همهمت ريمان بتفكير لعلي : يعني الحين هذي خطتك
تكتف علي ورد بفخر : اي شرايك
طالعته ريمان وهي معقده حواجبها وودها تكفخه : شوف ان ماقمت الحين وتكرمت وطلعت برا الغرفه بهبدك
عقد علي حواجبه معترض : خير تنمر والله فكرتي حلوه !
اول ماخلص علي حلطمته صفقته المخده الي من ريمان على وجهه
: تنكه انت ؟ شلون اروح اقوله ابي اقابله واكلمه بموضوع وانا اخر مره كافخته بيصدق يعني سبحان الله فجأه بيحن قلبي وابي اقابله لا لا جب غيرها
تأفف علي يفكر بخطه ثانيه
داهمتهم مرام فجأه : شتخططون بدوني يالخونه
تكلمت ريمان تطالع بعلي : اي وشتقول انت اروح ولا ؟
فهى علي بالبدايه مافهم وشتقصد بعدين استوعب انها تصريفه : اءء انا اقول لاتروحين ما احس بترتاحين معهم وانتي مو مرا ميانه
هزت ريمان راسها بتسليك : يعني تقول كذا
زم علي شفايفه بتأكيد مصطنع وهو يهز راسه بموافقه
نقزوا الاثنين من صراخ مرام : اقول اقولل شايفني بزر انت وياها انا ماقلتوا لي السالفه من الالف للياء بدوسكم
بعد استقعاد من مرام اضطروا علي وريمان يقولون لها كل شي
شهقت مرام بصدمه : ايا الخايسه ومتى كنتي تفكرين تقولين لي
ردت ريمان ببرود : مالت تراه مو شي حلو عشان اجي ابشرك واقولك بعدين انا زين قلت لعلي عشان اجي اقولك
رفعت مرام حواجبها وهي تبتسم وتغمز : ايه قولي كذا من البدايه ماقلتي الا للحب وانا صديقتك من 10 سنين ولا نطقتي بحرف ومعطتني وضع الايمو
اشرت ريمان بأصبعها تهدد : يابنت اللذينه يامرام كم مره اقول لاعاد اسمعك تشبهيني ذا التشبيه الخايس زيك
كررت مرام بعناد : الا ذا الصدق يالايموو الي محد قدر يفك عقده الايمو منك غير عل-
سكتت من المخده الي جاتها بوجهها من ريمان
حط علي يده على فمه يكتم الضحكه الي جاته يوم شاف المسكرا حقت مرام اختربت بسبب الضربه
صفقت مرام علي على راسه : وجعه وش الي يضحك انت الثاني
دفها علي عند المرايا وشافت مرام شكلها فيها
