راقصي الهوس فجورا

الجزء الثامن عشر

⚜️ࢪَاقِــصِـي  الهَــــوَس  فُــجُـوࢪَا⚜️

••عِـــــــشْقٌ ذَمِيـــــــــمْ••      

✎𝐒𝐡𝐞 𝐖𝐨𝐥𝐟 ✦𝐖𝐢𝐣𝐨𝐮 ✦𝐈𝐦𝐲

𝐏𝐚𝐫𝐭乂18

داك الشي داز بحال شي حلم او نقولو كابوس ، تا لقات راسها وسط الحبس بين ربعة ديال الحيوط مع ناس ما كتعرفهمش، كانت باقي ما خرجات من الصدمة باقي صورتو بين عينيها و هو طايح فالأرض عايم فد مو ...

حركات راسها بآه بلاما تحس كتأكد على داك الشي لي كيدور فراسها .. هو ما ت.. هي متأكدة انو ما ت ... حيت ما يمكنش شي حد يعيش من بعد داك النز يف كامل .. ما كانت حاسا بوالو و ما باغا والو .. عقلها واقف و محصور فديك اللحضة فاش ضرباتو و حررات راسها منو .. صحيح فالأخير تسلبات حريتها بفعلتها .. ولكن لقات داك الحرية لي هي كانت كتقلب عليها ..بعيدة عليه و علا جحيمو ..

كانو السجينات لي معاها كيناضروها بغرابة .. كانت كتبان ليهم هارب ليها الفريخ، كدير شي حركات فشي شكل .. كتنطق بوحديتها .. منهم لي بقات فيها و قدرات ظروفها، و عرفات انو دازت عليها شي حاجة خايبة .. و منهم لي بدات تعيب عليها و تتنـ مر على حالها ...

وقفات كتتمختر بيناتهم ملامحها شرانيين، دايرا كوب كارصون و لابسا توني رجالي، لو لا لاطاي ديالها لي فاضحاها ما تقولش هادي مرا ...

وقفات على ماريا كتطلع فيها و تهبط .. و شداتها من فكها بعـ نف هزات ليها وجهها و نطقات كتطلع و تهبط فملامحها : مالك ازين كتفيبري هارب ليك نرجعوه ليك؟

و طلقاتها بضحكة و شافت فعشيراتها حتى هوما طلقوها بضحكة عالية .. هاكدا كيديرو لأي سجينة دخلات جديدة ..

ماريا زيرات على فكها و نترات وجهها منها،ناضت متوجهة للحمام ما حاملاش تدوي مع حتى حد،تا كتحس بديك خيتي شداتها من شعرها و جراتها ..

ماريا كشرات ملامحها بألم و غضب.. و الدورة لي غدور عندها قلبات ليها اليد باش شاداها ورا ضهرها.. تا طلقات منها و بدات كغوت.. و شداتها من داك الشوية د الشعر لي عندها .. و بدات كتزدح ليها راسها مع واحد الحيط.. كانت غايبة على الوعي ما عارفاش اش كدير .. لو لا تدخل المربيات د الحبس و حيدوها ليها من يدها .. كانت غتصفيها ليها ..

شدوها هي داوها للإنفرادي تتعاقب.. و لوخرا داوها يخيطو ليها ...

و مشات يام و جات يام .. و بالضبط ربع شهور و هي فالحبس ...

جالسة فوق سريرها ساهية كتحسس بيدها بطنها المنتفخ.. و تفكر لبعيد ... كانت حاملة من مصطفى من داك الليلة .. دخلات بولدو فكرشها.. دخلات بقطعة غتبقا تفكرها بيه .. كتفكر ربع شهور و هي هنا فالحبس .. رفضات انها تدير محامي .. و المحاكمة ديالها باقي ما تحددات.. كان باقي فبالها نفس السؤال .. واش قت لاتو؟ واش ما ت دابا؟ و بنتها شكون معتاني بيها .. غتكون جداتها مامات مصطفى اكيد ..

قاطع حبل تفكيرها دخول وحدة من المربيات و هي قاصدتها: ماريا .. نوضي تبعيني للبيرو د المدير .. شي حد بغا يشوفك..

ماريا قوسات حجبانها مستغربة و وقفات و لبسات فرجليها صندالتها و نطقات : شكون جا عندي واش المحامي؟ ياك انا رفضت يكون عندي محامي ...

المربية: ماعرفتش حتى انا هادو أوامر سيادة المدير .. زيدي معايا ...

و ديك الشي لي كان.. زادت معاها لمكتب المدير و هي حاسا بإحساس غريب مخلي الفراشات يرفرفو فمعدتها .. كانت متوقعة شكون اكيد المحامي لي رفضات شحال من مرة .. حيت من غير مصطفى ما عندها تاشي حد يتفكره، هاد الاخير لي هي بيدها صفاتها ليه و شافتو عايم فد ماياتو...

حلات ليها باب المكتب و دخلاتها و نطقات: بقاي هنا علاما يجي سيادة المدير..

ماريا حركات راسها بالإيجاب بهدوء،  المربية خرجات و هي توجهات لواحدة من النوافذ الكبيرة لي كانت مدخلة ضوء الشمس للمكتب .. وقفات حداها مخلية ديك الشميسة تداعب ملامحها و تدفي قلبها من رطوبة الزنزانة لي هما فيها، و لي ما كتوصلهاش الشمس ..

بقات ساهية و مستمتعة بالدفىء لي خلقاتو الشمس فروحها عاطياها طاقة جديدة، تا كيتفتح باب المكتب و تسمعو خطواتو هو داخل....

يتبع...