عندما عادت جواهر وجدت أحمد ينتظرها ...ومعه إقتراح...فتح موضوع
المؤتمر أمام أمها وهي صامته إلى أن وصل لأقتراحه ....
أحمد : أنتي بتسافرين وأنا ومرتي بنروح معاج ...
جواهر: وأمي ؟؟؟ بتقعد بروحها؟؟
أمها : أنا ماعلي شر ...روحوا أنتو ولا تحاتوني..
جواهر: مستحيل...أنسو...
أحمد : من قال بتقعد بروحها؟؟ عيالي بيجون عندها مع خداماتهم...وساره
بترقد معاها والباقي في الغرفه اللي قدامهم ...
جواهر : بس سارة عمرها 14 سنه يمكن تبغي ترقد بروحها ...
أحمد : إذا بغت... الغرف شكثرها فوق ...وأحنا بنتطمن عليهم كل يوم...
جواهر: والله أنا قلبي قارصني...مهب لازم أروح..بعتذر..
الأم : والله ماتعتذرين وتروحين...أنتي تعبتي وايد في شغلج ...تبغين تهدمين
كل اللي سويتيه في لحظه..قلتلج أنا ماعلي شر أن شاءالله...ومعاي عيال أحمد
يسلوني وعبدالله بيمر وأكيد نوف بتجينا بعد...
جواهر: أنزين على الاقل خل مرتك....ليش تجي ؟؟؟ مهب أحسن تقعد معاهم؟
أحمد : لا والله ..أنتي بتكونين مشغوله طول اليوم وأنا شسوي؟؟ أجابل
الطوف!!!
بأخذ مرتي وبنروح أسبوع عسل بدون العيال...
جواهر: خلاص ...خلاص ...اللي تبغونه بسويه
جواهر: اقول ...للحين فيزة بريطانيا مانتهت صح؟
أحمد : أيه باقي 3 سنين..
جواهر : حتى أنا ...عيل طرش المراسل يسوي فيزا الشنغن لكم..وأنا الشغل
بيسونها لي ..
أحمد : أتفقنا ...بس ترى هاه... السفره عليج...
جواهر: أنت على راسي بس مرتك أنت عازمها وعلى حسابك مالي شغل...
أحمد : والله ياخوفي تصير السفره كلها على حسابي...ماخذ معاي حرمتين...
ماظن يخلون شي في السوق حق الناس..
جواهر : ظريف ...ههههههه
أحمد : ألا بسألج ...للحين مدرسة الفرنسي تجيج؟
جواهر: ايه...تجيني كل سبت ..ذكرتني ...بتصل فيها بخليها تجيني كل يوم..
أحمد : والحين أنتي صرتي ترطنين مثل الفرنسيين والا بس جذي..مخاسير
عالفاضي؟؟
جواهر: لا ذيه ولا ذاك... يعني هه...أطقطق...بتمرن زيادة هالايام..
أحمد: وشو؟؟ هالتطقطق من زمان...وش الجديد ...؟
جواهر: يعني ...هه...تحسنت شوي ...صرت أقدر أكون جمل كاملة ...
