صباح اليوم الموعود يوم لقاء خالد وريمان بعد انقطاع 6 سنين والي تأجل وصار بعد اربع ايام من خطبه علي لريمان بسبب ظروف السفر الي مرت فيها ام خالد
بعد ما اعلنت ريمان الموافقه وصارت خطيبه علي رسمياً قرروا تكون الملكه بعد اسبوع
همهمت ريمان بأنزعاج من صوت دق الباب ، فتحت مرام الباب
وقالت وهي تنط على السرير : يلاااا قومييي حبيب القلب يستناك برا عازمك على الفطور
فتحت ريمان عيونها بقوه بعد ماكانت مسكرتهم ، ابعدت مرام عن السرير
وسألت وهي ترفع شعرها : انا لحالي ولا بتجين معي انتي بعد
ابتسمت مرام وقالت بخبث : هو الصراحه ماحدد بس اذا تبين اجي بركب السياره قبلك
تنهدت ريمان بملل وتمتمت وهي تقوم متجهه للحمام : وانتي ماتصدقين على الله علطول وافقتي
ضحكت مرام وقالت وهي طالعه : اكيد حبيبتي طلعه بلوشي بدون ما ادفع مابقول لا
تجهزت ريمان وخذت معها كوب ثلج تاكله بالطريق وهو شوي وتتجمد من برودته
ركبت مرام ورا متعمده عشان تخلي ريمان تركب قدام ف اضطرت ريمان تركب جمب علي
قالت وهي تركب وتسكر الباب : السلام عليكم
حرك علي السياره وقال وهو يلقي عليها نظره : وعليكم السلا-
وقف بعد ما لاحظ كوب الثلج الي ريمان تاكل منه
غمض عيونه لثواني وهو يتنهد بتعب ويتحلطم لمرام : مرام انا خلاص بتنفقع مرارتي ! جايه بكوب ثلج لو كبيته عليك جمدتي
هزت مرام راسها وردت وهي تنط بالوسط مابينهم : والله شوف انا حاولت بس استطعت وما استطعت يوم تقولي ما باكل خلاص والعشر الباقي جالسه عند الثلاجه تاكل ثلج
لف عليها علي وقال بتوعد : اصبري علي بس اصبري خلينا نوقف عند اشاره وتشوفين
عطته ريمان نظره من فوق لتحت وقلبت عيونها بدون اهتمام مكمله تاكل ثلج
كمل علي يسوق ومع حظه الخايس مافي ولا اشاره مقفله نصهم مفتوحين واذا كانت وحده مسكره تفتح اول مايوقف
وصلوا للمطعم ولف علي على مرام وقال : اسمعي انا حاجز طاوله من اول انتي انزلي شوفي اكلهم وش يبيعون وانا بشوف آخرتها مع ذي
نزلت مرام وبقى علي مع ريمان الي مكمله تاكل ثلج ببرود
لف عليها علي وقال وهو يحاول يتمالك اعصابه : انا ماعمري شفت احد يمرض نفسه ويرمي نفس للتهلكه زيك
