تحطم قلب ماجد عندما علم بأن بدر تمت خطبتها وانها ستكون لغيره , لم يعرف اين يذهب أو إلى من يلجأ, أراد أن يصرخ ويبكى فى آن واحد ليخرج حزنه وغضبه, لم يكن غاضبا من بدر بقدر ماكان غاضبا من نفسه وضعفه وغاضبا من الفتاة التى سممت حياته عندما دخلت بينه وبين حبيبته , إستجمع شجاعته وذهب لبيت اهله وعندما فتحت سمية الباب نظرت له بعيون جريحة دامعة تحمل الكثير من العتاب, القى ماجد نفسه فى حضنها وقال: ماما انا محتاج لك ياماما. محتاج لك قوى...
لم تتحمل سمية فهى ام قبل كل شئ , تمزق قلبها لرؤية إبنها تائه وحزين وتألمت عندما سمعته يبكى وربتت عليه وسألته: مالك يابنى؟
بدر ياماما هاتروح منى.. هاتروح منى..إتخطبت
احنت سمية وجهها وهى تقول: هى راحت منك من يوم مابدأت تعرف عليها سمر...
وقف ماجد بعصبية وقال: إيه ؟ الكل هايعلق لى المشنقة علشان غلطة؟ ندمان, ندماااان وأستاهل ضرب النار بس بأحبها والله بأحبها ...
إنت اللى عملت فى نفسك كده, كان زمانها مراتك دلوقتى بدل ال..... أستغفر الله العظيم,, متخلنيش آخد ذنب
طيب اعمل إيه علشان تسامحونى؟ قولى لى أعمل إيه علشان اكفر عن الذنب ده؟؟
سمعو معا صوت زين يقول: وبعد ماتكفر عن ذنبك عايز إيه مننا؟
إستدار ماجد ونظر لوالده بإستعطاف وأسرع نحوه ,إنحنى يقبل يده : بابا.. لو بتحبنى سامحنى وإرضى عنى, إرضو عنى علشان حياتى تتظبط زى الأول...
سحب زين يده من ماجد وقال: مفيش حاجة هاتتظبط ,إنت بقى فيه واحدة فى رقبتك.
كان ماجد سيتكلم فرفع زين يده ليوقفه وأكمل: سواء عايزها او مش عايزها بتحبها وإلا لأ؟؟ بقت فى رقبتك وإنت اللى جبتها مش حد غصبك عليها.
أنا هاروح لأبوها وأقول له إنى هاطلقها , انا عملت الواجب خلاص ومفيش حاجة مطلوبة منى ... هاسيبها بس تساعدونى أرجع لبدر..
حرك زين رأسه بالرفض وقال: مفيش فايدة من اللى بتعمله ,, فيه شرخ كبير حصل ومفيش أى حاجة تصلحه...
يعنى إيه انا هاخسر بدر.
إنت خسرتها وحتى لو طلقت البنت دى بدر مش هاتكون ليك... عايز تظبط حياتك عيش حياتك بقى وخليك مع مراتك...
انا مش عايزها...
وضع زين يده على كتف ماجد وقال: بنات الناس مش لعبة والطلاق مش سهل زى مانت فاكر, لو طلقتها دلوقتى الناس هاتتكلم وبرضه هاتبقى فضيحة ..
يعنى إيه؟ أنا هافضل مع دى؟ هاكمل حياتى معاها؟ مستحيل.. مستحيل ...
إسمع أنت وعدتنى يمكن لو نفذت وعدك ولقيتك راجلك وقد كلمتك أرضى عنك غير كده , يبقى متجيش تانى أحسن..
أنت تقرأ
حكاية بدر
Romanceأصعب شئ أن تتعرض للخيانة من الشخص الذى تحبه ومن المقربين وقتها تفقد التوازن وتفقد أيضا الثقة بكل الناس والأكثر تفقد الثقة فى الحب فهل يمكن ان تستعيد بدر حياتها بعد تعرضها للخيانة .
