__🍁🍁__
الحال كان صباح من صباحات الخريف الباردة ، السماء متكمة بغيمها والريح خفيفة تهب علئ ورق الشجر لاعبة بيه في الهواء بالف دورة قبل ماتسلمو للارض ...تحت شجرة السرول العالية كانت هاك الجثـ..ـة مربوطة ، مرا في اخر الستين ،شيب شعرها خارج من تحت غطاء راسها اطرافو متجمدة بسيول من الدم ايلي خرجت من خشمها وفمها المكمم ، يديها وراها ع الجدور اليابسة محكومة بحبل متين ، كانت ضعيفة البدن و ذميمة بارشا لدرجة من بعيد ماتبانش مليح .
وقف معاوية يتفرج فيها ، متمعن في كل تفاصيلها وتفاصيل ايلي داير بيها يحاول يلقط أصغر الادلة و يخرج بفكرة صغيرة تصورلو ايلي صار قبل سوايع ...وقفت بجنبو دنيا ويديها علئ وسطها ...خزرتلو لوقت طويل قبل ماتعطي فرضيتها " ضحية جديدة من ضحاياه ...عقاب قاسي ها المرة "
لبس الڨون متاعو و طبس يتحسس تحت القماشة ايلي مكممة فم الميتـ..ـة " عقاب ها المرة يحكي علئ بارشا غل " وقف معدل ظهرو " لسانها مقصوص "
بكل تقزز تأففت" بففف ملا مريض نفسي هذا !؟ "
ضيق عينو وهو يخزر بعيد وين الناس ملمومة وخايضة " المجد المسروق "
عقدت حاجبها " ما فهمتكش !؟ "
بكفو البارد دورلها وجها لوين كان يخزر " هذا ولد الضحية....المتهـ..ـم رقم واحد في القضية "
_"خاطيه ...كل شي يقول أنها جريـمـ...ـة مكملة للتلاثة الاخرين ...ولدها موش ممكن يكون هو الفاعل "
كل ايلي عملو هو هزة حاجب ...هكا كان ردو...خلاها واقفة و قصد هاك الجوجمة...الناس كي راتو جاي ناحيتهم بدأت تسكت وتخفت ...باشارة منو خلئ ايلي معاه يطلعو هاك ايلي كان موضوع حديث بينو وبين دنيا للكرهبة ...خير هو يقعد معاه وفي كرسي جنبو ...دنيا حست بخبيلة في عقلها ...كلمة المجد المسروق كانت بالنسبة ليها مفتاح ...مدهولها تحل بيه باب جديد في القضية...لكن عقلها ماعرفش هاك الباب ولا عرفتلو ثنية .
__🍁🍁__
حط الصحبي ساق علئ ساق والستيلو كل مرة بين زوز صوابع ، عينيه من علي قدامو ماتحركتش ، خضو بالاسئلة لين معادش لاقيلو جهد يجاوبو عليهم اخرتها اطرشق بالبكاء كيف الصغير و نطق بكل جوارحو " يشهد عليا ربي لاقتلتـ..ـها...وشكون ينجم يضر والديه ...صحيح امي ضرتني وحرمتني من ابسط احلامي ..هانتني قدام الكل واستصغرتني و طيحت من قيمتي ...وصحيح فديت وتخنقت من تصرفاتها معايا ...ساعات نخمم نهج ونخليها...نبعد ونتبع طريق لحياتي يخرجني من هاك الظلمة ايلي عايشها معاهها ..لكن بعمري لا خممت نوصلها بمضرة ولا حتئ نسمعها كلمة توجع ..يعيشك افهمني...وصدقني "
الدمعة كانت شادة صحيح تهبط رغم حاول بكفوفو يداريها ويمنعها " والله لا وصلتها يوم بحاجة...والله الشاهد هي ايلي ظلمتني وياسر..."
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Action🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
