مكــتوبلك تـــشقي !

البارت الخامس

البارت الخامس

مكتــــــوبلك تشقي

نهض وألف سؤال يدور في رأسه ، أخذ ثوبه وإرتداه بسرعه ليخرج لها

بعد دقائق من إنتظارها وهي تجلس في غرفة في منزلهم ، تمسح دموعها تارة ، وتتركها تسقط تارة أخرى  ،دخل هو بعرض جسمه وطوله المعتدل نسبيا ، ملامح وجهه متسائله ، دخلت أمه وراءه بملامح حده وجلسو

عقبة : احم .. كيف حالك ي بنت عمي
أسيل بشهقه تحاول كتمانها : حمدلله ، وانت
عقبة : تفضلي شن فيه إن شاء الله خير
أسيل نظرت له ولأمه : جاياتك بالك تساعدني
أم عقبة : في شنو يا حسرة .. شن مزال تبي
أسيل : ي عمتي بالله عليك الي فيا كافيني ،، انا مالقيت لمن نمشي ، وانتم جيراننا ومن قبل نعرفوكم وتودونا ونودوكم
أم عقبه : قبل قبل هدا .. بعد الي درتيه معش فيه ود بيناتنا
أسيل ببكاء: انا والله ما دخلني قداش بنزيد ونعاود ف الموضوع .. الي صار مش بإيدي حرام عليكم أفهموني
عقبة : الي فات مات ... خشي ف موضوعك
أسيل مسحت دموعها : صالح خدا ولدي مني
عقبة : ............. ، اي  هدا ولده حتى هوا
أسيل وهي تنظر للأسفل: قال معش بيرده ، والولد مزال يبي مراجعات وعيادات وهوا حاطه ف الحوش ويقولي تو يبرا ..
أم عقبة : به وشن دخل عقبة توا
أسيل : يا عقبة نبيك تكلمه يجيبهولي .. نبي ولدي
أم عقبة : مصح وجهك بيدخل بينك وبين راجلك وولد عمك .. هوينا كلمي سلافك ولا عمك دبري عقبة شن دخله
أسيل : يا عمتي الله يهديك .. تعرفي انتي عمي راجل كبير يعد ف ايامه ،، كلمته ومادار حل .. وولاده كل واحد في بر انا كان نعرغهم بيفيدوني راني مشيتلهم .. انتم ناسي وجيراني من لما جيت على الدنيا .. انتم اهلي وديما وقت الفزعه متخلوش فيا ولا تخلو ف بوي وامي .. انا لما عجزت معش لقيت حل الا عقبة بعد ما توفى عمي محمد ( بو عقبة )
عقبة : ولدك حله عندي .. انا نكلم صالح ونردهولك اقل شي لين يكمل علاجه
أسيل : الله يبارك فيك
ام عقبة : انا مش عاجبني الكلام
أسيل وقفت : احم ، اسفه يا عمتي . خلاص انسو الكلام الي قلته وتو ربي يحلها .. الباين جرح الماضي قاعد لتوا ورحت انا الضحيه
عقبه وقف ووقفت امه  : استهدي بالله يمه  .. اصبري يا بنت عمي تو نشوفله حل ولدك
ام عقبة : اسمعي .. هدا ولدي عقبة خديتي من سنينه هلبا .. يزيك يزيك اخطيه انا معش نبيك تحتكي بيه .. تسمعي ولالا ..
عقبة : يممه خلاص.. الموضوع يخصني انا
ام عقبة : باهي يا عقبه يسير خير يسير خير
عقبة : اسمعي ي بنت عمي .. مانردكش وهدا ولدك وكبدك وانا الي نقدر عليه بنديره .. نهني عليه لين يبرا ونعالجه لاني انا السبب ، لاكن قصه ولدك يقعد عندك انتي مش بوه هذي صعبه وبنحاول فيها لعيو... " سكت قبل أن يكملها وهو ينظر لعينيها "
أسيل : تسلم يا ولد عمي ماتقصرش ..
عقبة : ان شاء الله اليوم نكلمه وربي يدير الي فيه الخير
أسيل : سامحني ديما مشقياتك معايا .. سامحيني يا عمتي مكسورة وجيتكم .. ان شاء الله اخر مرة ومعش تشوفو وجهي
ام عقبة : ...........
عقبة : ماسار الا الخير واهل وحباي..." سكت قبل ان يكمل نطقها " احم ووقرايب زي قبل زي تالي
أسيل وهي تقاوم دموعها : ف أمان الله