عادت بدر لبيتها وهى تفكر فى ماجد وكلامه الغريب معها , من أين اتى بكل هذا الأمل فى انها قد تعود له ... ولماذا يهتم بخطبتها او عدمها ؟؟؟ دخلت وهى سارحة وتكلمت معها منيرة: بدر.. هاتتعشى ياحبيبتى.. بدر...
بتقولى حاجة ياماما؟؟
إيه يابنتى عقلك فين؟
مصدعة من الشغل طول اليوم زباين داخلة وخارجة ..
ربنا يزيد ويبارك ... هاتتعشى؟
لأ ياماما انا هادخل أحاول أذاكر شوية. وبعدين انام...
طيب ياحبيبتى تصبحى على خير.
وحضرتك من اهله.
دخلت بدر لحجرتها وكانت ولاء ممدة على السرير تذاكر وإلتفتت لأختها قائلة:إيه الأخبار النهاردة.
مفيش..
مفيش وإلا مش عايزة تحكى لى...
احكى لك على إيه؟
أى حاجة حصلت... يعنى الى إسمه زياد ده طنشك خالص كده ليه؟؟
ماهو جه النهاردة المحل.
قفزت ولاء جالسة وقالت بإهتمام: بجد!! جه تانى؟ ليه؟
كان بيشترى عربية من المعرض هو وأبوه و...
قاطعتها ولاء: وطبعا دخل هو وأبوه للمحل علشان يتعرف عليك..
جلست بدر تقول: وعرفتى منين؟
مش عايزة حداقة يعنى .. جاب امه يبقى فاضل أبوه وبعدين؟
ولاقابلين .. قعدو معانا شوية وإتكلمنا وبس...
بس!! مفتحش موضوع الارتباط تانى؟
لأ....
ضيعتيه...
إبتعدت بدر لتبدل ملابسها وراقبتها ولاء وسألتها: إنت زعلانة من عدم طلبه تانى؟
لأ .. مش زعلانة بس ماجد كلمنى تانى..
إيه؟ تانى؟ البجح هو مش كان وعد... صحيح اللى زى ده هايحافظ على وعده إزاى؟ قال لك إيه؟ نفس الكلام؟
لأ .. فرحان ومبسوط وعنده امل إنى أرجع لأنه شاف زياد مش لابس دبلة وفهم إنى كذبت عليه.
أخ ....مفكرناش فى الحكاية دى... وهاتعملى إيه؟
ولا حاجة يحلم براحته ,انا قفلت قلبى من ناحيته تماما.
جدعة يابدر.. وهاتبقى جدعة اكتر لما توافقى على زياد.
أوافق!! أنا لسه فى شهور العدة وإلا نسيتى؟
هى خطوبة مش اكتر .
هاتعملى زى طنط ألفت...
الست دى بتحبك وعاقلة قوى على فكرة وكل كلامها صح, طول مانت خالية الزفت ده هايفضل يطاردك لكن لما ترتبطى هاتخلصى منه.
أنت تقرأ
حكاية بدر
Romanceأصعب شئ أن تتعرض للخيانة من الشخص الذى تحبه ومن المقربين وقتها تفقد التوازن وتفقد أيضا الثقة بكل الناس والأكثر تفقد الثقة فى الحب فهل يمكن ان تستعيد بدر حياتها بعد تعرضها للخيانة .
