__🍁🍁__
كل واحد فيهم واقف رافع راسو واكتافو و ساوي ظهرو .. علئ نفس الخط يتفرجو في معاوية مستنينو بقلة صبر باش يتحدث ويختار واحد منهم ، من وقت ما صارت الجريمة الجديدة وتعطات لمكتبهم وهوما علئ آحر من الجمر ...شكون زعمة ايلي باش ياخذها ؟!...مسؤوليتها كبيرة خصوصي انها موضوع حساس مس الصغار ...لكن لو نجح فيها وفك لغزها ولقئ فاعلها يكون قدم خطوة مهمة ياسر في خدمتو كمحقق تابع وحدة جرائم العنف .
معاوية مقابلهم ...يخزر في الوجوه حاسس بتوترهم و مستنيتهم ...تمنئ من قلبو لو كانو واحد برك كان وكلهم القضية وارتاح من لعب الأعصاب هاكي...اصعب موقف ممكن القائد يتعدئ بيه هو أنو يضطر يفرق بين اولاد مجموعتو ويتحتم عليه يميز بينهم ...مافماش حل آخر ...وموش لازم يزيد يخليهم يستنو و يتاملو هو ضروري يقول الاسم
" بالنسبة لقضية البنية ياسمين اخترت المحقق ياسين باش يكون علئ راسها "
دنيا حاولت تلقط ردات فعل كل واحد منهم في رمشة عين ...محي الدين مابان عليه شي رغم عيونو تحكي خيبة الأمل ...صدقي حك جبينو فارد عقدتها بين الراحة من مسؤولية القضية الكبيرة والحسرة ع الفرصة ايلي ضاعت منو...الصحبي وجهو تلون وتبدل وصار صفحة مكشوفة وصريحة علئ غشو ..كان ظاهر عليه رفضو لاختيار معاوية حتئ أنو ماحملش يزيد يقعد ثانية فم ..تنفض ونفخ ودار للباب خارج موش متلفت وراه بينما العينين لكل كانت عليه ماعدا ياسين ايلي كان في عالم موازي اصل ..موش مصدق وفرحان عامل جوانح ...من فرحتو نڨز علئ اقرب حد ليه وعصرو بين ذراعاتو عصرة وحدة وطلقو وهو يضحك موش مركز ايلي كانت دنيا ...خذا نفس وردو يحاول ينضبط ويستوي وقفتو و يظهر جديتو ومسؤوليتو ...الكلام هبط عليه معاجم لدرجة ماعرفش شنوة يختار من بينهم " سي معاوية ..اووو...يعيشك علئ ها الثقة العظيمة و نوعدك ..اني باش نعمل كل جهدي باش نحل ها القضية..ومانيش باش نخليك تندم انك عطيتني ها الفرصة "
معاوية كان في وقفتو وحركتو هادئ لكن عينو كانت مركزة علي يد ياسين ايلي مازالت شادة ذراع دنيا وكابسة عليها وموش منفستها ... علئ هناك الحالة ممكن ياسر يندم بالحق أنو عطاه المهمة
" لازم تعطي كل جهدك واكثر من جهدك " نبهو بسبابتو في وجهو " لكن رد بالك وخليك متفكر أنو لو فشلت أو غلطت غلطة في ها التحقيق ...باش تكلفك الخروج من مكتب التحقيقات "
نبرتو جدية ومليانة تهديد خلت ياسين يبلع ريقو بصعوبة وعيونو ترمش بخوف وشك ملي جاي ..تناسئ روحو ويديه عصرت مرفق دنيا بقوة خلاها تعقد حواجبها متوجعة ...قدم منهم معاوية وسللها ذراعها من بين صوابعو وكمل بڨحرة محمح بعدها ياسين محروج ورجع لبيروه يزرب لكن متحمس بدرجة كبيرة وفاقد الصبر للحظة ايلي يبدا فيها قضيتو الاولئ .
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Acción🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
