حكاية بدر

عرض زواج 7

جلست صباح بجوار زياد فى السيارة وسألها: إيه رأيك ياماما؟

البت شكلها هادية وبنت ناس.. هى معاها إيه؟

دبلوم ,انا عارف هاتقولى إيه إن إنا معايا كلية وهى لأ لكن الشهادة مش مهمة أبدا ياماما.

أهم حاجة يكون اهلها ناس طيبين وسمعتهم حلوة.

أنا سألت فى المنطقة اللى هم ساكنين فيها ومفيش حد بيشكر فيهم .

طيب يابنى على خيرة الله لما نشوف رأى أبوك إيه .

أهم حاجة رأيك إنت ياماما ...

البت دخلت قلبى بصراحة تحسها حنينة كده وطيبة بس عنيها مليانة دموع زى ماتكون زعلانة من حاجة..

إرتبك زياد فهو لم يخبر امه بأن بدر تعتبر مطلقة وأنها كانت على وشك الزواج وقرر عدم إخبارها هى او والده بذلك وقال: يمكن فيه مشكلة عندها وإلا حاجة ..

أكمل زياد سيره بالسيارة وهو يفكر هل مايفعله صحيح؟ هل غخفاء هذه المعلومة عن والديه تصرف سليم ام لا؟

***********

تجمعت الدموع فى عيون بدر وهى تنظر لماجد امامها ,حاول الاقترب فتراجعت خطوة للوراء وقالت: إوعى تقرب منى...

متخافيش مش هاقرب , انا بس عايزك تسمعينى .

الى سمعته فى شقتى كان كفاية قوى..

أغمض ماجد عينيه بألم ثم قال: انا عارف إنى غلطت , وغلطة كبيرة قوى , بس .. بس كان غصب عنى , متحملتش تكون قريبة منى للدرجة دى وضعفت...

أسكت متكملش...

لما كنت فى بيتكم فاجأتنى ووقعت فى الغلط و..

قاطعته بدر : بأقولك أسكت.. أسكت ...

إنتبهت لكلامه فقالت: فى بيتنا !! فى بيتنا ياقذر؟ إنت إيه؟

إرتجفت بدر من الغضب ونظر لها ماجد بتأثر وكان على وشك البكاء ثم قال : هى اللى قربت .. هى يابدر.

وإنت عملت إيه؟ مانت كمان .....

توقفت بدر عن إتمام جملتها وزفر ماجد بقوة وهو يقول: غلطة ومش هاتتكرر..

غلطة!! بتسمى خيانتك لى غلطة ...

مكانش قصدى اخونك ..

ضحكت بدر بمرارة وهى تقول: مكاش قصدك .... إنت خنتنى.. خنتنى بقصد او من غير قصد , نمت مع واحدة قبل جوازنا بيوم ,, و مكانتش اول مرة .. يعنى عملت كده معاها كتير.

أنا...

إنت إيه ؟ إيه؟ دى مكانتش مجرد خيانة لحظية دى كانت علاقة غير شرعية و مع مين ؟ بنت خالى...