__🍁🍁__
كل ايلي عملو تبسيمة صغيرة ..خلت عيونو الملوّنة تضيق ...حست بضربات في قلبها مسموعين لا إراديا تبسمت معاهم ...وكانت تبسيمتها ها المرة بلا حتئ نيّة انمّا تلقائية لأقصئ حد ..قام وعيونو ماتقامتش من عليها ...شاور للباب " توا برا روح ...وغدوة ...تو يستناك تشوفلنا شكون قتل ...وشكون بريء "
ظنت أنو مستهزأ بيها لكن قبل ماترد عينيها لقطت الوقت من المنڨالة متاع الحيط ..شهقت ناسية تمسخيرو "ووو ...وين شنلقئ تاكسي توا ..."
خرجت تجري ماتلفتتش حتئ وراها...كيفاش الوقت تعدئ بيها فيسع...هاذي خدمة بلا وقت ماظنتش روحها من أول نهار شتضربها باربعة سوايع بعد الوقت .
البلاصة بطبيعتها مافيهاش خاطر بارشا و التاكسيات تدور بعيد ...كان لازم تمشي لقدام شوية فماش ماتلقئ ولانو الدنيا ليل الكراهب تتعدئ وشوفرتها يقعدو يبحلقو فيها بعين مبققة كرهتها في روحها...تمشت وجت و قررت بينها وبين روحها تعود تاخو كرهبة بوها وتجي بيها للخدمة ...واول ماتجيها فرصة تاخو كرهبة خاصة بيها .
معاوية كان في كرهبتو يسوق ..يشوف فيها من بعيد كيفاه واقفة و تمشي وتجي وباين عليها القلق...ورغم أنو ماسبقش وعملها ...قرر يوصلها في ثنيتو ...كان هذا ايلي باش يصير لولا كرهبة ياسين ايلي وقفتلها وسبقتو...نقص في الفيتاس وبقئ يدهده ..يشوف فيها تضيحك وطلعت تجري معاه...ميل فمو ...هو اصلا موش مسانس يركب ايلي يخدمو معاه...فأحسن كي ماطلعتش بجنبو ..خلي يروح يرتح فخار ربي فاش قام عليه تشغشيبة بتوصيلها.
وقت وصل لدارو لقئ كل شي تصلح ...جاب ربي كلم شكون ريڨلو الشباك وقت هو في الخدمة ...دخل دوش وخرج بالكاب ينشف في شعرو ...حل بلاكارو يلوج في لبسة للنوم وعينو وحدها مشات لهاك التصويرة ع الطابل د نوي ..كان فيها هو و واحد آخر فرد عمرو ...الزوز بالزي من حفلة تخرجهم وكانت الضحكة حاكمة علئ شفايفهم ...قعد علئ اطرف الفرش وخذاها بين يديه متمعن في هاك الوجه...ذكرياتو مع صاحبها كثيرة و اخر ذكرئ عليه كانت موجعة...مازال قلبو معاها ينزف..
صونئ تاليفونو وايلي طالب كان عفاف ..لحظات قعد يتفرج في رقمها قبل مايهز " وي "
" قلت انك باش تستقيل ...ياخا هاك بدلت رايك وخذيت قضية جديدة "
تنهد وهو يمسح وجهو بكفو " الظاهر أنو قراري ماعجبكش "
_" أنت تعرف انو القرار يخصك وحدك ...لكن آخر مرة قتلي انو اليد ايلي ماخذاتش حق زميلك ...ماتستحقش تشد سلاح مرة اخرئ...موش هذا السبب..ايلي خلاك تختار الاستقالة "
تنهد " عفاف...تاعب ...وأكيد أنت تاعبة...برا ليلتك زينة "
مااستناهاش تزيد تحكي وعلق وقام لدبشو يبدل فيه...في عقلو تدور حكايات وحكايات ..منهم ايلي صار ومنهم ايلي تمناه يصير...هكا هو في كل ليلة يصعب نومو و يطول ليلو و عينو ماتعرف النوم الا اخر الليل وطلوع النهار .
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Acción🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
