__🍁🍁__
عينيه حمراء دم ..تڨدح نار وثار ...عروق نواظرو و رقبتو ظاهرين خصتهم باش ينطقو بدمهم ...يهد في هدة ماتبشرش بخير ...ايلي يشوفو يعرف أنو ليلة موش باش تكون طبيعية في التحقيق ...وجه معاوية الآخر باش يشوفوه...وبالنسبة لدنيا ايلي ماتعرفهوش أكيد باش تتفاجأ وتتصدم فيه .
دخل ومع دخولو كتفت دنيا يديها ووقفت في بلاصتها حابسة وراكحة وحاضرة لسوايع طويلة لازم تكون فيهم فايقة علئ اخرها...دوبلاش خزر البلار ايلي يفصلهم وتلفت لهاك ايلي ع الكرسي ماخذ راحتو ويتبسم مأكدلو أنو الحرب بينهم بدات وهو علئ استعداد كبير...ضرب ساق الطاولة خلاها تمس فم معدتو ومنها يتأوه موجوع ...فيسع ماتدارك الوضع ورجع عدّل ظهرو وتبسم لمعاوية من جديد..متحديه يزيد ويعطي ماعندو ...مال عليه الكوميسار وذراعاتو محاوطين اطراف الطاولة " عندك حلّين ساهلين ماهلين...الأول تجيب من الأخير وتحكي ايلي عندك لكل ...وهنا تربح اعصابك ووقتك ووجيعة راسك ...أما الثاني " حرك رقبتو يمين ويسار " فالنطيح للصباح " ضرب بكفو ع الطاولة " ومصيري انطقك ...اذا موش مع طلوع الشمس ..أكيد مع خروج الڨمرة"
كان يخزرلو ببال واسع، أستناه نطق اخر كلمة وسأل ببراءة غريبة " سي الكومي...سار ...أنا هوني علاه ؟! وشنوة هوما الحكايات ايلي تحبني نخرفهملك ؟ "
هز معاوية حاجب بحاجب " صار ماتعرفش ...يالطيف عليك ...جيناك علئ غفلة ماخليناكش حتئ تتذكر أنت شعملت " لعق شفايفو وحط يديه في وسطو وبنفس التبسيمة وصلو مساج أنو قاريه كيف الكتاب " نفكرك ونربح فيك ثواب ..أنت ياسيد المشتبه فيه الرئيسي في قضايا القتـ..ـل ايلي قاعدة تصير من فترة في حق رجال ونساء كبار " دار علئ جنب الطاولة ووقف حذاه علئ بعد خطوة والا اقل " علاه قتلتهم ؟؛ ...حطوك صوت الحق وناصرو ...والا خاطر عشت في عذاب أشبه بالعذاب ايلي عذبوه هوما للصغيرات..فقمت أنت لاعبها بطل وخذيتلهم حقهم ..وحقك الضايع من سنين "
غموض كبير شهدو في حدقاتو ...غيوم مكدسة حكايات واسرار تعدت لثواني في عيونو ..بعدها رجع يتبسم و بنفس النبرة الهادية سأل " سيد الكومي...سار...علاش تحكي بالضبط...فهمني وحدة وحدة ...مخي علئ قدو...جاوبني علئ قد فهمي...يعني أنا متهوم بجرايم أنت مالقيتلهمش صاحبهم..فاخترتني أنا ..." قوس حواجبو راسم براءة غريبة " علاااش أنا بالذات؟ ...لازم يكون عندك دليل يثبت اتهامك ...ياخا شديتني بالجرم المشهود....والا عندك شاهد...والا فوق الجثـ.ـث لقيت شعرة من شعراتي "
ضحك معاوية وهو يخزر البلار الفيماي وين كانت وراه دنيا متبعة حديثهم "ظاهر فيك تقرئ ياسر صفحة الجرا..ئم في الجريدة "مال اكثر عليه " و نفهم من كلامك انك حابب علئ لعبة القطوس والفار معايا "خزر ليديه وين الڨون تنحت وبان عليها حرق بين صوابعو " أكيد هاذي أمارة صغر حاشم بيها خلاتك تحب تخبيها بڨون "
لعب بصوابعو المحروقة " القفاااازااات برستيج وبرا سيد الكومي سار " هز حاجب بحاجب وهو يوريه وجهو مرة يمين ومرة يسار " بالله موش نستاهل نكون ببرستيجي "
أنت تقرأ
تــجاعيٕد ســامّة ☘️( مكتب التحقيقات الخاصة ) ☘️
Action🌼الإسـم : 🦋تـجـاعـيـد ســامّــة 🦋( toxic wrinkles ) 🌼الكاتـبـة :🦋 ňòùdã🦋 🌼النــوع :بوليسي ،جريمة ،اثارة ،تحقيق رومنسي ، اجتماعي 🚔 🌼تاريـخ النـشر : 2023 : قريبا 🌼القـصّـة : تدور احداث القصّة حول محقق من مكتب التحقيقات الخاصة يسعئ رفقة فري...
