كـحِـيـل الـعَـيـن

قَلَق

°°°

< ٥:١٥ مساءً >

لا بس أفكر ..
متى يصحى الجثة ذا ؟

إستأجرت شقة مفروشة في آخر أبها بميتين ريال رخيصة وما فيها غير غرفة لأني ما بظل فيها إلا يوم واحد ، وقدني مضمد للولد نص جروحه وشفت بطنه ما فيه شيء وجواله بيدي أبحث فيه عن كيفية تضميد إنسان متصفق ، وبس أخذت كمية من المعلومات رجعت للولد وضمدت جروحه الباقية بإجتهادي الشخصي لأني ما فهمت شيء من البحث اللي دخلت عليه ، لما خلصت ناظرته برضا وأكتشفت إنه يلبق لي أكون دكتور ! ناظرت لوجهه كيف كأنه ميت وقررت أخرج لبيتي أشوف الأوضاع وأرجع له بعدين ! أشتريت موية ووجبة من ماك لو صحى يعني ياكلها عشان ما يموت

وخرجت مقفل الباب بالمفتاح راجع لسيارتي ، لما دخلتها فيها دم ووصخة فوديتها لأقرب ورشة ورحت البيت كعابي ! دخلت بيتنا وتلفت حولي ما شفت أبوي ولا حسه وما دريت لو سيارته برا ما شيكت ، طلعت لغرفتي وتروشت وضمدت راسي بشاش ما كان متضرر غيره أصلًا وقد هو الدم جف ، لبست بنطلون أسود وبلوفر ثقيل كحلي البرد ما يرحم ! وفتحت لابتوبي وأول ما إستقبلني في سطح المكتب هو ملف لصورة البنت يارا ، بدأت أفكر وأفكر .. ياخي لو نشرته باخذ ذنب كل واحد شاف صورة هالبنت فوق ذنب إني نشرته فوق ذنب إني مهددها فيها وضاحك عليها .. وأنا أعرف نفسي مستحيل قلبي يطاوعني وأنشرها

أحذفها ؟
بس أخاف إني أحتاجها !
وسط تفكيري في إني أحذفها ؟
أقيمت الصلاة وإنقالت هالآية !

" ذَلِكَ بِمَا قَدَّمَت أَيْدِيكُمْ وَأَنَّ اللَه لَيْسَ بِظَلَّامٍ لِّلْعَبِيد "

وبسرعة بمجرد ما قالها الإمام حذفت الصورة ، أقسم بالله إنها مو صدفة وإن هالآية ما أنقالت وأنا وسط تفكيري إلا وهي رسالة من ربي وتحذير وإن غيث وأخته ما لهم حامي غير الله عز وجل وهالحامي أجبر وأقوى وأشد قوة وبطشًا من كل رجال واقف بظهورهم ولا أنا ولا غيري اللي قد هالحامي وكلنا ضعفاء قدام جبروته ! قمت ورحت أصلي وأنا أتفل على الشيطان وما راح أقول لغيث إن الصورة محذوفة لكن لو صار وعصبت من غيث وخرجت عن طوري ما يكون عندي شيء أسويه وأكون قدني حاذفها ، وفعلًا خلصت صلاة المغرب ورجعت لسيارتي اللي تنظفت وأخذتها راجع للشقة لعل غيث صحى من نومه