راحت ريمان للصاله وردت وكانت مرام الي قالت :الو شسمه ريمان ترا احتمال كبير اتأخر واجي متأخر من العرس لان تعرفين ساره صديقه العروس واكيد بتجلس معها وبتقضي وقت طويل بليله عمر صديقتها ومافي احد غيري يرجعها زوجها مسافر للشغل ومابي تطلب اوبر احد غريب بآخر الليالي وانا موجوده
ردت ريمان الي تناظر بعلي وهو واقف متخصر وقاط اذنه عند السماعه يبي يسمع : تمام ماعندي مشكله بس ليه ماقلتي اني بنتبه لبزران ثنين كان اخذت احتياطي
عقدت مرام حواجبها وردت باستغراب : اثنين؟ من الثاني
ابتسمت ريمان وردت : بزر اسمه يبدا بحرف العين اشغلني الله يشغله بنفسه
ابتسمت مرام بعد مافهمت قصدها وقالت : اهااا معليه حبيبتي الله يصبرك ذوقي الي ذقته كلها كم ساعه وتفتكين
ابعد علي عن السماعه وهو رافع حواجبه بعد مافهم ايش يقصدون وصفق ريمان براسها وطالعها من فوق لتحت ورجع للاريكه على جواله
سولفت ريمان مع مرام شوي عشان تضيع وقت وسكرت منها بعد ماشافت انه ابوها يتصل ردت وهي ترجع تجلس على الاريكه وعزوز يلعب بوجهها و يقرص بخدودها : الو هلا ابوي معليش تأخرت بالرد بس كنت اكلم صديقتي... وصلوا يعني؟..... طيب عندهم الجهاز حق الدفع عشان ماعندي الا بالبطاقة فلوس...... الله يهديك كان خليتني انا ادفع.... طيب يلا الحين اطلع لهم
سكرت ولفت على علي الي يناظر فيها ورجع ناظر بالجوال اول مالفت عليه
قالت باستعجال : علي قم اطلع للعمال وافتح لهم الباب عشان يدخلون الاثاث حق غرفتي
رفع علي حواجبه باستنكار وقال : شلون اطلع لهم انا بزر ماعرف ؟
صغرت ريمان عيونها وقالت : اقول لولا انه عندي بزر كان طلعت لهم اخلص بتقوم ولا لا
رد وهو منشغل بالجوال : ماني طالع قلت لك انا بزر
قامت وحطت عزوز بحظنه وهي تقول : امسك البزر يالبزر وجع انا بطلع منّة الله ولا منّة خلقه
طلعت وفتحت الباب وبدوا العمال يدخلون الاثاث وهي تروح وتجي معهم عشان تعلمهم يحطون كل شي بمكانه
خلصت وطلعوا العمال واتجهت للمطبخ تاخذ فوطه وحق التنظيف عشان تمسح الاثاث مرت من عند الصاله ووقفها علي الي قال : مطوله الاخت؟
طالعت ريمان فيه من فوق لتحت وقالت : لا مو مطوله بعدين لو صرت مطوله شبيصير يعني وش عندك انت تبيني اخلص بسرعه خلك مفيد شوي وامسكه
