مكــتوبلك تـــشقي !

البارت السابع عشر

البارت السابع عشر

امسك مواجعك ياوقـــت
قلالـــ عــزم مـــــاعاد ننفعو

سعاد : يا بنتي حكيتلك كل شي وقلتلك ، وهذي الدنيا فيها بلاوي ومصايب والحمدلله جتنا في هذي ولا اكثر
سجى : اخر شي توقعته ان ام سامي كانت متزوجه بويا ، هدا شي مستحيل حتى نتخايله يمه

سعاد : قدر الله وماشاء فعل ، فالنهايه انحلت قضيتهم وتمت وماتت في ارضها ومافيش مخلوق سمع بيها ولا يدري عليها

سجى : هالقصه نغصت عليا وكرهتني في سامي وامه وبوه وكل اهله

سعاد : لاااااا يا بنتي لاا ، مادخلش سامي ، مايدريش راهو حالك حاله ويستر الله ماتطلع امه تاني حاكيتله وهوا اصكر ودار حادث ، لاكن مديرهاش نوريه تعرف ولدها حقاني ودمه حار بتقوله راهو صار وصار بينفرها معش بيجيها

سجى تضع كوب القهوة وتنظر لأمها بإنكسار : وجعني في كبدي يمه ، وفي نفس الوقت مانيش قادرة نتقبل الموضوع بعد الي سمعته ، يعني تصوري لو استمرت القصه راهو انا وسامي بيناتنا خوت

سعاد وقفت بغضب : لووو ، والحمدلله الي ماصارتش ، خلاص اقلعيها الحكايه من راسك وحكايه خطبه سامي وكل شي اشطبي عليه ومعش تفكري منبيكش تتعمقي وترفضي ولا توافقي لانه وجعك ، بنتي ونعرفك ونعرف تفكيرك ، خلاص خودي بنصيحتي وخلي عقلك ساكت ولا يفكر في حاجه وغدوة الحي والي يعيش نلقو حل لهالقضيه ، ان شاء الله هوا ينوض بخير والباقي كله تمشي اموره

يدخل والد سجى على اخر جملة قالتها سعاد غير منتبه لها ليضع الأكياس التي بيديه على الطاولة ويبتسم عند رؤية سجى التي لم يرها منذ الأمس : اهلااا بنتي
سعاد القت بنظرتها الحادة على ابنتها التي نظرت بتلقائية لأمها ، فوقفت وهي تحتضن أباها الذي تفاجا من إحتظانها له وهو يمازحها وهي التي كانت تحاول إخفاء دموعها خوفا من أن يراها ويسألها ، فماذا ستجيبه وهو الواثق بأن إبنته لم تعلم ماذا جرى معه في أيامه القديمه

..
..
..
..

منى وهي تجلس على الأريكه في غرفة المعيشه : اووووف مايردش هالعقبه هالبارد

الام : خليه مالك وماله انتي تو يجي

منى : ياااخوووفي هـون يمه وه علينا بعدين حشمتنا مع ريموه بعد ما وافقت

الام : يهون عينه وطياح سعده والله ياخدها ورجله فوق رقبته لأمتى بنراجي انا يزي طلع الشيب في راسه

منى : حقااا يمه ماسمعتيش

الام : خير اللهم اجعله خير

منى : قالك اسيل وراجلها بيسافرو

الام : باهي فكه وفكتين ... وانتي منين سمعتي

منى : وه قصه طويلة بسلامتنا النسون قصقاصات ، لاكن المهم قالو هي ماتبيش تسافر وتخلي امها