و يبقى الألم

مناقشة🕊

عاملين ايه؟ أتمنى تكونوا بخير.
المناقشة دي عبارة عن إجابة لكل الأسئلة اللي وردت لي أو اللي ممكن تكون دارت بخاطر أي حد
__________________

بسم الله الرحمن الرحيـــم

س١: مين أحلام و مين نجوى؟

ج١: النسخة للأولى من الرواية كانت زوجة "رضوان" اسمها "أحلام"، النسخة دي كان فيها أخطاء نحوية و إملائية، عدلت السرد و عدلت معاه اسم "أحلام" و اتغير ليكون "نجوى"، بمعنى إن الاثنين نفس الشخصية

س٢: ليه أفنان شوية تتعامل مع مراد كويس و شوية لأ؟

ج٢: السؤال دة تم إجابته في الفصل التاسع لكن للناس اللي مأخدتش بالها، "أفنان" لما تعرضت للاغتصاب و "مراد" أشرف على علاجها، قرر إنه ياخد لها حقها من اللي عمل فيها كدة، لكن لما سمع كلام أبوه و قرر يشيل يده من الموضوع "أفنان" حست بالخذلان و حاولت تكرهه لكن غصب عنها قلبها بيحن له لما تفتكر كل حاجة عملها ليها قبل كدة

س٣: ليه رضوان فضّل مراد و نجوى فضّلت جاسر؟

ج٣: تفضيل الأبناء دة شئ منتشر بين الأهالي خاصة في دول الوطن العربي، و بالذات تفضيل الذكور على الإناث و دة هتلاقيه كتير أوي في القرى.
اليونسيف لما عملت بيان تطلع فيه نسب تفضيل الذكور على الإناث في الوطن العربي طلع 35% من التفضيل دة موجود في مصر و دة رقم مش قليل
هتقول لي طب اشمعنا "مراد"؟
هقول لك بسبب الظروف الصعبة اللي مر بيها و هو صغير أبرزها قتل والده قدام عينه و كذلك سجن أمه، عشان كدة "رضوان" حب يعطي له الحنان و الأمان اللي افتقده بدري.
إحنا مش بندور ل"رضوان" على مبررات، رضوان غلطه عظيم و هيتحاسب عليه كونه السبب الأول في معاناة بنته، تعرض بنته للاعتداء بسببه دة شئ مش بسيط و ملهوش أي مبررات
أما عن "نجوى" فدي ليها قصة ثانية خالص هنعرفها مع الأحداث

س٤: هل نهاية سمر و أفنان هتكون منصفة كونهم أكثر الشخصيات اللي عانت؟

ج٤: النهاية واقعية تماما، كل واحد في الرواية نهايته هتكون واقعية و باللي يستحقه

س٥: هل النهاية معروفة و لا بيتم العمل عليها؟

ج٥: النهاية مكتوبة و معروفة و لسة فاضل عليها ياما

س٦: هل جاسر بعد اللي حصل له هيرجع عن الطريق اللي كان ماشي فيه و يتوب لربنا؟

ج٦: هو كدة كدة جاسر هيرجع عن الطريق دة بس مش بسبب اللي حصله، هو بعد ما يخف هيروح الnight club اللي كان متعود يروحه و هيكمل شرب و رقص و الدنيا تمام معاه على الآخر

س٧: مراد هيعمل ايه مع سمر بعد ما تطلع من المصحة؟

س٧: هو يعتبر حرق صغير بس مفيش مشكلة
"مراد" هيبعد عنها تماما لإحساسه إنه كدة بيخون وظيفته، و هيحاول ينساها بس مش هيقدر و هيعوز يقرب منها تاني بحجة إنه حابب يساعدها في إنها تاخد حقها من أهلها

س٨: هبة لازمتها ايه في الرواية؟

ج٨: هبة دي للي مش عارفها هي صديقة "مراد" من زمان و مانت مسافرة بقالها وقت و لسة راجعة، ببساطة البنت دي حكايتها إنها بتثق في الناس بسرعة و لما كانت في الغربة كانت بتثق في أي حد بيقول لها صباح الخير و دة سبب لها مشاكل كتير هنستعرضها الفصول اللي جاية
______________________

كدة أظن إني جاوبت على أكثر الأسئلة شيوعًا على الرواية، أهم حاجة قبل ما أختم
"الرواية مش قصة رومانسية بين دكتور و مريضته أو مجرد عقدة بين بنت و بباها، القصة أكبر من كدة بكتير. الرواية بتحكي عن اضطراب ما بعد الصدمة أو اللي هو [تروما] و عقدة نفسية عويصة و محتاجة حل و ما بين شبح ذكريات المفروض يتنسي و مشاكل ورث و تفضيل و ثقة، الرواية بتناقش واحدة من أهم القضايا و هي اغتصاب البنات و دي قضية مش عابرة و خصوصا إنها زادت في وطننا العربي، الرواية اجتماعية بحتة، لكن دة لا يمنع وجود الرومانسية و الدراما ليها، عشان كدة اللي شايف إن الرواية كئيبة أو أوفر بلاش يقرأها و اللي متضايق من تأخيري ممكن يستناها تخلص و تنزل PDF، دة كان توضيح للي مش واخد باله أو مش حابب يكمل قراءة"
و في النهاية اللي عنده أي سؤال يحطه في كومنت و هتنزل الإجابة في أسرع وقت، و طبعا أتشرف إني أعرف رأيكم في الرواية لحد هنا و توقعاتكم للقادم...

See you❤️