن اكثر ...هفت كل شي داير بيه وقعد كان ريح خصلاتها ...كلمات صاحبو ترددو من جديد في وذنيه "" الحب ياصاحبي تحير فيه ...يتغلل فيك لين يوصل للعظم ويجرئ مجرئ الدم ...وتكون موش داري ولاعارف روحك ..ماتحس بيه ألا وأنت غارق معاه ..ع الأول تستنكر وتقول لاااا...موش هو ..مجرد اعجاب والعقل لقئ شكون يفهمو...لكن كل ماالوقت يقدم بيك ..كل ماالضباب يتنحئ ويبان بالكاشف بايلي صرت عاشق وممحون زادا ""
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Ação🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
