مر اسبوعين كان علي فيها مشغول بالتدريبات والسفرات من مدينه
والي كان متفق مع ريمان انه اول مابيفضى بيفاتح اهله بموضوع الملكه عشان يخلونه قريب
، وفي غضون هذا الانشغال وللاسف خسر الهلال بكاس اسيا وكان باقي له مباراه وحده بكاس الملك بعد اخر مباراه لعبها مع الاتحاد وفاز الهلال بهدف واحد بسبب خطأ من مدافعين الاتحاد
(مدري هل فيه قراء اتحاديين لكن ماقدرت ما اذكر السبب الاساسي بفوزنا " شكراً حجازي 🤭🏃♀️" )
تبقت مباراه واحده بس تحدد من الفائز بأغلى الكؤوس كاس الملك والي الهلال كان بيواجهه فيها الوحده ، والي كان باقي عليها يوم واحد بس
الساعه 9:20
صحت من النوم بسبب الحراره والكتمه الي تحس فيها ،قامت من السرير وهي تبعد ملابسها الي لصقوا بجسمها من العرق الي كان ماليها ، تلمست رقبتها وهي تبلع ريقها من الالم الي حست فيه اول ماحاولت تتكلم ،قررت تدخل تتروش تبرد على نفسها يمكن الحراره تروح شوي وبعد ماتخلص تسوي لها شي حار تشربه
دخلت مرام على ريمان الي بالمطبخ وقالت وهي تفتح الثلاجه : غريبه مو قايمه مبكر حتى صلاه الفجر قومتك تصلين رجعتي نمتي شكل الادوار بتنقلب
اكتفت ريمان بأنها ترفع اكتافها قاصده انها ماتدري
قربت مرام وطالعت فيها باستغراب : ليه ماتتكلمين؟ من قاطع لسانك
شمقت لها ريمان وتكلمت بصوت مبحوح كأنها طقاقه توها مغنيه بعرس : مدري من اول ماصحيت وحلقي يوجعني وكانت حرارتي مرتفعه بس نزلت شوي يوم تروشت
حطت مرام يدها على فمها بصدمه من صوت ريمان الي خلقه مبحوح والحين زادت بحته بعد مامرضت : لعد تتكلمين اذا تبين تتكلمين اشري لي بيدينك بسم الله اللهم سكنهم مساكنهم ذي حوبه الجن الي رحنا بيوتهم محد غيرك غير راي علي وخلاه يرضى نروح
تنهدت ريمان باستسلام لانها ماتقدر ترد وماتبي حلقها يوجعها اكثر ولو انها
ردت بأول مره كانت بس تبي توضح لمرام ليش هي ساكته ولعلها ندمت
بالسياره متجهين للجامعه والي اخيراً اصلحوا الاعطال الي صارت فيها كانت ريمان تسوق وحاطه جنبها كوب شاي حار تشربه عشان يخف الم حلقها ولو شوي
( زعلانه على الثلج ذا اليومين كل ماجيت باكله شرقت ف خلينا على الشاي الي مدمنته ذا الفتره )
وعلى يمينها مرام الي كانت متكيه على الجوال
رن جوال ريمان معلن عن رساله وصلت
ماشافتها ريمان لانها كانت منشغله بالطريق وماتحب تفتح جوالها وهي تسوق
