بعد توتر وصراخ واحباط صفر الحكم معلن عن انتهاء المباراه بفوز الفتح بهدفين مقابل خساره الهلال بهدف من صالح على آخر الدقايق
طلعوا البنات من الملعب بحزن وريمان اولهم
ركبوا السياره وحركت ريمان
قاطعت مرام الصمت وقالت : وشدعوه بنات نفستوا نعوضها بالجايات ان شاء الله وانتي الجوهره المفروض مستانسه صالحك جاب هدف احمدي ربك
لفت عليها الجوهره وقالت وهي تعقد حواجبها : مين قال اني مو مستانسه بعدين لاعاد تدلعين ليتك راقده على ذا الدلع واذا تبين تواسين احد واسي ريمان وعلاوي
مدت ريمان شفايفها بتفكير وهي مفهيه : هممم علاوي؟ بعدين ليش انا افكر ومهتمه واذا دلعته وش دخل امي
(قيره المرأه الشرقيه القيوره بدت تطلع )
كانت تفكر وهي عاقده حواجبها باستنكار كأنها تكلم احد صدق
قاطع تفكيرها نوره الي تدقها على كتفها : هي يالطيبه وين وصلتي انتي ؟ لي سنه انادي
ضحكت نوره وهي تقول : تفكر بحبيب القلب اكيد
ردت ريمان بنفي : ومن قال ؟
قالت مرام وهي تدق نوره والجوهره عشان يسكتون : ماعليك منهم ذول بسألك في مباراه للهلال ضد التعاون يوم الجمعه بتروحين ؟
لفت عليها ريمان وقالت : اليوم رحت وخسروا تبيني اروح يوم الجمعه بعد ؟
ردت مرام : حمدلله والشكر فال الله ولا فالك مين قال بيخسرون ان شاء الله يفوزون بس لو تسكتين وماتجيبين طاري الخساره بإذن الله فايزين
ناظرت ريمان بالطريق وقالت ببرود : بشوف مدري
وصلت ريمان البنات السكن ورجعت مع مرام البيت جلست على الاريكه
وقالت وهي تفتح ربطه شوزها : يقلع بليسك حر موت ليش تخليني البس ذا البلوفر
جلست مرام مقابلها وقالت وهي تبتسم : كنت عارفه انه الوضع بيصير حر مع الزحمه والصراخ وكذا بس خليتك تلبسينه عشان الي عليه
رمشت ريمان اكثر من مره بفهاوه ونزلت راسها تدور بعيونها وتطالع البلوفر : وش الي عليه
قلبت مرام عيونها وقامت وقفت ورا ريمان وخذت صوره ومدت الجوال لريمان
ناظرت ريمان للجوال لمده وشافت مكتوب بخط عريض على البلوفر البليهي وتحته رقم خمس قالت بعدم فهم : ايش الي افهمه من كل ذا ؟
تنهدت مرام بتعب وقالت وهي تجلس جمبها : ريمان بسألك من متى انتي غبيه ؟
اشرت ريمان على نفسها وهي تقول : انا غبيه ها ؟ شلون ؟
قامت مرام وهي متنرفزه وودها تبهد ريمان بس تمالكت نفسها واتجهت لغرفتها
مر يومين ريمان كانت مشغوله فيه بالجامعه واختبارتها وعلي طول وقته يتدرب
