راقصي الهوس فجورا

الجزء العاشر

⚜️ࢪَاقِــصِـي  الهَــــوَس  فُــجُـوࢪَا⚜️

••عِـــــــشْقٌ ذَمِيـــــــــمْ••      

‏✎𝐒𝐡𝐞 𝐖𝐨𝐥𝐟 ✦𝐖𝐢𝐣𝐨𝐮 ✦𝐈𝐦𝐲

‏𝐏𝐚𝐫𝐭乂10

مسافة الطريق لي كان الصمت فيها سيد الموقف،هو غادي سايق و مهدن ملامحو باردة، ما تعرف اش تحت راسو و هي غادا كتترعد بالخوف الخلعة شاداها من صبعان رجليها ..

بقات كدور فعينيها فاش دخلو لواحد الحي راقي و كتبلع فريقها تا وقفو قدام واحد الميني فيلا ، سكت الطوموبيل و شاف فيها و نطق بصورته الرجولي:هبطي...

شافت فيه كترعد و نطقات بخوف : علاش جبتيني لهنا؟

مصطفى زفر بهدوء و نطق : هبطي و ما تكتريش الهضرة...

و خرج هو سابقها خلاها كتخبط بين الخوف و الشك،واش تهبط و تدير اش قال ليها؟ و لا تهبط و تهرب بحالها منو ..

فالأخير سلمات امرها لله و خرجات تابعاه، و هو كيدور عينو فالسيكتور لا يكون شي حد ،فتح الباب و جرها من دراعها دخلها ما فيه لي يدير معاها نهار ثاني باش تدخل ...

سد و راه الباب و دار شاف فيها لقاها مخرجة فيه عينيها و صفرا بالخوف،طلعها و نزلها و اشار ليها براسو للباب الدخلاني ...

مصطفى نطق ببرود : تهزي دخلي ...

بلعات ريقها و حركات راسها بواخا بزز منها و هو زاد سبقها ، في حين هي بقات متليا وراه ...

دخلو للدار و هي غير كاتدور فعينيها و تقدد فشفايفه،قلبها طاح بين رجليها فاش دوز الساروت فالباب و دارو فجيبو،و بقا كيشوف فيها...

شدها من دراعها دخلها لوسط السيجور،عاد طلق منها و مشا جلس هو فوق الفوتوي و متكي بضهرو واخد راحتو، شاف فيها و نطق و هو كيجبد فكارو من الباكية: بركي..

جلسات كيف قال ليها و عينيها عليه كتسناه غا ينوض يديرو فيها شي فضيحة حتى نطق :يالله ا آنيسة..عاودي ليا قصتك كنسمع ...

ماريا تنهدات و نطقات بصوت انثوي رقيق من بعد تردد طفيف : انا يتيمة ما•تو واليديا و بقا ليا غير عمي ... بقيت كنعيش معاه .. مراتو كانت خايبة كضربني و كتجوعني و تحكر عليا هي و بناتها ... و عمي ...

سكتات حاسة بغصة قاصحة و هي كتروي حكايتها و ترجع تتذكر دوك اللحظات الصعاب فحياتها،عويناتها دمعو ملي تفكرات داك النهار المشؤوم...

مصطفى مراقب ملامحها بهدوء و هي كاتعاود ليه، حس بيها مترددة تكمل حكايتها، و نطق بصوتو الرجولي الخشن...

مصطفى: و عمك؟ كملي

ماريا بللات حلقها بريقها و كملات : و عمي فاش بديت كنكبر تكرفص عليا .. غتـا ـصبني .. و هربت منهم .. بقيت كنتلاوح فالزنقة و نخدم فالديور فالميناج.. ولكن ما كان عندي جهد ليه ...