حكاية بدر

فرحة العروس 1

أجمل أيام فى حياة أى فتاة هى الأيام التى تسبق الزفاف تكون مشغولة بالترتيبات وهى تستعد لدخول حياة جديدة وتصبح سيدة بيتها وهذا ما حدث مع بدر الفتاة الجميلة التى تمت خطبتها على ماجد بعد قصة حب أكثر من عامين , كانت بدر تعمل فى محل لبيع الملابس بعد أن أنهت الدبلوم وتعرفت على ماجد كان يعمل فى معرض سيارت بجوار المحل لينفق على مصاريف الكلية ودرس فى كلية الزراعة وإنتظر حتى تخرج وتقدم لخطبتها وستتزوج بعد عدة أيام , طبعا أخذ ماجد شقة إيجار مؤقت ,صغيرة حجرتين وصالة ليبدأ فيها حياته مع عروسه بدر ,كانت الشقة قريبة من بيت امها تبعد شارعين فقط , له اخان يعملان فى السعودية ووعدو بأن يجدو له عمل قريبا لتتحسن حالتهم.

دق الباب فى شقة عبد العظيم وتحركت سمر بتكاسل لتفتح ووقف ماجد امامها: صباح الخير ...

صباح النور.. تعالى أدخل..

دخل ماجد وتلفت حوله: أمال بدر فين؟

كلهم خرجو .. عمتى وبدر وولاء راحو يشترو حاجات وجوز عمتى فى الشغل وولاء فى الكلية...

ومحمد فين؟؟

هو كمان خرج معرفش راح فين؟ ماتدخل, زمانهم جايين..

نظر لها ماجد وارتبك كان دائما يشعر بنظرات سمر نحوه ولايحب أن تقترب منه كثيرا وقال: لأ ... هابقى آجى بعدين...

امسكت ذراعه وضحكت: إنت خايف هو انا هآكلك.. أدخل أعمل لك شاى...

دخل ماجد وجلس ونظرت له قبل أن تدخل المطبخ وتابعها هو بعينيه.
أنهت بدر الشراء مع أمها وعادو للبيت .فتحت منيرة الباب ودخلت للشقة مع بدر وهى تقول: هو لازم كده يفضل حاجات نجيبها فى آخر لحظة

خرجت مرة اخرى لتأتى بالأكياس هى وبدر ,خرج ماجد من الحمام وهو يجفف وجهه ونظرت له بدر بدهشة: الله إنت هنا من إمتى؟

أنا.. أنا جيت من شوية..

ومبلول كده ليه؟

سمر عملت لى شاى ووقعته على وكنت بأغسل البنطلون...

ضحكت بدر : معلش.. إتلسعت..

خرجت سمر من حجرة النوم بسرعة ووقفت فقالت لها بدر: كده برضه ياسمر تحرقى لى جوزى؟

غصب عنى يابدر,, قربت منه بالشاى ووقع عليه.

تحاشى ماجد النظر لسمر التى قالت: لسعة بسيطة محصلش حاجة .. وأنا جبت له كريم...

أعملك شاى تانى ياماجد؟

رمقها بنظرة ممتعضة وقال: لأ مش عايز....كفاية اللى حصل.

إبتعدت سمر وقالت بدر: إيه ياماجد محصلش حاجة بلاش تعاملها كده لتزعل..

إسمعى أنا هامشى..